Ku Twarisa Mahungu Lamanene

Hi Ku Vumba Minkarhi Yo Nyikela Vumbhoni Bya Xitshuketa

1 Yesu u letele vadyondzisiwa vakwe ku endla leswaku ku voninga ka vona ku vangama. (Mat. 5:14-16) U lave leswaku va byela van’wana hi ta mahungu lamanene ya Mfumo wa Xikwembu eka nkarhi wun’wana ni wun’wana lowu faneleke. Emhakeni leyi, Yesu a a ri xikombiso. Xikombiso xa leswi a ku ri loko a tirhise nkarhi wo byela wansati wa Musamariya ntiyiso exihlobyeni eSikari. (Yoh. 4:5-30) Ku vuriwa yini hi hina ke? Xana ha yi vumba minkarhi yo tano leswaku hi nyikela vumbhoni?

2 A hi hinkwerhu ka hina lava hi nga hlanganyelaka entirhweni wa nsimu siku na siku. Kambe kwalomu ka siku na siku ku nga va ni minkarhi leyi hi nga nyikelaka vumbhoni ha yona. Hi ndlela yihi ke? Hi ku nyikela vumbhoni bya xitshuketa. Magidi yo tala ma tive ntiyiso hi ndlela leyi. Loko hi xalamukela ku xiya minkarhi ivi endzhaku hi endla matshalatshala, vanhu lava engetelekeke swinene va nga fikeleriwa.

XANA HI NGA CHUMAYELA EKA VAMANI?

3 Ku tlhandlekela eku nyikeleni ka vumbhoni lebyi hleriweke bya yindlu na yindlu, maendzo yo vuyela ni tidyondzo ta Bibele, hi nga nyikela vumbhoni eka vatirhi-kulorhi, vadyondzi-kulorhi exikolweni, lava hi tirhisanaka na vona hi tlhelo ra mabindzu, maxaka ni van’wana lava hi tolovelaneke na vona exisekelweni xa xitshuketa. Loko hi famba hi bazi, xitimela kumbe xihaha-mpfhuka, hi nga swi kota ku sungula bulo ni vakhandziyi-kulorhi. Loko hi ri eku wiseni, hi nga avelana mahungu lamanene ni vatirhi va le tihoteleni ni le timoteleni, valanguteri va tigarachi, vatirhi va le tikhefini ni vachayeri va mathekisi. Hi nga vulavula ni van’wana loko hi rindzile ehofisini ya dokodela kumbe evuhlantsweleni bya mani na mani. Loko hi ri ekaya, kumbexana hi nga nyikela vumbhoni eka vaakelani, vaxavisi kumbe lava tisaka tinhundzu. Hambi loko hi ri exibedlhele hi nga nyikela vumbhoni eka madokodela, vaongori ni vavabyi van’wana.

NDLELA YO SUNGULA HA YONA

4 Loko hi vekelane nkarhi ni munhu wo karhi naswona hi swi tiva leswaku hi ta boheka ku heta nkarhi wo karhi hi rindzile, hi nga famba ni timagazini ta sweswinyana kutani hi tilunghiselela ku bula hi xihloko lexi tsakisaka ni un’wana loyi hi hlanganaka na yena. Kumbe hi nga tirhisa xiphephana kumbe broxara tanihi xisekelo xo sungula bulo. Eka matshamelo yo tano, van’wana va swi kume swi humelela ku sungula bulo hi ku hlamusela mhaka leyi kokaka nyingiso leyi sekeriweke eka xiendlakalo xa sweswinyana ivi endzhaku va kombela ku titwa ka munhu yoloye. Van’wana va kume leswaku ku vutisa xivutiso lexi ntlhotlhaka mianakanyo malunghana ni xiendlakalo xo karhi xa sweswinyana swi nga yisa eku nyikeleni lokunene ka vumbhoni. Eka timhaka hinkwato, ku sungula hi leswi swi lavekaka ku endla leswaku swilo swi humelela.

KU NYIKELA VUMBHONI ENTIRHWENI

5 Lava va nga ni mintirho ya ku tihanyisa va nga vumba minkarhi yo nyikela vumbhoni eka vatirhi-kulorhi. Vamakwerhu vambirhi va xisati va endle nxaxamelo wa vatirhi-kulobye lava va anakanyeke leswaku va nga ha tsakela ntiyiso. Hi ku vulavula ni lava va nga enxaxamelweni ni van’wana lava nga riki vangani, va swi kotile ku fambisa tibuku leti tlulaka 65 leti nge Ku Chaputa Ka Nhlavutelo ivi va hlakulela ku tsakela lokukulu.

6 Emhakeni yin’wana, makwerhu u bohe leswaku a a ta chumayela eka munhu wo sungula loyi a tshamaka etlhelo ka yena hi nkarhi wa yena wa ku wisa ka timinete ta 15. Wanuna loyi a vulavuleke na yena a a tiva ntiyiso kambe u vule leswaku a a nga lavi ku landzelela mhaka leyi. Hambi swi ri tano, makwerhu u siye tibuku laha wanuna loyi a a ta ti kuma hi ku olova kona. Hi tin’hweti ta tsevu wanuna yoloye ni ndyangu wa yena hinkwavo a va khuvuriwile.

7 Tanihi “ku vonakala ka misava,” Yesu u vumbe minkarhi yo nyikela vumbhoni bya xitshuketa. (Yoh. 8:12) Loko hi xalamukela ni ku tiyimisela ku avelana ntshembo wa hina lowu sekeriweke eBibeleni ni van’wana, na hina a hi nga kayeli minkarhi yo nyikela vumbhoni. Xisweswo, ku fana ni vadyondzisiwa va Yesu, hi ta ‘vangama tanihi timboni emisaveni.’—Vafil. 2:15, 16.