Hi Tamerisiwe Mahungu Lamanene
1 Mawaku lunghelo leri hi nga na rona ro tamerisiwa mahungu lamanene ya Xikwembu! (1 Tes. 2:4) Hambiloko van’wana va ri ala rungula leri ra matimba, kambe lava nga ni timbilu letinene ra va koka kukota nun’hwelo lowunene. (2 Kor. 2:14-16) Lava va amukelaka va tlhela va yingisa mahungu lamanene va ta ponisiwa. (Rhm. 1:16) Xana hi fanele hi endla yini hi mahungu lamanene lawa hi tamerisiweke wona?
2 Yesu Ni Vaapostola: Yesu a a rhangisa ntirho wa ku twarisa mahungu lamanene. (Luka 4:18, 43) Ndlela leyi a a rhandza vanhu ni ku tlangela rungula leri ha yona yi n’wi susumetele leswaku a ri byela van’wana hambiloko a karhele naswona a ri ni ndlala. (Mar. 6:30-34) Hi rito na hi swiendlo u pfune vadyondzisiwa va yena va vona leswaku ntirho wo chumayela hi Mfumo i wa nkoka.—Mat. 28:18-20; Mar. 13:10.
3 Vaapostola va tekelele Yesu hi ku twarisa rungula ra Mfumo hi ku hiseka. Hambiloko va biwa ni ku lerisiwa leswaku va tshika ku chumayela, ‘va hambete va nga rhuteli ku dyondzisa ni ku vula mahungu lamanene.’ (Mint. 5:40-42) Muapostola Pawulo a nga karhalanga loko a ri karhi a endla ntirho lowu. (1 Kor. 15:9, 10; Kol. 1:29) U fanise lunghelo leri ra ku chumayela mahungu lamanene ni xikweleti lexi a a xi kolota vanhu-kulobye, naswona a a tiyimiserile ku titsona swo karhi leswaku a endla ntirho lowu.—Mint. 20:24; Rhom. 1:14-16.
4 Lunghelo Leri Hi Nga Na Rona Namuntlha: Ku tlangela ntirho wo kwetsima lowu hi tamerisiweke wona, ku ta hi susumetela leswaku hi lava tindlela to ndlandlamuxa ndlela leyi hi hlanganyelaka ha yona entirhweni wo chumayela. (Rhom. 15:16) Edward loyi a a famba hi xitulu xa vanhu lava lamaleke, a a tshama enyangweni wa hotela kutani a vulavula ni vaendzi hi ripfumelo rakwe. Kambe, leswi a a navela ku ndlandlamuxa vutirheli bya yena, u endle leswaku movha wa yena wu va ni ndhawu yo hlawuleka leswaku a kota ku nghena hi xitulu xa yena xa vanhu lava lamaleke, u hete malembe yo tala a ri karhi a phayona naswona u fambe magidi-gidi ya tikhilomitara. Ku fana na Edward, vo tala namuntlha va cince swiyimo swa vona leswaku va kota ku hlanganyela hi xitalo eku chumayeleni ka mahungu lamanene.
5 Onge na hina namuntlha, hi nga tekelela Yesu ni vaapostola, hi rhangisa ntirho wo chumayela evuton’wini bya hina minkarhi hinkwayo. Loko hi endla sweswo, hi ta va hi kombisa leswaku ha va rhandza vanhu naswona ha ma tlangela mahungu lamanene lawa hi tamerisiweke wona.