Nongonoko Lowuntshwa Wa Siku Ra Nhlengeletano Yo Hlawuleka

Nhloko-mhaka leyi nge “Endlani Swilo Hinkwaswo Hikwalaho Ka Mahungu Lamanene” i ya nongonoko lowuntshwa wa siku ra nhlengeletano yo hlawuleka lowu nga ta sungula hi September. (1 Kor. 9:23) Mahungu lamanene ya Mfumo i mahungu ya nkoka swinene lama twiwaka namuntlha. Nongonoko lowu wu ta hi pfuna leswaku hi twisisa lunghelo leri ro hlawuleka leri hi nga na rona ra ku va vabyarhi va mahungu lawa yo tsakisa. Wu ta tlhela wu hi pfuna leswaku hi va ni xivindzi xa ku hambeta hi twarisa mahungu lamanene handle ko karhala.—Mint. 5:42.

Nongonoko lowu wu ta hi kombisa ndlela yo tirhisa ndzetelo wa hina wa swa le tilweni hi xitalo leswaku hi ta hetisisa swo tala evutirhelini. Hi ta twa timhaka ta van’wana lava endleke mindzulamiso leswaku va ndlandlamuxa ntirho wa vona, ku katsa ni vantshwa lava tinyiketelaka ku yisa mahungu lamanene emahlweni.—Ringanisa Vafilipiya 2:22.

Nkulumo-nkulu, leyi nga ta nyikeriwa hi xivulavuri lexi nga endza, yi ta kandziyisa xilaveko eka hina xo tshama “hi ri lava fanelaka ku tamerisiwa ntirho wa Evhangeli.” (1 Tes. 2:4) Hi ta pfuniwa leswaku hi vona leswaku loko hi ta tshama hi ri ni lunghelo ra ku byela van’wana mahungu lamanene, hi fanele hi hambeta hi ri lava fanelekaka ehenhleni ka swilaveko ni mimpimanyeto ya Xikwembu malunghana ni ku ehleketa ni mahanyelo ya hina. Ku ta tlhela ku kandziyisiwa mikateko leyi hi yi kumaka hi ku endla leswi.

U nga wu kayeli nongonoko lowu wa nkoka. Vanhu lava ha ku tinyiketelaka lava navelaka ku khuvuriwa enhlengeletanweni yo hlawuleka ya siku rin’we va fanele va tivisa mulanguteri la ungamelaka hi ku hatlisa. Rhamba hinkwavo lava u dyondzaka na vona leswaku va va kona. A hi pfumeleleni Yehovha leswaku a hi tiyisa leswaku hi endla swilo hinkwaswo hikwalaho ka mahungu lamanene xisweswo hi hetisa ntirho lowu lowukulu ku nga si fika Armagedoni.