Nongonoko Lowuntshwa Wa Siku Ra Nhlengeletano Yo Hlawuleka

¹ Ha yini hi fanele ku twarisa mahungu lamanene handle ko karhala? Hi swihi swilaveko swa ku va muchumayeri wa mahungu lamanene? Xana vanhu lava nga ni tingana ni lava chavaka va nga ri teka njhani goza eku aveleni ka van’wana mahungu lamanene? Swivutiso leswi ni swin’wana leswi tlhontlhaka mianakanyo swi ta hlamuriwa enongonokweni wa siku ra nhlengeletano yo hlawuleka lowu nga ta sungula hi September, lowu nga ta va ni xihloko lexi nge “Ku Faneleka Tanihi Vatirheli Va Mahungu Lamanene.”​—⁠Ringanisa 2 Vakorinto 3:⁠5.

² Leswi hi nga vanhu va Yehovha, hi fanele ku va ni vukheta malunghana ni ndlela leyi hi hanyaka ha yona. Mintokoto leyi khutazaka yi ta nyikeriwa hi vantshwa lava nga ta hlamusela ndlela leyi va lwisaneke ni ntshikilelo wa tintangha ha yona. Vatswari va ta nyikiwa xikhutazo xa rirhandzu malunghana ni xilaveko xo letela vana va vona tanihi vatirheli va Xikwembu. Hinkwerhu ka hina hi ta pfuniwa leswaku hi tlangela xilaveko xo chumayela ni mikateko leyi nga ta hi tela ni lava hi yingiselaka.​—⁠1 Tim. 4:⁠16.

³ Kavula nkhuvulo wu ta va nchumu lowu xiyekaka esikwini leri. Emahlweni ka xiendlakalo lexi, nkulumo leyi sekeriweke eBibeleni yi ta kongomisiwa ngopfu-ngopfu eka vanhu lava ha ku tinyiketelaka. Kavula, hinkwavo lava nga ta va va ri kona va ta rhiya ndleve loko nkulumo ya nkhuvulo yi nyikeriwa ni xikongomelo xa yona xi vekiwa erivaleni. Un’wana ni un’wana la tsakelaka ku khuvuriwa esikwini ra nhlengeletano yo hlawuleka u fanele ku tivisa mulanguteri la ungamelaka ka ha ri ni nkarhi leswaku a ta va ni nkarhi lowu ringaneleke wo vonana ni vakulu vambirhi leswaku va ta pfuxeta swivutiso leswi hlawuriweke ni lava yaka eku khuvuriweni.

⁴ Xin’wana lexi xiyekaka ku ta va nkulumo-nkulu leyi nga ta nyikeriwa hi xivulavuri lexi nga endza. Yi ta va ni nhloko-mhaka leyi nge “Ku Faneleka Ni Ku Hloma Tanihi Vatirheli Va Xikwembu.” Malunghiselelo lamakulu ya mune lama nga ta hi hlomisa tanihi vatirheli ma ta hlamuseriwa, naswona nkulumo yi ta katsa mintokoto leyi akaka ripfumelo.

⁵ Kunguhata ka ha ri sweswi leswaku u ta va kona enongonokweni hinkwawo. U nga rivali ku rhamba vanhu lava tsakelaka ni swichudeni swa Bibele leswaku na vona va ta vuyeriwa eka siku leri ra dyondzo ya le tilweni. Hi ndlela leyi hi nga tiyiseka leswaku hi “faneleka hi ku helela” tanihi vatirheli va mahungu lamanene.