Nongonoko Lowuntshwa Wa Nhlengeletano Ya Siku Ro Hlawuleka
1 Dyondzo ya hina ya Nghwazi Leyi Tshameke Yi Hanya yi engetele ku twisisa ka hina Yesu Kreste. Hi laha ku faneleke, nongonoko wa nhlengeletano ya siku ro hlawuleka lowu sungulaka hi September wu ta hlamusela nhloko-mhaka leyi nge “Ku Landzelerisisa Xikombiso Xa Hina Lexikulu,” wu ta hi pfuna ku twisisa kahle leswi ku n’wi landzela swi vulaka swona.
2 Ku nga khathariseki vukhale kumbe malembe lawa u nga na wona entiyisweni, hinkwavo lava vaka kona eka nhlengeletano leyi va ta khutaziwa leswaku va fana swinene na Kreste. Xiphemu xin’wana xa nongonoko xi ta va ni ndzayo ya vantshwa. Xi ta va hlomisela ku langutana ni mintlhontlho malunghana ni dyondzo, vuhungasi ni ku hlongorisa swilo leswi vonakaka. Ku ta va ni tinkulumo, mintokoto ni minkombiso, leswi kandziyisaka ndlela yo papalata nkucetelo wa misava kutani u tifanisa na Kreste.—1 Pet. 2:21.
3 Vanhu lava va ha ku tinyiketelaka va ta kuma nkarhi wa ku khuvuriwa, va kombisa erivaleni leswaku i valandzeri va Kreste. Ku ta va ni bulo ra Matsalwa leri nyanyulaka ra mhaka leyi, emahlweni ka nkhuvulo. Lava va lavaka ku khuvuriwa eka nhlengeletano ya siku ro hlawuleka va fanele va byela mulanguteri la ungamelaka hi ku hatlisa hi laha swi kotekaka ha kona, leswaku a kuma nkarhi lowu ringaneke wo lunghiselela leswaku vakulu va kambisisa swivutiso leswi hlawuriweke swa lava yaka eku khuvuriweni.
4 Xivulavuri lexi endzeke xi ta nyikela nkulumo-nkulu, leyi nge “Ku Landzela Xikombiso Xa Hina Lexikulu—Xana Swi Hi Yisa Kwihi?” Tiyiseka leswaku u rhamba vanhu hinkwavo lava tsakelaka va ta eka nongonoko lowu wu khutazaka, lowu tiyisaka ripfumelo. Ku hava ndlela leyikulu kumbe leyi vuyerisaka ku tlula ku landzela Xikombiso Xa Hina Lexikulu, Yesu Kreste.—Mt. 19:27-29.