Nongonoko Lowuntshwa Wa Nhlengeletano Ya Xifundzha
1 Ku sukela hi September, nhloko-mhaka ya tinhlengeletano ta xifundzha yi ta ku “Ku Yingisa Ni Ku Dyondza Ku Tirhisa Rito Ra Xikwembu.” Nhloko-mhaka leyi, leyi sekeriweke eka Deterenoma 31:12, 13, yi nyikela xisekelo lexi faneleke xa nongonoko hinkwawo xo kandziyisa tidyondzo leti hi faneleke ku ti tiva ni ku ti tirhisa.
2 Hambi leswi vanhu vo tala namuntlha va yingiselaka marito lama huhuteriweke lama hambukisaka, ku ni xilaveko xa nkoka xa leswaku un’wana ni un’wana wa hina a yingisela Rito ra Xikwembu ni ku dyondza ku ri tirhisa. (Lk. 11:28; 1 Tim. 4:1) Hi ri karhi hi anakanya hi leswi, nongonoko wa nhlengeletano ya xifundzha wu endleriwe ku nyikela xikhutazo ni mpfuno eka vahuweleri, mindyangu, vakulu ni maphayona. Hi Mugqivela, ku ta va ni nxaxamelo wa swiphemu swa mune wa tinkulumo leti nga ta vulavula hi “Ku Langutana Ni Swiphiqo Swa Hina—Hi Ku Nyikela Nyingiso eRitweni Ra Xikwembu.” Naswona hi Sonto ni mixo, ku ta va ni nxaxamelo wa tinkulumo lowu nga ta vulavula hi “Ndlela Leyi Matsalwa Ma Layaka Hi Ku Lulama Ha Yona.” Nongonoko hinkwawo wu ta nyikela xikhutazo xa moya lexi wena ni ndyangu wa wena mi nga fanelangiki ku xi kayela.
3 Hi Mugqivela ni Sonto, ku ta nyikeriwa ni ku kombisiwa swiringanyeto leswi tirhaka swa vutirheli bya nsimu. Nakambe ku ta nyikeriwa mintokoto ni mimbulavurisano leyi khutazaka ni leyi dyondzisaka. Xisweswo, hi ku va kona ni ku yingisela hi langutelo ro tirhisa leswi u swi dyondzaka, u ta va exiyin’weni lexinene xo tirhisa swileriso swa Rito ra Xikwembu hi xitalo.
4 Xin’wana lexi nga ta xiyeka enhlengeletanweni ya xifundzha ku ta va ku khuvuriwa ka vamakwerhu lava ha ku tinyiketelaka va xinuna ni va xisati. Va nga si kombisa ku tinyiketela ka vona erivaleni, lava lavaka ku khuvuriwa va fanele ku byela mulanguteri la ungamelaka leswaku va lava ku khuvuriwa leswaku a ta endla malunghiselelo ya leswaku vakulu va vonana na vona.
5 Nkulumo ya le rivaleni ya minongonoko leyi ya xifundzha yi ta ku “Ha Yini U Kongomisiwa Hi Bibele?” Rhamba vanhu lava tsakelaka leswaku va va kona. Tanihi leswi u languteleke xikhutazo lexi lavekaka swinene ni mpfuno lowu wena ni ndyangu wa wena mi nga ta wu amukela, endla malunghiselelo lama heleleke leswaku u va kona enongonokweni hinkwawo.