Hitekani, Mi Tikhoma

1 Hikwalaho ka xivono xa misava lexi tshamelaka ku cinca, swi fanela swonghasi leswi nhloko-mhaka ya nhlengeletano ya xifundza ya lembe ra ntirho ra 1991 yi nge “Hitekani, Mi Tikhoma.” (1 Vates. 5:6) Nongonoko lowu wu ta sungula hi September. Hinkwerhu ka hina hi fanele hi endla malunghiselelo yo va kona hi ku hatlisa loko mulanguteri wa xifundza xa ka hina a hi tivisa masiku ya kona.

2 Tin’wana ta tinhla ta nongonoko ti ta katsa nxaxamelo wa swiyenge swa mune lowu kunguhateriweke ku hi pfuna ku ‘tikhoma eka swilo hinkwaswo.’ (2 Tim. 4:5) Ku nga khathariseki ku pfumala ku tikhoma loku kumbexana a hi ri na kona, xana sweswi hi nga humelerisa ku yini eku papalateni ka mintlhamu ya Sathana ni ku ala moya wa misava? Tiyiseka leswaku u nga kayeli mhaka leyi vulavulaka hi rungula leri ra ntikelo. Eka nhlengeletano hinkwayo ya masiku mambirhi, nakambe nyingiso wa hina wu ta yisiwa eka xitsundzuxo lexi tirhaka lexi nga ebukwini leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka. U nga ha navela ku ta na kopi ya wena. Ngopfu-ngopfu vantshwa va ta lava ku yisa nyingiso lowu hlawulekeke eka rungula leri kongomisiweke eka vona hi mulanguteri wa xifundza hi Mugqivela. Hi ntolovelo, ku ta va ni malunghiselelo ya nkhuvulo hi Mugqivela, kutani lava navelaka ku kombisa ku tinyiketela ka vona enhlengeletanweni ya xifundza va fanele va tivisa mulanguteri loyi a ungamelaka ka ha ri na nkarhi hi ku hatlisa hi laha swi nga kotekaka ha kona.

3 Hi Sonto ni mixo tidyondzo ta ntikelo ti ta nyikeriwa hi nxaxamelo wa swikombiso leswi kombisaka ndlela leyi hi nga pfunekaka ha yona eka makhombo, ku katsa ni swihoxo swa hina vini. Ni ndzhenga mulanguteri wa muganga u ta nyikela nkulumo ya le rivaleni leyi vulavulaka hi nhloko-mhaka leyi nge “Ku Tirhisa Vutlhari eMisaveni Leyi Tlanyaleke.” Vahuweleri hinkwavo va Mfumo ni vanhu lava tsakelaka va fanele va endla matshalatshala lama tiyeke leswaku va va kona.

4 Tanihi leswi mintshikilelo ya vutomi yi tlhandlekelanaka hi ndlela leyi hambetaka, hi tshemba leswaku hinkwavo va ta kuma mpfuno ni ku phyuphyisiwa eka mhaka leyi yi kunguhateriweke ku hi khutaza. Hi ta vona tindlela leti hi nga vaka lava xalamukeke swinene eka swilaveko swa hina vini swa moya ni leswiya swa mindyangu ya hina ni swa van’wana ebandlheni ha tona. Tiyimiseli ku va kona eka nhlengeletano hinkwayo ya xifundza ni ku tshama u yise nyingiso eka nongonoko hinkwawo, “hikuva namuntlha, ku ponisiwa ku kusuhi ku tlula siku hi pfumeleke.”—Varhoma 13:11.