Nongonoko Lowuntshwa Wa Nhlengeletano Ya Xifundzha

Nhloko-mhaka leyi nge “Ku Tsundzuka Siku Ra Yehovha” i ya nongonoko wa masiku mambirhi wa nhlengeletano ya xifundzha lowu nga ta sungula hi September. (2 Pet. 3:12) Wu kunguhateriwe ku hi pfuna leswaku hi tshama hi ri ni langutelo ra xihatla. Vaaki va misava va ta avanyisiwa hi Yehovha ku nga ri khale. I vamani lava nga ta pona “siku le’rikulu ra Šikwembu ša matimba hikwawo”? Hi lava tshamaka va xalamukile hi tlhelo ra moya ntsena ni lava fambaka hi ndlela ya “vutomi lebyo hlawuleka bya vukhongeri.”—Nhlav. 16:14, BX; 2 Pet. 3:11.

Nkhuvulo i wa nkoka leswaku munhu a ta pona siku ra Yehovha. (1 Pet. 3:21) Vahuweleri lava navelaka ku khuvuriwa enhlengeletanweni va fanele va byela mulanguteri la ungamelaka, la nga ta endla malunghiselelo lama faneleke.

Nxaxamelo wa tinkulumo ta mune, lowu nge “Muxaka Wa Vanhu Lava Hi Faneleke Hi Va Vona,” wu ta kombisa kahle leswaku i swiendlo swihi leswi katsekaka leswaku hi ta tshama hi tsundzuka vukona bya siku ra Yehovha. Nkulumo ya le rivaleni, leyi nge “Teka Goza Ra Vutlhari Leswi Siku Ra Yehovha Ri Tshinelaka,” yi ta hlamusela leswi ‘ku lava Yehovha, vululami ni ku titsongahata,’ swi vulaka swona leswaku u ta pona.—Sof. 2:3.

Nhlengeletano ya xifundzha yi ta gimeta hi tinkulumo timbirhi leti khutazaka leti nga ta nyikeriwa hi valanguteri lava famba-fambaka, leti nge: “Xana Vutomi Bya Wena Byi Fambisana Ni Ntiyiso?” ni leyi nge “Ku Kunguhata Swa Nkarhi Lowu Taka U Ri Karhi U Tsundzuka Siku Ra Yehovha.” Tinkulumo leti ti ta hi susumetela ku kambisisa vutomi bya hina ni ku endla mindzulamiso leyi lavekaka. Vuprofeta bya Bibele ni swiendlakalo swa misava swi kombisa kahle leswaku siku ra Yehovha ri kusuhi. Nongonoko lowu wa nhlengeletano wu ta hi khutaza ku ‘hlayisa mianakanyo ya hina leyi hlutekeke ni ku hiteka.’ (1 Pet. 5:8) Tikarhatele ku va kona masiku mambirhi hinkwawo.