Nongonoko Lowuntshwa Wa Nhlengeletano Ya Xifundzha

“Hlayisa Swileriso Swa Xikwembu Leswaku U Hanya” i nhloko-mhaka ya nongonoko wa nhlengeletano ya xifundzha ya masiku mambirhi leyi nga ta sungula hi September. (Swiv. 4:4) Wu ta kandziyisa mhaka leyi ku hlayisa swileriso swa Xikwembu swi nga riki ndzwalo ha yona. Ku tlula kwalaho, wu ta kombisa ndlela leyi ku endla ku rhandza ka Xikwembu swi phyuphyisaka ni ku tisa ntsako wa ntiyiso ha yona kun’we ni ntshembo wa vumundzuku.—Mat. 11:28-30; Yoh. 13:17.

Lava hi ku yingisa xileriso xa Kreste va lavaka ku khuvuriwa enhlengeletanweni va fanele va vulavula ni mulanguteri la ungamelaka, yena u ta endla malunghiselelo lama faneleke.—Mat. 28:19, 20.

Tinkulumo ta nxaxamelo ti ta vulavula hi tindlela letinene leti ha tona hi nga kombisaka ku rhandza ka hina Xikwembu ni vamakwerhu. (Yoh. 13:34, 35; 1 Yoh. 5:3) Ndzayo leyi akaka leyi nga eka Tipisalema 19 na 119 yi ta va xiphemu xa nongonoko. Hambileswi ndzayo leyi huhuteriweke leyi nga eka tipisalema yi tsariweke emalembeni ya magidi lama hundzeke, hi ta vona ndlela leyi yi hi vuyerisaka ha yona namuntlha.

Nkulumo ya le rivaleni leyi nga ta nyikeriwa hi mulanguteri wa muganga yi ri “Chava Xikwembu U Hlayisa Swileriso Swa Xona.” (Ekl. 12:13) Nkulumo yo hetelela ya mulanguteri wa xifundzha yi ta kombisa ndlela leyi vantshwa va nga kumaka leswinene evuton’wini sweswi ni xivangelo xo va ni ntshembo eka vumundzuku lebyi nga heriki. Mulanguteri wa muganga u ta gimeta nongonoko hi ku hlamusela vuyelo lebyinene lebyi vaka kona hi ku hanya hi “nawu wa vuhosi” wa rirhandzu. (Yak. 2:8) Kunene, lowu i nongonoko wa nhlengeletano lowu ku nga riki na munhu la navelaka ku wu kayela!