Nongonoko Lowuntshwa Wa Nhlengeletano Ya Xifundzha
1 Nongonoko lowuntshwa wa nhlengeletano ya xifundzha leyi sungulaka hi September wu ta va na xihloko lexi nge “Kuma Ntsako Lowukulu Wa Ku Hanana.” (Mint. 20:35) Ntsako wu hlamuseriwa wu ri “xiyimo xo va ni rihanyo lerinene ni ku eneriseka.” Vunyingi bya vanhu namuntlha byi wutla ntsako wihi na wihi lowu byi nga wu kumaka evuton’wini, naswona loko byi wu kuma, hakanyingi wu va wa xinkarhana. Wolowo a hi ntsako wa ntiyiso. Kambe, Yehovha u hi dyondzisa ndlela yo pfuneka ha yona hilaha ku nga heriki. (Esa. 48:17; 1 Yoh. 2:17) Nongonoko lowuntshwa wa nhlengeletano ya xifundzha wu ta kandziyisa ndlela leyi hi nga kumaka ntsako lowukulu ha yona loko hi hanana hi ndlela ya moya.
2 Hi ta dyondza tindlela leti tirhaka leti hi nga hananaka ha tona evutirhelini. Tin’wana ta tinkulumo leti nga ta nyikeriwa hi valanguteri lava famba-fambaka ti na swihloko leswi nge: “Ku Endla Vunghana Hi Rifuwo Ra Hava,” “Xixima Lunghiselelo Ra Xikwembu Ra ‘Tinyiko Leti Nga Vanhu,’” na “Kuma Ntsako Wa Ntiyiso Hi Swiphemu Swa Wona Swo Tala.” Lava va navelaka ku khuvuriwa enhlengeletanweni va fanele ku vulavula na mulanguteri la ungamelaka leswaku a ta lunghiselela vakulu leswaku va va vutisa swivutiso swa nkhuvulo. Ku tirhela Yehovha hi vuxaka lebyi baseke swi ta tisa ntsako lowukulu eka lava ha ku khuvuriwaka.
3 Ku xixima vulawuri bya Yehovha hi ndlela leyi faneleke nakambe swi tisa ntsako wa ntiyiso ni vuhlayiseki. Vanhu hinkwavo va fanele ku tiva leswi. Hikwalaho, nkulumo ya le rivaleni enhlengeletanweni ya xifundzha yi ta va ni xihloko lexi nge “Hlangana Ni Vanhu Va Xikwembu Lava Tsakeke.” Tiyiseka leswaku u rhamba hinkwavo lava kombiseke ku tsakela ntiyiso leswaku va ta yingisela nkulumo leyi. A va si kuma nsirhelelo lowu nga wona ni ntsako lowu nga heriki ehansi ka mfumo wa vanhu emisaveni leyi, leyi nga ehansi ka vulawuri bya Sathana. (Ekl. 8:9) Kambe mawaku ntsako lowu va nga ta wu kuma hi ku hlanganyela ni vanhu va Yehovha lava tsakeke!—Ps. 144:15b.
4 Ku nga khathariseki ndlela leyi swiyimo swa mafambiselo lawa ya swilo swi yaka swi biha ha yona, lava kumaka ntsako lowukulu hikwalaho ko hanana hi tlhelo ra moya a va nge hetiwi matimba hi Xikwembu lexi tsakeke. (1 Tim. 1:11, NW) Nongonoko lowuntshwa wa nhlengeletano ya xifundzha wu ta kombisa leswi swi ri ntiyiso. U nga wu kayeli!