Nongonoko Lowuntshwa Wa Nhlengeletano Ya Xifundzha
Hi wihi mpfuno lowu u wu kumaka hi ku famba na Yehovha sweswi? Xana u nga wu hlula njhani ndzingo wa ku pfumelela swilo leswi nga riki swa mintirho ya swa le tilweni leswaku swi kavanyeta timhaka ta Mfumo leti faneleke ti va to rhanga evuton’wini bya wena? (Mat. 6:33) Xana swa ku tikela ku hambanisa leswinene eka leswo biha emisaveni leyi endlaka leswo biha swi vonaka swi lulamile? (Hev. 5:14) Swivutiso leswi swi ta hlamuriwa enhlengeletanweni ya xifundzha leyi nge “Vuyeriwa Sweswi Hi Ku Famba eTindleleni Ta Xikwembu,” leyi nga ta sungula hi September 1999.—Ps. 128:1.
Xiyenge lexintshwa lexi nga ta va kona hi Mugqivela eka nhlengeletano leyi ya xifundzha ku ta va xikombiso xa ndlela leyi Nhlangano wa Ntirho wu nga endliwaka ha yona. Mulanguteri wa n’wina wa xifundzha u ta tivisa mavandlha mayelana ni leswi kunguhatiweke leswaku hinkwavo va ta va lunghiselerile leswaku va ta vuyeriwa swinene hi nongonoko.
Nkulumo leyi nge “Maphayona—Xiyisisani Mafambelo Ya N’wina,” yi ta hi kombisa ndlela yo tirhisa vutlharhi ni ku ringanisela leswaku hi ta xava nkarhi lowunene mayelana ni ntirho wa vuphayona. (Efe. 5:15-17) Nkulumo leyi nge “Tivonele Eka Tindlela Leti Tikombaka Ti Lulamile,” yi ta hi dyondzisa ndlela ya ku tiyiseka hi swilo leswi amukelekaka eka Xikwembu eka swiyenge hinkwaswo swa vutomi. Nkulumo leyi nge “Ndlela Leyi Vuprofeta Lebyi Hetisekeke Byi Hi Khumbaka Ha Yona” yi ta hi susumetela ku rhandza Rito ra Xikwembu hi mianakanyo ni timbilu ta hina hinkwato. Nkulumo ya le rivaleni leyi nge “Tindlela Ta Xikwembu—Ndlela Leyi Ti Vuyerisaka Ha Yona!” yi ta kandziyisa mpfuno lowu hi wu kumaka sweswi hi ku hanya hi ku pfumelelana ni swilaveko swa ku lulama swa Yehovha.
Xana wa swi navela ku kombisa erivaleni leswaku u lava ku famba etindleleni ta Xikwembu tanihi un’wana wa malandza ya xona lama tinyiketeleke hi ku khuvuriwa ematini? Loko swi ri tano, vulavula ni mulanguteri la ungamelaka leswaku ku ta endliwa malunghiselelo lama faneleke.
Tiyimisele leswaku u nga hundziwi hi nhlengeletano leyi ya xifundzha leyi nga enkarhini. Vana kona eka nongonoko hinkwawo wa masiku mambirhi, hikuva “ku katekile mani na mani l’a tšhav̌aka Yehova, l’a fambaka tindleleni ta yena!”—Ps. 128:1.