Nongonoko Lowuntshwa Wa Nhlengeletano Ya Xifundzha
1 Xihloko lexi ku nga ta vulavuriwa ha xona enongonokweni lowuntshwa wa nhlengeletano ya xifundzha leyi nga ta sungula hi September xi ri “Tshamani Mi Xalamukile, Mi Tiya, Mi Tinyika Matimba.” Xi sekeriwe emaritweni ya muapostola Pawulo ya xikhutazo eka Vakreste va lembe xidzana ro sungula lama rhekhodiweke eka 1 Vakorinto 16:13.
2 Nongonoko lowu wu ta sungula hi ku kandziyisa xilaveko xa hina lexi yaka emahlweni xo tikambela hi tlhelo ra moya. Ku yima hi tiyile eka leswi lulameke ‘emasikwini lawa ya makumu’ swi lava leswaku hi kambela vuxaka bya hina hi xiviri na Yehovha ni xiyimo xa hina ni nhlengeletano yakwe ya laha misaveni. (2 Tim. 3:1) Hi ta tsundzuxiwa hi ndlela leyi Xikwembu xi wu tlangelaka ha yona ntirho wa hina hinkwawo wa matimba. Hi lava ku dyondzisiwa hi tindlela leti nga ta antswisa timfanelo ta hina ta Vukreste ni ku hlayisa mahanyelo lama nga xikombiso lexinene.
3 Ku ta tlhela ku kandziyisiwa xilaveko xa ku hiseka entirhweni wo endla vadyondzisiwa loko hi ri karhi hi kula hi tlhelo ra moya ni ra vutihlamuleri. Swiringanyeto leswi tirhaka swa ndlela leyi vanhu ni mindyangu va nga hlayisaka ha yona nongonoko wa nkarhi na nkarhi wa swakudya swa moya swi ta kombisiwa etinkulumeni to hambana-hambana, eminkombisweni ni le ku burisaneni. Ku ta tlhela ku va ni nhlangano wa vamakwerhu lava nga tekangiki lava tirhaka tanihi vakulu kumbe malandza ya vutirheli lava tsakelaka ku ya eXikolweni xa Ndzetelo wa Vutirheli.
4 Hi Mugqivela, vanhu lava fanelekaka va ta swi kota ku hlambanya ku tinyiketela ka vona erivaleni hi ku khuvuriwa ematini. Kutani, hi Sonto hinkwerhu ka hina hi lava ku va kona enkulumeni ya le rivaleni, leyi nga ni xihloko lexi nge “Xana Vuxaka Bya Wena Byi Njhani Ni Xikwembu?”
5 Nongonoko wu ta hela hi ku hi khutaza leswaku hi tshama hi tiyile eripfumelweni, minkarhi hinkwayo hi tirhisana ni van’wana hi moya wa rirhandzu ni ku rhula. Nhlengeletano ya xifundzha hi wun’wana wa minkarhi yo hlawuleka leyi Yehovha a hi nyikaka yona hinkwerhu ka hina leswaku hi ‘kombana rirhandzu ni mintirho leyinene.’ (Hev. 10:24, 25) Endla makungu lama tiyeke ya leswaku u va kona enongonokweni hinkwawo hi masiku wolawo mambirhi.