Nhlengeletano Ya Xifundzha Leyi Nga Ta Hi Pfuna Leswaku Hi Sirhelela Vuxaka Bya Hina Na Yehovha
1. Yehovha u hi pfuna njhani leswaku hi kota ku endla ntirho lowu a nga hi nyika wona wo chumayela mahungu lamanene?
1 Leswi Yehovha a nga ni malwandla, wa hi letela ni ku hi khutaza leswaku hi ta kota ku endla ntirho lowu a nga hi nyika wona wo chumayela mahungu lamanene. (Mat. 24:14; 2 Tim. 4:17) Leswaku a hi letela ni ku hi khutaza, u tirhisa nhlengeletano ya xifundzha leyi hi vaka na yona lembe rin’wana ni rin’wana. Xiyimiso lexintshwa xa lembe ra ntirho ra 2010 xi ta va ni nhloko-mhaka leyi nge “Sirhelela Vuxaka Bya Wena Na Yehovha,” leyi sekeriweke eka Varhoma 8:5 na Yudha 17-19. Nhloko-mhaka leyi yi ta sungula ku tlhuvutsiwa hi vhiki ra August 31, 2009.
2. (a) Hi ta vuyeriwa hi tindlela tihi enhlengeletanweni ya xifundzha? (b) Tinhlengeletano ta xifundzha leti nga hundza ti ku pfune njhani loko u ri ensin’wini?
2 Ndlela Leyi Hi Nga Ta Vuyeriwa Ha Yona: Nhlengeletano leyi yi ta hi pfuna leswaku hi papalata swilo leswi nga hi dyelaka nkarhi lerova hi nga ha vi na mhaka ni swilo swa nkoka. Hi ta dyondza ndlela leyi hi nga wu hlulaka ha yona moya wa misava. Hi ta tlhela hi vona leswaku i yini leswi munhu a nga swi endlaka leswaku a va ni vuxaka lebyinene na Yehovha. Tinkulumo ta nxaxamelo leti nga ta nyikeriwa hi Sonto ti ta kombisa leswi munhu un’wana ni un’wana kumbe mindyangu yi nga swi endlaka leswaku yi sirhelela vuxaka bya yona na Yehovha, ngopfu-ngopfu loko yi langutane ni mintshikilelo ya misava leyi, leyi yaka yi andza swin’we ni miringo yin’wana leyi ringaka ripfumelo. Yi ta tlhela yi hi pfuna leswaku hi sirhelela timbilu ta hina, hi hlayisa vuxaka bya hina na Yehovha naswona hi tshama hi ri karhi hi ehleketa hi mikateko leyi nga ta kumiwa hi vanhu lava nga ni vuxaka lebyinene na Yehovha.
3. Yi ta va rini nhlengeletano ya n’wina ya xifundzha naswona i yini leswi u faneleke u swi endla?
3 Loko se u swi tiva leswaku nhlengeletano ya n’wina ya xifundzha yi ta khomeriwa kwihi naswona rini, u nga ha dyi nkarhi, namba u endla malunghiselelo ya leswaku u ta va kona masiku hamambirhi naswona u rhiya ndleve. Tsundzuka leswaku Yehovha wa ma katekisa mavoko lama gingiritekaka.—Swiv. 21:5.
4. Nhlengeletano ya hina ya xifundzha leyi nga ta landzela yi ta hi pfuna leswaku hi endla yini?
4 Hambileswi xiyimiso xa nhlengeletano leyi ya xifundzha xi lunghiseleriwaka hi hlonga ro tshembeka, i Yehovha loyi a nga hi lunghiselela nyiko leyi naswona yi hi pfuna leswaku hi ya emahlweni tanihi vachumayeri lava nga Vakreste. Hi n’wi nkhensa swinene Yehovha hikwalaho ka leswi malunghiselelo yakwe ma hi pfunaka leswaku hi ‘khomelela swi tiya exitivisweni xa le rivaleni xa ntshembo wa hina handle ko tsekatseka.’—Hev. 10:23-25; Yak. 1:17.