Sirhelela Mianakanyo Ya Wena

1. Hi xihi xihloko xa nhlengeletano ya xifundzha ya lembe ra ntirho ra 2013, naswona hi xihi xikongomelo xa nongonoko?

¹ Yesu u dyondzise vadyondzisiwa vakwe leswaku va rhandza Yehovha hi mbilu hinkwayo ni hi moya-xiviri hinkwawo ni hi mianakanyo ya vona hinkwayo. (Mat. 22:37, 38) Ntsombano wa nan’waka swin’we ni nhlengeletano ya xifundzha ni siku ra nhlengeletano yo hlawuleka swi lunghiseleriwe ku hi pfuna leswaku hi tiyisa munhu loyi hi nga yena endzeni. Hi laha u tsundzukaka ha kona, nhloko-mhaka ya ntsombano wa muganga wa 2012 yi ri: “Hlayisa Mbilu Ya Wena!” Nongonoko wa siku ra nhlengeletano yo hlawuleka wa lembe ra ntirho ra 2013 wu ni nhloko-mhaka leyi nge “Sirhelela Mianakanyo Ya Wena.” Naswona ntlhandlamano wa nhlengeletano ya xifundzha leyi nga ta sungula n’hweti leyi taka wu ta tlhuvutsa nhloko-mhaka leyi nge “Sirhelela Mianakanyo Ya Wena” naswona yi sekeriwe eka Matewu 22:37. Nongonoko lowu wu endleriwe ku pfuna un’wana ni un’wana wa hina leswaku a kambisisa mianakanyo ya yena n’wini leswaku yi tsakisa Yehovha.

2. I tinhlamulo ta swivutiso swihi leti hi faneleke hi ti lava hi nkarhi wa nongonoko?

² Leswi Ku Nga Ta Buriwa Ha Swona: Loko hi ri karhi hi yingisa tinkulumo ta nhlengeletano ya xifundzha, hi fanele hi kambisisa tinhlamulo ta swivutiso leswi landzelaka leswi kombisaka tinhla ta nkoka:

• Hi nga swi papalata njhani ku anakanya ‘miehleketo ya vanhu’?

• Hi nga endla yini leswaku hi susa riphume leri nga dlaya mianakanyo ya lava nga riki vapfumeri?

• Hi fanele hi va ni langutelo rihi ra mianakanyo?

• Hi byihi vuyelo bya ku anakanyisisa hi ndlela leyi faneleke?

• Hi nga n’wi pfumelela njhani Yehovha leswaku a kongomisa mianakanyo ya hina?

• Vavanuna, vavasati, vatswari ni vana va nga endla njhani leswaku ku va ni ntsako endyangwini?

• Hi nga tshama hi lunghekele siku ra Yehovha hi ndlela yihi?

• Swi vula yini ku hlomisela mianakanyo ya hina ntirho?

• Hi yihi mikateko leyi kumiwaka hi lava va tirhisaka leswi va swi dyondzaka?

3. Ha yini swi ri swa nkoka ku va kona masiku hamambirhi, leswaku hi ta yingisela khwatsi naswona hi hanya hi leswi hi swi dyondzaka?

³ Sathana u lava ku hi kanganyisa. (2 Kor. 11:3) Hikwalaho, hi fanele hi sirhelela mianakanyo ya hina hi tlhela hi lawula ndlela leyi hi ehleketaka ha yona. Hi fanele hi hambeta hi kombisa mianakanyo ya Kreste naswona hi papalata nkucetelo wun’wana ni wun’wana wa misava leyo homboloka. (1 Kor. 2:16) Xisweswo a hi endleni malunghiselelo ya leswaku hi va kona masiku hamambirhi ya nhlengeletano lowu. A hi yingiseleni hi vurhon’wana. Ku tirhisa rungula ra nkoka leri hi nga ta ri dyondza, swi ta hi pfuna leswaku hi lunghiselela mianakanyo ya hina kutani hi hisekela ntirho wa Mfumo.—1 Pet. 1:13.