Lunghiselelo Leri Endleriweke Vakreste
1. Hi rihi lunghiselelo lerintshwa leri sunguleke hi 1938 naswona hi xihi xikongomelo xa rona?
1 Hi 1938, nhlengeletano ya Yehovha yi sungule lunghiselelo lerintshwa. Mavandlha yo hlayanyana a ma rhambiwa leswaku ma ya etinhlengeletanweni ta tizoni, leti sweswi ti vuriwaka tinhlengeletano ta xifundzha. Xana a ma ya endla yini? Loko Informant ya January 1939 (leyi sweswi yi vuriwaka Vutirheli Bya Hina Bya Mfumo) yi hlamula yi te: “Tinhlengeletano leti i lunghiselelo ra Nhlengeletano ya Yehovha ya le Tilweni leri hi pfunaka ku yisa ntirho wa Mfumo emahlweni. Switsundzuxo leswi hi swi kumaka eka tona swi pfuna un’wana ni un’wana wa hina leswaku a endla ntirho lowu hi nyikiweke wona.” Ku andza ka vahuweleri va Mfumo lava a va ri 58 000 hi 1938 va ya eka ku tlula 7 000 000 hi 2009, ku kombisa leswaku tinhlengeletano ta xifundzha, ta va pfuna Vakreste leswaku va “endla ntirho lowu [va] nyikiweke wona”!
2. Hi tihi tinkulumo leti hi nga ta tiphina ha tona enhlengeletanweni ya xifundzha ya lembe lerintshwa ra ntirho?
2 Nhloko-mhaka Ya Lembe Leri: Hi wu langutele hi mahlo-ngati nongonoko lowu nga ta sungula hi September swin’we ni xikhutazo lexi hi nga ta xi kuma eka wona. Nhloko-mhaka ya wona leyi nge, ‘A Mi Xiphemu Xa Misava’ yi tekiwe eka Yohane 15:19. Hi tihi tinkulumo tin’wana leti nga ta pfuna Vakreste? Hi Mugqivela ku ta va ni nkulumo leyi nge, “Ntirho Wa Nkarhi Hinkwawo Wu Hi Sirhelela Njhani?” Hi ta tlhela hi tiphina hi tinkulumo tinharhu ta nxaxamelo leti nga ta va ni nhloko-mhaka leyi nge, “Tivonele Leswaku U Nga Ngheniwi Hi Moya Wa . . . ” “Xivandzana,” “Nghwavava Leyikulu” ni wa “Vaxavisi Lava Famba-fambaka.” Hi Sonto ku ta va ni tinkulumo ta nxaxamelo leti nga ta va ni nhloko-mhaka leyi nge “Rhandza Yehovha Ku Nga Ri Misava.” Tinkulumo tin’wana leti nga ta nyikeriwa hi leti nge, “Hambetani Tanihi ‘Valuveri Ni Vatshami Va Nkarhinyana’” ni leyi nge “Tiyani Timbilu! Misava Ndzi Yi Hlurile.”
3. I yini leswi hi nga ta vuyeriwa ha swona hi ku va kona enhlengeletanweni ya xifundzha?
3 Endzhaku ka loko a ve kona enhlengeletanweni ya xifundzha leya ha ku hundzaka, makwerhu un’wana wa xisati loyi a a nga ha wu hisekeli ntirho wa nsimu, u vule leswaku nongonoko lowu wu n’wi pfune leswaku a tikambisisa kutani a tivekela pakani yo “tshama a ri kona ensin’wini handle ko kavanyetiwa!” Swi le rivaleni leswaku nhlengeletano ya xifundzha ya lembe lerintshwa ra ntirho yi ta hi pfuna leswaku hi rhandza Yehovha ematshan’weni yo rhandza misava. (1 Yoh. 2:15-17) Tiyiseka leswaku u va kona naswona u rhiya ndleve leswaku u ta vuyeriwa hi xitalo elunghiselelweni leri ri endleriweke Vakreste!