Nongonoko Lowuntshwa Wa Nhlengeletano Ya Xifundzha
‘Eminkarhini leyi ya mangava leyi swi nonon’hwaka ku langutana na yona,’ hi lava vutlhari lebyi humaka eka Yehovha leswaku hi ta amukeleka eka yena. (2 Tim. 3:1) Nongonoko wa nhlengeletano ya xifundzha wa lembe ra ntirho ra 2005 wu ta hi nyika ndzayo leyi nga ta hi pfuna swinene ni ku hi khutaza hikuva wu ta ndlandlamuxa nhloko-mhaka leyi nge “Kongomisiwa Hi ‘Vutlhari Lebyi Humaka eHenhla.’”—Yak. 3:17.
Nxanxamelo wo sungula wa tinkulumo lowu nga ni nhloko-mhaka leyi nge “Ku Kombisa ‘Vutlhari Lebyi Humaka eHenhla’ eVuton’wini Bya Hina,” wu ta hi pfuna ku vona leswi lavekaka leswaku hi va lavo tenga, vo rhula, lava anakanyelaka ni ku va lava lunghekelaka ku yingisa. Kutani mulanguteri wa xifundzha u ta hlamusela tinhla tin’wana tinharhu ta vutlhari lebyi humaka ehenhla. Mulanguteri wa muganga u ta gimeta siku ro sungula hi ku kombisa ndlela leyi vatirheli lava nga Vakreste va hlomiseriweke ku vulavula vutlhari bya Xikwembu ha yona, hambileswi van’wana va va tekaka va ri “lava nga dyondzekangiki.”—Mint. 4:13.
Eka siku ra vumbirhi, nxaxamelo lowu nga ni nhloko-mhaka leyi nge “Hanya Hi Swilo Leswi Akaka” yi ta hi pfuna ku tiva ni ku papalata swilo leswi nga tsanisaka vumoya bya hina. Yi ta hi komba ndlela leyi hi nga akaka van’wana ha yona eminhlanganweni ya vandlha, ensin’wini ni le ndyangwini. Nkulumo ya le rivaleni leyi nge, “Ndlela Leyi Vutlhari Bya Xikwembu Byi Hi Vuyerisaka Ha Yona,” yi ta dzikisa ku tlangela ka hina mpfuno lowu hi wu kumaka loko hi ri karhi hi tirhisa misinya ya milawu ya Xikwembu evuton’wini bya hina. Nkulumo yo gimeta leyi nge “Ku Hanya Hi Vutlhari Bya Xikwembu Swa Hi Sirhelela,” yi ta hi tiyisa leswaku hi hambeta hi tiyimisela ku titshega hi Yehovha leswaku hi kuma vutlhari emasikwini lawa ya makumu.
Nchumu lowu tsakisaka eka nhlengeletano yin’wana ni yin’wana i ku khuvuriwa ka vadyondzisiwa lavantshwa. Xikolo Xa Vutirheli Bya Le Tilweni ni Dyondzo ya Xihondzo xo Rindza ya vhiki rero na swona swi ta va kona enhlengeletanweni. Yehovha u tsakela leswaku hinkwerhu ka hina hi vuyeriwa hi vutlhari lebyi a hi nyikaka byona. Ndzayo ni swikhutazo leswi hi nga ta swi kuma enhlengeletanweni ya hina ya xifundzha swi ta hi fuwisa emoyeni.—Swiv. 3:13-18.