Nongonoko Lowuntshwa Wa Nhlengeletano Yo Hlawuleka Ya Siku Rin’we
1 “Mi Va Vanhu Lava Dyondzisiwaka Hi Yehovha” ku ta va nhloko-mhaka ya nongonoko lowuntshwa ya nhlengeletano yo hlawuleka ya siku rin’we leyi nga ta sungula hi September. (Yoh. 6:45) Hakunene dyondzo ya le henhla leyi humaka eka Yehovha ya hi pfuna leswaku hi hanya vutomi lebyi vuyerisaka. Yi endla leswaku hi kurisa ku tlangela ka hina lokunene ka ndzhaka ya moya. Matshalatshala ya hina yo pfuna van’wana leswaku va twa mahungu lamanene ma hi endla hi va swirho leswi pfunaka swinene etikweni. Nhlengeletano leyi yo hlawuleka ya siku rin’we yi ta kandziyisa mikateko leyi kumiwaka hi vanhu lava dyondzisiwaka hi Yehovha.
2 Nongonoko lowu wu ta hambanisa mpfuno wa dyondzo ya Xikwembu ni khombo leri dyondzo ya misava yi nga na rona. Hi ta yi vona kahle ndlela leyi Yehovha a nyikelaka dyondzo ya xiyimo xa le henhla ha yona—dyondzo leyi sekeriweke eRitweni rakwe, ku nga Bibele. Ku ta kandziyisiwa tindhawu tinharhu ta vugandzeri leti eka tona hi kumaka ntsako hi ku dyondzisiwa hi Xikwembu. Ku engetela kwalaho, vantshwa va ta khutaziwa ku tekelela swikombiso swa le Bibeleni leswi xiyekaka swo tanihi Davhida na Timotiya ni ku tirhisa vutomi bya vona emintirhweni ya moya. Ripfumelo ra hina ri ta tiyisiwa loko hi xiyisisa vutshembeki bya vanhu lavakulu lebyi na byona byi nga ta vekiwa erivaleni. Vanhu lavantshwa lava tinyiketeleke lava fanelekaka va ta khuvuriwa. Va fanele va tivisa mulanguteri la ungamelaka leswaku va navela ku khuvuriwa ku nga si fika siku ra nhlengeletano.
3 Nkulumo-nkulu ya nhlengeletano yo hlawuleka ya siku rin’we yi ta ku “Ku Dyondzisiwa Hi Yehovha Leswaku Hi Endla Ku Rhandza Ka Yena.” Yi ta kandziyisa swivangelo leswi endlaka leswaku hinkwerhu ka hina hi fanele hi hambeta hi dyondza, hi tiya eripfumelweni ni ku hambeta hi endla nhluvuko. Hi ta khutaziwa ku tekelela Yehovha hi ku dyondzisa van’wana ntiyiso lowu yisaka evuton’wini lebyi nga heriki. Mintokoto leyi akaka yi ta va kona, yi ta kombisa ndlela leyi tibuku ta Sosayiti ti pfuneke vanhu vo tala ha yona leswaku va dyondzisiwa hi Yehovha. Vuyelo bya leswi hetisisiweke hi nongonoko wa misava hinkwayo wa dyondzo ya Yehovha byi ta kandziyisiwa.
4 Tiyiseka leswaku u va kona. Khutaza vanhu hinkwavo lava tsakelaka leswaku va va kona. Tshama u langute emahlweni ku ya dyondzisiwa swilo swo tala leswinene hi Muleteri wa hina Lonkulu.—Esa. 30:20.