Xiyimiso Xa Siku Ra Nhlengeletano Yo Hlawuleka Ya 2010
1. (a) Hi swihi swihloko leswi sekeriweke eMatsalweni swa siku ra nhlengeletano yo hlawuleka, leswi nga tlhuvutsiwa emalembeni lawa ya ha ku hundzaka? (b) Eka masiku ya tinhlengeletano to hlawuleka leti nga hundza, xana ti kona tinhla leti u ti kumeke naswona ti ku pfuneke loko u ri ensin’wini?
1 Tin’wana ta tinhloko-mhaka leti ku buriweke ha tona eka masiku ya tinhlengeletano to hlawuleka leti nga hundza hi leti nge “Tiyiseka Hi Swilo Swa Nkoka Swinene,” “Ku Yima Hi Tiyile Tanihi Ntlhambi Wun’we,” “Hambeta U Nyika Vumbhoni Ehenhla Ka Ntiyiso” ni leyi nge “Hina Hi Vumba—Yehovha I Muvumbi Wa Hina.” (Filp. 1:9, 10, 27; Yoh. 18:37; Esa. 64:8) Xana u swi langutele hi mahlo-ngati ku va kona eka siku ra nhlengeletano yo hlawuleka ya lembe ra ntirho ra 2010? Yi ta va ni nhloko-mhaka leyi nge: “Nkarhi Lowu Seleke Wu Komile,” leyi sekeriweke eka 1 Vakorinto 7:29.
2. Hi nga swi kombisa njhani leswaku hi ri langutele hi mahlo-ngati siku ra nhlengeletano yo hlawuleka?
2 Endzhaku ka loko siku leri mi nga ta ya ha rona eka nhlengeletano ya n’wina yo hlawuleka ri tivisiwile evandlheni ra n’wina, sungula ku bula hi rona ni van’wana. Vatswari van’wana va pfuna vana vona leswaku va tshama va swi languterile ku ya enhlengeletanweni hi ku fungha siku ra nhlengeletano eka khalendara ya ndyangu. Va tlhela va tsala swilo leswi ha un’we wa vona a faneleke a famba na swona, kutani endzhaku ka sweswo, va sungula ku hlayela masiku lama nga sala leswaku va ya enhlengeletanweni. Hi nkarhi wa Dyondzo ya Ndyangu mi nga ha pfuxeta tinhla leti mi ti tsaleke eka masiku ya tinhlengeletano to hlawuleka leti nga hundza. U nga lunghiselela mbilu ya wena hi ku kambisisa rungula leri nga ebukwini leyi nge Vuyeriwa Eka Vuleteri Bya Xikolo Xa Vutirheli Bya Le Tilweni, matluka 13-16. Rungula leri ri nga pfuna wena swin’we ni ndyangu wa wena leswaku mi ‘nyikela nyingiso eka ndlela leyi mi yingisaka ha yona.’—Luka 8:18.
3. I yini leswi hi nga swi endlaka leswaku hi vuyeriwa eka leswi hi swi dyondzaka eka siku ra nhlengeletano yo hlawuleka?
3 Tirhisa Leswi U Swi Dyondzaka: Swi tolovelekile ku twa vanhu va vula marito lama landzelaka endzhaku ka nhlengeletano, “Hi tiphinile swinene!” Leswi va swi vulaka i ntiyiso hikuva enhlengeletanweni leyi hi kuma mikateko yo tala leyi humaka eka Yehovha. (Swiv. 10:22) Leswaku leswi u swi dyondzeke swi veka mihandzu, u fanele u anakanyisisa ha swona u tlhela u swi tirhisa. (Luka 8:15) Loko u ri endleni yo ya ekaya endzhaku ka nhlengeletano, tinyike nkarhi wo bula ni swirho swa ndyangu hi xiyimiso xa nhlengeletano kumbe u bula ni lava u fambaka na vona hi movha. Bulani hi tipakani ta n’wina ni hi tinhla leti mi lavaka ku ti tirhisa loko mi ri ensin’wini. Leswi swi ta ku pfuna leswaku u nga swi rivali leswi u swi dyondzeke hambiloko se ku hundze nkarhi wo leha nhlengeletano yi hundzile.—Yak. 1:25.
4. Ha yini nhlengeletano leyi yi ri ya nkoka swinene eka hina?
4 Minkarhi hinkwayo ha tsaka loko hi nyikiwa nyiko leyi nga ta hi pfuna swinene. Kutani hi fanele hi swi langutela hi mahlo-ngati swakudya leswi hi nga ta tiphina ha swona eka siku ra nhlengeletano ya hina yo hlawuleka leyi nga ta landzela, tanihi leswi yi lunghiseleriwaka hi Yehovha. Hi nga tiyiseka leswaku leswi hi nga ta swi dyondza swi ta hi pfuna hi tindlela hinkwato, naswona nyiko leyi Yehovha Tata wa hina la nga ematilweni a nga ta hi nyika yona yi ta hi khutaza ni ku hi letela leswaku hi endla ntirho lowu a hi nyikeke wona.—2 Tim. 4:2; Yak. 1:17.