Rito Ra Xikwembu Ri Ni Matimba

1. Nhloko-mhaka ya nhlengeletano yo hlawuleka ya lembe ra ntirho ra 2014 yi ri yini?

¹ Ku tlula swilo hinkwaswo leswi endliweke hi vanhu lava nga hetisekangiki, Bibele yi ni matimba yo hi cinca, ku vuyetela mianakanyo ya hina leswaku hi fambisana ni ku rhandza ka Yehovha. Xana Rito ra Xikwembu ri ni matimba hi ndlela leyi? Hi nga ma tirhisa njhani matimba ya rona evuton’wini bya hina? Hi nga yi tirhisa njhani hi ndlela leyi humelelaka leswaku hi pfuna van’wana? Ha tshemba leswaku hinkwerhu hi ta akeka hi tlhelo ra moya tanihi leswi tinhla leti ti nga ta kambisisiwa eka nongonoko wa nhlengeletano yo hlawuleka ya lembe ra ntirho ra 2014 leyi lunghiseleriweke ka ha ri ni nkarhi. Nhloko-mhaka ya wona yi ri: “Rito Ra Xikwembu Ri Ni Matimba” naswona yi tekiwe eka Vaheveru 4:12.

2. I tinhlamulo ta swivutiso swihi leti hi faneleke hi ti yingisela?

² Kuma Tinhlamulo Ta Swivutiso Leswi: Loko u ri karhi u yingisela nongonoko, tsala tinhlamulo ta swivutiso leswi xaxametiweke laha hansi.

• Ha yini hi fanele hi tshemba Rito ra Yehovha? (Ps. 29:4)

• Hi nga ma vona njhani matimba ya Rito ra Xikwembu evuton’wini bya hina? (Ps. 34:8)

• U nga ma pfumelela njhani matimba ya Rito ra Xikwembu leswaku ma tirha loko u ri ensin’wini? (2 Tim. 3:16, 17)

• Hi nga swi papalata njhani ku phasiwa hi matimba ya vuxisi ya misava ya Sathana? (1 Yoh. 5:19)

• Loko u ri muntshwa u nga swi kotisa ku yini ku humelela hi tlhelo ra moya? (Yer. 17:7)

• Hi nga swi kotisa ku yini ku va ni matimba hambiloko hi tsanile? (2 Kor. 12:10)

• I yini lexi lavekaka leswaku hi hambeta hi endla ku cinca evuton’wini bya hina hambiloko ku hele nkarhi wo leha hi ri ni mikhuva ni langutelo ro biha? (Efe. 4:23)

3. Handle ka ku va hi dyondza eka nongonoko, i yini swin’wana leswi hi nga ta vuyeriwaka ha swona eka nhlengeletano yo hlawuleka?

³ Mawaku ndlela leyi hi nga ta vuyeriwa ha yona loko hi twa rungula leri ra nkoka! Ku engetela kwalaho, nhlengeletano yo hlawuleka, ku fana ni nhlengeletano ya xifundzha swin’we ni ntsombano wa muganga yi ta hi nyika nkarhi wo va hi tolovelana ni vanhu van’wana ni ku tsakela xinghana ni vamakwerhu va xinuna ni va xisati lava humaka emavandlheni man’wana. (Ps. 133:1-3; 2 Kor. 6:11-13) Hikwalaho, tinyike nkarhi wo tihlanganisa ni vanghana va khale ni ku lava vanghana lavantshwa. Loko ku ta va ni xivulavuri le xi endzeke ku fana ni mulanguteri wa muganga kumbe makwerhu la humaka eBethele loyi a averiweke enhlengeletanweni ya n’wina yo hlawuleka, ha yini u nga tinyiki nkarhi wo va u n’wi kombisa malwandla yena ni nsati wa yena? Hakunene, hi ni swivangelo swo tala swo va hi yi langutela hi mahlo-ngati nhlengeletano leyi taka yo hlawuleka!