‘Swakudya Hi Nkarhi Lowu Faneleke’
1. Xana siku ra nhlengeletano yo hlawuleka leya ha ku hundzaka ri ku pfune njhani wena swin’we ni van’wana?
1 Minkarhi yo tala loko hi gimeta siku ra nhlengeletano yo hlawuleka hi tala ku vula hi ku, “Hakunene hi vuyeriwile!” Mulanguteri un’wana wa xifundzha u vule leswaku endzhaku ka loko van’wana exifundzheni xakwe va yingisele nongonoko wa nhlengeletano leya ha ku hundzaka, va vule leswaku va lava ku ndlandlamuxa ntirho wa vona wa nsimu. Mulanguteri un’wana wa muganga u te: “Wu hi pfune leswaku hi xiya minkarhi leyi hi hanyaka eka yona loko hi ehleketa hi swiboho leswi hi swi endleke.” Un’wana u te: “Vahuweleri vo tala va vule leswaku nongonoko lowu wu va khutaze leswaku va rhangisa swilo swa nkoka swinene, ku nga ntirho wo chumayela.” Xana wena wu ku pfune njhani?
2. I yini leswi ku nga ta buriwa ha swona eka nongonoko wa lembe ra ntirho leri taka?
2 Nongonoko wa lembe ra ntirho leri taka na wona wu ta hi pfuna swinene. Nhloko-mhaka ya wona yi ri, “Tumbela Eka Yehovha,” naswona yi tekiwe eka Pisalema 118:8, 9. Tinhloko-mhaka tin’wana leti ku nga ta buriwa ha tona hi leti: “Ndlela Leyi Yehovha A Nga Khokholo Ha Yona Hi Minkarhi Ya Maxangu,” “Pfuna Van’wana Leswaku Va Kuma Vutumbelo Ehansi Ka Timpapa Ta Yehovha,” “Tekelela Yehovha Hi Ku Va Vutumbelo Eka Van’wana,” “Vantshwa, Tshembani Yehovha!” ni leyi nge “Paradeyisi Ya Hina Ya Moya I Vutumbelo Lebyi Humaka Eka Yehovha.”
3. I yini leswi hi faneleke hi swi endla leswaku hi vuyeriwa hi xitalo?
3 Leswaku Hi Vuyeriwa: Loko siku ra nhlengeletano ri tivisiwile, hlela ku va kona naswona u rhamba ni swichudeni swa wena swa Bibele. Leswaku hi “veka mihandzu hi ku tiyisela,” hi fanele hi tirhisa leswi hi swi dyondzaka. (Luka 8:15) Rhiya ndleve hi nkarhi wa nongonoko u tlhela u tsala tinhla ta nkoka leti u lavaka ku ti tirhisa evuton’wini bya wena ni le vutirhelini bya wena. Endzhaku ka nhlengeletano, bulani hi nongonoko tanihi ndyangu, kutani mi kambisisa leswaku wena ni ndyangu wa wena mi nga ri tirhisa njhani rungula rero.
4. Ha yini hi fanele hi ri langutela hi mahlo-ngati siku ra nhlengeletano yo hlawuleka leri taka?
4 Ku fana ni swakudya leswi xawulaka, siku ra nhlengeletano yo hlawuleka ya lembe leri ri ta ku vuyerisa swinene. Onge Yehovha a nga katekisa matshalatshala ya wena naswona u vuyeriwa eka ‘swakudya leswi fikeke hi nkarhi lowu faneleke’ leswaku swi pfuna Vakreste hi tlhelo ra moya.—Mat. 24:45.