Lunghiselelo Lerintshwa Ro Pfuxeta Nongonoko Wa Tinhlengeletano

Leswi misava ya Sathana yi yaka yi nyanya ku biha, Yehovha wa hi khutaza leswaku “hi hambana ni ku nga xiximi Xikwembu ni ku navela ka misava, [kutani hi] . . . hanya hi mianakanyo yo hluteka ni ku lulama ni ku tinyiketela loku nga ni vukwembu exikarhi ka mafambiselo lawa ya swilo ya sweswi.” (Tito 2:12) Nongonoko wa siku ra nhlengeletano yo hlawuleka ni nhlengeletano ya xifundzha, leti hi vaka na tona lembe ni lembe i man’wana ya malunghiselelo lawa a hi endlelaka wona hi ku tirhisa “hlonga ro tshembeka ni ro tlhariha.” (Mat. 24:45) Tinhlengeletano leti ta swakudya swa moya ta hi tiyisa hakunene!

Leswaku hi tshama hi ri karhi hi tsundzuka ni ku tirhisa ndzetelo lowu hi wu kumeke, ku ta tirhisiwa lunghiselelo lerintshwa ro pfuxeta nongonoko wa tinhlengeletano hi lembe ra ntirho ra 2005. Eka tluka 5-6 ra xiengetelo lexi ku ni swihloko leswi nga ta hi tsongolela tinhla ta tinhlengeletano swin’we ni swivutiso swo pfuxeta nongonoko wa nhlengeletano ha yin’we. Mavandlha ma ta bula ha swona eka Nhlangano wa Ntirho loko ku sele masiku ma nga ri mangani leswaku ma ya enhlengeletanweni leyi ma averiweke yona niloko ma ha ku vuya. Xana swi ta endlisiwa ku yini?

Vhiki rin’we kumbe mambirhi loko vandlha ri nga si ya enhlengeletanweni ya xifundzha, ku ta va ni nkulumo ya timinete ta khume leyi sekeriweke eka xihloko lexi nge “Nongonoko Lowuntshwa Wa Nhlengeletano Ya Xifundzha” eka Nhlangano wa Ntirho, leyi nga ta endla vayingiseri va swi langutela hi mahlo-ngati ku ya twa nongonoko. Xivulavuri xi ta tlhela xi hlaya swivutiso swa mpfuxeto kutani xi khutaza hinkwavo leswaku va tsala tinhla leti va nga ta ti tirhisa loko ku endliwa mpfuxeto eka mavhiki ma nga ri mangani endzhaku ka nhlengeletano.

Mavhiki ma nga ri mangani endzhaku ka nhlengeletano, ku ta va ni mpfuxeto wa 15 wa timinete wa nongonoko wa siku ro sungula ra nhlengeletano eka Nhlangano wa Ntirho. Eka vhiki leri tlhandlamaka, ku ta va ni mpfuxeto wa 15 wa timinete wa nongonoko wa siku ra vumbirhi. Bulo rero ri ta va ri sekeriwe eka swivutiso swa mpfuxeto leswi nga eka xiengetelo. Mpfuxeto wu fanele wu dzika eka ndlela leyi tinkulumo ti va pfuneke ha yona vamakwerhu. Vakulu va nga ha hlela leswaku tinkulumo to karhi ta Nhlangano wa Ntirho ti komisiwa kumbe ti nga nyikeriwi kumbe va ti vekela vhiki rin’wana, leswaku ku va ni nkarhi wo pfuxeta tinhla ta nhlengeletano.

Ku ta landzeriwa rona lunghiselelo leri loko ku pfuxetiwa nongonoko wa siku ra nhlengeletano yo hlawuleka, kambe swi to hambana ntsena hileswaku nongonoko hinkwawo wu ta pfuxetiwa hi timinete ta 15 ntsena. Hinkwerhu hi fanele hi hlayisa xiengetelo lexi leswaku hi ta vuyeriwa swinene hi ndzetelo lowunene lowu Yehovha a hi nyikaka wona.—Esa. 48:17, 18.