Nongonoko Lowuntshwa Wa Siku Ra Nhlengeletano Yo Hlawuleka

Hi ku tiyisiwa hi moya lowo kwetsima, Vakreste vo sungula va chumayele mahungu lamanene hi ku hiseka hilaha va nga kotaka hakona. (Mint. 1:8; Kol. 1:23) Nongonoko wa siku ra nhlengeletano yo hlawuleka ya lembe ra ntirho ra 2007, lowu nge ‘Tshamani Mi Khomeke Ngopfu Hi Rito,’ wu ta hi pfuna leswaku hi tekelela xikombiso xa vona lexinene.—Mint. 18:5.

Loko Hosi Davhida a vulavula hi rito ra Xikwembu u te: “Xitsundzuxo xa Yehovha xa tshembeka, xi tlharihisa la nga riki na ntokoto.” (Ps. 19:7) Nongonoko wa siku ra nhlengeletano yo hlawuleka ya 2007 lowu lunghiseleriweke hi vukheta, wu ta kandziyisa nkoka wa ku tirhisa Matsalwa leswaku hi ‘lulamisa swilo’ naswona wu ta hi khutaza ku tirhisa Rito ra Xikwembu leswaku hi chumayela ni ku dyondzisa hi ku hiteka. (2 Tim. 3:16, 17) Nongonoko lowuntshwa wu ta kombisa ndlela leyi hi nga yi papalataka ha yona mintlhamu ni ndlela leyi hi nga vuyeriwaka ha yona loko hi tirhisa misinya ya milawu ya Bibele evuton’wini bya hina bya siku ni siku. Wu ta tlhela wu hi pfuna ku tirhisa Rito ra Xikwembu ku pfuna vantshwa ni lava ha ku sungulaka ku hlanganyela leswaku va endla nhluvuko hi tlhelo ra moya.

Tiyiseka leswaku u va kona loko nongonoko wu sungula naswona u rhiya ndleve. Tsala tinhla leti u nga ta tirhisa evuton’wini bya wena. Swi yingise swinene swiletelo ni switsundzuxo leswi u nga ta swi kuma, naswona u anakanyisisa hi ndlela leyi u tiyimiseleke ku swi tirhisa ha yona swilo leswi u swi dyondzeke.

Nongonoko wa siku ra nhlengeletano yo hlawuleka wu ta endla leswaku hi ya hi ri tsakela swinene Rito ra Xikwembu, wu hi endla hi hambeta hi chumayela mahungu lamanene ya Mfumo hi ku hiseka ni ku hi kombisa ndlela leyi hi nga va pfunaka ha yona van’wana leswaku na vona va endla hilaha ku fanaka. Kutani tiyimisele leswaku u nga hundziwi hi nkongomiso wihi ni wihi wa moya ni ndzetelo lowu Yehovha a hi nyikaka wona hi ndlela leyi!—Esa. 30:20b, 21.