Xana U Rhangisa Yini?
1 Minhlangano yo tala ya vukhongeri yi kandziyisa mintirho yo pfuna van’wana yo tanihi ku aka swikolo kumbe swibedlhele. Hambileswi Timbhoni ta Yehovha ti nga rivaliki “ku endla leswinene ni ku avelana swilo ni van’wana,” ti rhangisa ku pfuna vanhu hi tlhelo ra moya.—Hev. 13:16.
2 Xikombiso Xa Lembe-xidzana Ro Sungula: Yesu u endle mintirho yo tala leyinene loko a ha ri laha misaveni, kambe ntirho wa yena lowukulu a ku ri ku nyikela vumbhoni malunghana ni ntiyiso. (Luka 4:43; Yoh. 18:37; Mint. 10:38) U lerise valandzeri vakwe leswaku ‘va famba va ya endla vanhu va matiko hinkwawo vadyondzisiwa, va va dyondzisa.’ (Mat. 28:19, 20) Naswona u kombise leswaku lava va kombisaka ripfumelo eka yena a va ta endla ntirho lowukulu ku tlula lowu a wu sunguleke. (Yoh. 14:12) Yesu u rhangise ntirho wo chumayela hikuva wu pfuna vanhu ku dyondza ndlela yo ponisiwa.—Yoh. 17:3.
3 Muapostola Pawulo u langute ntirho wa yena wo chumayela wu ri lowu ‘bohaka,’ ku nga xilaveko lexi a a nga ta xi papalata. (1 Kor. 9:16, 17) A a tiyimisele ku titsona hinkwaswo, a tiyisela ndzingo wun’wana ni wun’wana, kumbe ku karhateka hi nchumu wihi ni wihi lowu faneleke, leswaku a hetisisa vutirheli bya yena. (Mint. 20:22-24) Muapostola Petro ni vanghana va yena va kombise moya lowu fanaka. Hambiloko va pfaleriwa ekhotsweni ni ku biwa, “a va hambeta va nga rhuteli ku dyondzisa ni ku vula mahungu lamanene hi ta Kreste, Yesu.”—Mint. 5:40-42.
4 Ku vuriwa yini hi hina? Xana hi rhangisa ntirho wo twarisa mahungu lamanene ya Mfumo ni wa ku endla vadyondzisiwa? Ku fana na Yesu, xana ha khumbeka hakunene hi vanhu lava ‘vavisiweke ni ku tsalangana ku fana ni tinyimpfu leti nga riki na murisi’? (Mat. 9:36) Swilo leswi endlekaka emisaveni ni vuprofeta bya Bibele swi kombisa kahle leswaku mafambiselo lawa ya swilo lama hombolokeke ma le kusuhi ni ku hela! Ku tshama hi tsundzuka nkoka wa ntirho wo chumayela swi ta hi susumetela ku ya emahlweni hi chumayela hi ku chivirika.
5 Kambisisa Swiyimo Swa Wena: Tanihi leswi swiyimo swa vanhu hakanyingi swi cincaka, i swinene leswaku nkarhi na nkarhi hi kambisisa loko hi nga kota ku endla mindzulamiso leswaku hi hlanganyela hi xitalo entirhweni wo chumayela. Makwerhu un’wana wa xisati u ve phayona ra nkarhi hinkwawo hi malembe ya va-1950, 60 na va-70 kambe a boheka ku tshika hikwalaho ka vuvabyi. Kambe hi ku famba ka nkarhi, vuvabyi bya yena byi antswile. Sweswinyana wa ha ku tlhela a kambisisa swiyimo swa yena kutani a kuma leswaku a nga tlhela a phayona nakambe. A a tsakile hakunene loko a ya eXikolweni xa Ntirho wa Vuphayona a ri ni malembe ya 90! Ku vuriwa yini hi wena? Xana u le kusuhi ni ku huma penceni kumbe ku heta xikolo? Xana ku cinca ka swiyimo swa wena swa ku pfumelela leswaku u phayona?
6 Loko Yesu a xiye leswaku Marta “a a rivatiwa hi ku tirha mintirho yo tala,” u ringanyete leswaku a a ta kuma mikateko leyikulu loko a a nga karhateki hi swilo swo tala. (Luka 10:40-42) Xana wena u nga olovisa ndlela leyi u hanyaka ha yona? Xana swa boha hakunene leswaku nuna na nsati va tirha havambirhi? Loko ko hleriwa hi ndlela yo karhi, xana ndyangu wu nga swi kota ku hanya hi mali ya muholo wa munhu un’we? Vo tala va vuyeriwile hi tlhelo ra moya hi ku endla mindzulamiso leyi va pfuneke leswaku va hlanganyela hi xitalo entirhweni wa nsimu.
7 Onge hinkwerhu ka hina hi nga landzela ntila lowu vekiweke hi Yesu ni vaapostola! Hi ta kuma mikateko ya Yehovha hakunene loko hi endla hinkwaswo leswi hi nga swi kotaka leswaku hi hlanganyela hi xitalo entirhweni wa nkoka wa ku chumayela mahungu lamanene ya Mfumo.—Luka 9:57-62.