Ntirho Lowu Hi Faneleke Hi Wu Rhangisa
1. Yesu u swi kombise njhani leswaku ntirho wo chumayela i wa nkoka eka yena?
1 Yesu a a rhangisa ntirho wo chumayela. A a tirha hi matimba naswona u fambe tikhilomitara ta madzana etikweni hinkwaro ra Palestina leswaku a chumayela vanhu vo tala hilaha a nga kotaka hakona. A a hanya vutomi byo olova leswaku a ta heta nkarhi wo tala a ri eku chumayeleni. (Mat. 8:20) Loko ntshungu wu ringeta ku n’wi sivela leswaku a nga fambi leswaku a ta ya emahlweni a hanyisa lava vabyaka, u te: “Ni le ka miti yin’wana ndzi fanele ku vula mahungu lamanene ya mfumo wa Xikwembu, hikuva hi swona leswi ndzi rhumeriweke swona.”—Luka 4:43.
2. Ha yini ntirho wo chumayela a wu ri wa nkoka eka Yesu?
2 Ha yini ntirho wo chumayela a wu ri wa nkoka eka Yesu? Xivangelo hileswi a a karhateka ngopfu hi ku kwetsimisiwa ka vito ra Xikwembu. (Mat. 6:9) Ndlela leyi a a n’wi rhandza ha yona Tata wakwe wa le tilweni yi n’wi susumetele ku endla ku rhandza Kakwe ni ku yingisa milawu Yakwe. (Yoh. 14:31) Ku tlula kwalaho, a a khathala hi vanhu naswona a a lava ku va pfuna.—Mat. 9:36, 37.
3. Hi nga swi kombisa njhani leswaku hi rhangisa ntirho wo chumayela?
3 Tekelela Yesu: Ku rhangisa ntirho wo chumayela hilaha Yesu a a endla hakona swi nga ha hi tikela hikuva misava leyi hi hanyaka eka yona yi hi dyela nkarhi naswona yi ni swikavanyeto swo tala. (Mat. 24:37-39; Luka 21:34) Kutani hi fanele hi tiyiseka hi swilo leswi nga swa nkoka swinene, nkarhi na nkarhi hi tinyika nkarhi wo lunghiselela ni ku hoxa xandla entirhweni wo chumayela. (Filp. 1:10) Hi fanele hi tlhela hi tikarhatela ku hanya vutomi byo olova naswona hi nga yi tirhisi hi xitalo misava leyi.—1 Kor. 7:31.
4. Ha yini swi ri swa nkoka ku xiya swilo leswi hi faneleke hi swi rhangisa sweswi?
4 Leswi nkarhi wu nga wutsongo, munhu wo tlhariha u ta rhangisa leswi nga swa nkoka. Hi xikombiso, loko a twa leswaku xidzedze lexi nga ni khombo xi kwala nyongeni, u ta tirhisa nkarhi ni matimba yakwe a ri karhi a endla malunghiselelo yo ponisa ndyangu wakwe ni ku lemukisa vaakelani vakwe. Leswi nga riki swa nkoka u ta hetelela ha swona. Nkarhi lowu nga sala leswaku ku fika xidzedze xa Armagedoni wu komile. (Sof. 1:14-16; 1 Kor. 7:29) Leswaku hi tiponisa swin’we ni lava hi yingisaka, hi fanele hi tikarhata loko hi dyondzisa naswona hi endla tano loko hi ri evandlheni niloko hi ri ensin’wini. (1 Tim. 4:16) Leswaku hi pona, hi fanele hi rhangisa ntirho wa hina wo chumayela!