Ntirho Wa Hina Lowukulu Tanihi Vakreste I Ku Chumayela
1 Hinkwerhu ka hina hi ni mintirho yo hambana-hambana leyi hi faneleke hi yi endla. Xikwembu xi langutele leswaku hi hlayisa mindyangu ya hina. (1 Tim. 5:8) Hambiswiritano, ntirho lowu katsekaka eku hetisiseni ka xiavelo lexi lexi humaka eka Xikwembu, a wu fanelanga wu va wa nkoka ku tlula ntirho wo chumayela hi Mfumo ni wo endla vadyondzisiwa.—Mat. 24:14; 28:19, 20.
2 Yesu u hi nyike ntila wo wu landzela, hi ku ‘lava mfumo ku sungula.’ (Mat. 6:33; 1 Pet. 2:21) Hambileswi a a nga ri na swilo swo tala leswi vonakaka, a a khomekile swinene eku endleni ka ku rhandza ka Tata wakwe. (Luka 4:43; 9:58; Yoh. 4:34) A a tikarhatela ku tirhisa nkarhi wun’wana ni wun’wana lowu a wu kumaka leswaku a chumayela. (Luka 23:43; 1 Tim. 6:13) U khutaze vadyondzisiwa va yena leswaku na vona va hisekela ntirho wo tshovela.—Mat. 9:37, 38.
3 Ku Tekelela Yesu Namuntlha: Hi nga tekelela xikombiso xa Yesu hi ku tikarhatela ku hanya vutomi byo olova, hi khomeka hi ntirho wa Vukreste. Loko hi ri na swona swilaveko swa vutomi, a hi yingiseni xitsundzuxo xa Bibele xa leswaku hi nga hambeti hi lava swilo leswi engetelekeke swa misava leyi. (Mat. 6:19, 20; 1 Tim. 6:8) Hakunene swa antswa ku lwela ku endla leswi engetelekeke entirhweni wo chumayela! Loko hi langutana ni swiyimo leswi tikaka, onge hi nga tikarhata hilaha Yesu a endleke ha kona, hi ku ka hi nga yi pfumeleli mivilelo ya vutomi leswaku yi va ya nkoka ku tlula ntirho wa hina lowukulu wo chumayela mahungu lamanene ya Mfumo.—Luka 8:14; 9:59-62.
4 Hambi lava va nga ni vutihlamuleri byo tala, va teka ntirho wo chumayela wu ri wa nkoka swinene. Makwerhu un’wana la nga ni ndyangu lowukulu, la nga ni ntirho wo tihanyisa naswona a nga nkulu evandlheni ra Vukreste u ri: “Ntirho wo chumayela ndzi wu teka wu ri ntirho wa mina wa nkoka.” Makwerhu wa xisati la nga phayona u ri: “Vuphayona i bya nkoka ku tlula ntirho lowunene wa ku tihanyisa.”
5 Onge hi nga tekelela xikombiso xa Yesu, ku nga khathariseki leswaku hi langutane ni swiyimo swa njhani. Hi nga xi tekelela hi ndlela yihi? Hi ku teka ntirho wa hina wa Vukreste wu ri wa nkoka.