Tekelela Kreste eNtirhweni Wa Wena Wo Chumayela

¹ Yesu u hi vekele xikombiso lexi hi faneleke hi xi landzela entirhweni wa hina wo chumayela. Ndlela leyi a rhandzaka Xikwembu ni vanhu ha yona u yi kombise ko tala naswona hi tindlela to tala. Lava titsongahataka u va dyondzise ntiyiso kasi lava xanisekaka u va kombe musa wa rirhandzu.—Mat. 9:35.

² Xikombiso Xa Yesu Ni Tidyondzo Ta Yena: Yesu a nga tikatsanga etimhakeni ta politiki kumbe a nghenelela eka matshalatshala ya vanhu lama nga vuliki nchumu, yo antswisa mahanyelo ya vona, kutani u swi kotile ku tshama a dzikise mianakanyo ya yena entirhweni wakwe wa nkoka. Nakambe a nga pfumelanga leswaku mintirho yin’wana leyi hi vuyona yi nga bihangiki yi n’wi kavanyeta. (Luka 8:1) A a ehleketa ntsena hi ku chumayela mahungu lamanene ya Mfumo wa Xikwembu tanihi wona ntsena ntlhantlho wa hilaha ku nga heriki wa swiphiqo swa vanhu. Yesu a a ri ni ntirho wa nkoka lowu a a fanele a wu endla hi nkarhi wutsongo. Loko vanhu va le Kapernawume va lava leswaku a tshama na vona, u byele vadyondzisiwa vakwe a ku: “A hi yeni kun’wanyana . . . leswaku ndzi ta chumayela na kona, hikuva ndzi hume hi xikongomelo xexo.”—Mar. 1:38.

³ Loko Yesu a hetile ku letela vadyondzisiwa vakwe u va lerise hi ku kongoma a ku: “Chumayelani, mi ku, ‘Mfumo wa matilo wu tshinele.’” (Mat. 10:7) U dyondzise valandzeri va yena leswaku rungula ra Mfumo hi rona ri faneleke ri va ra nkoka ngopfu evuton’wini bya vona. (Mat. 6:33) Leswi Yesu a swi byeleke vadyondzisiwa vakwe ro hetelela a nga si tlhandlukela etilweni swi swi veke erivaleni leswi a va fanele va sala va swi endla. U te: “Hikokwalaho fambani mi ya endla vanhu va matiko hinkwawo va va vadyondzisiwa.”—Mat. 28:19.

⁴ Mfumo I Wa Nkoka: Mhaka-nkulu leyi a yi ri enon’wini wa Yesu a ku ri Mfumo wa Xikwembu, naswona u khutaze vadyondzisiwa va yena leswaku va tekelela xikombiso xa yena. Matshalatshala ya vanhu yo tlhantlha swiphiqo swa vanhu a ma nge humeleli. (Yer. 10:23) I Mfumo wa Xikwembu ntsena lowu nga ta kwetsimisa vito ra Xikwembu wu tlhela wu ntshunxa vanhu hilaha ku nga heriki. (Mat. 6:9, 10) Ku dyondzisa ntiyiso wa Mfumo eka vanhu “lava va nga ni nhlomulo, lava va konyaka hikwalaho ka swilo hinkwaswo leswi nyenyetsaka leswi endliwaka” swi va pfuna leswaku va hanya hi ntsako, nileswaku swi va fambela kahle evuton’wini ni ku va va namarhela ntshembo wa xiviri wa vumundzuku.—Ezek. 9:4.

⁵ Yesu u ya emahlweni a hoxa xandla entirhweni wo chumayela mahungu lamanene ya Mfumo wa Xikwembu, naswona wa hi tiyisekisa leswaku u ta hi seketela. (Mat. 28:20) Xana ku chumayela ka hina ku fambisana njhani ni xikombiso lexi Yesu a hi vekeleke xona? (1 Pet. 2:21) Hinkwerhu a hi endleni hinkwaswo leswi hi nga swi kotaka leswaku hi xi namarhela swinene xikombiso lexi Yesu a hi vekeleke xona entirhweni wo chumayela emasikwini lawa yo hetelela lama xiyekaka!