Hi Timbhoni Nkarhi Hinkwawo
1. Hi nga dyondza yini emhakeni yo va Yesu a chumayele wansati exihlobyeni?
1 Yesu se a a hete tiawara ta mune a ri eku fambeni. A a karhele naswona a a ri ni torha. Loko vadyondzisiwa vakwe va ye eku xaveni ka swakudya, yena u fike a tshama exihlobyeni ehandle ka muti wa Samariya leswaku a wisa. Laha Samariya a nga telanga ku ta chumayela; o hundza hi kona hikuva a a kongome eGaleliya leswaku a ta ya emahlweni ni ntirho wakwe wo chumayela. Kambe loko a ha ri kwalaho, u chumayele wansati loyi a a te eku keni ka mati. (Yoh. 4:5-14) Ha yini a n’wi chumayerile? Xivangelo hileswi a a tshama a ri “mbhoni yo tshembeka ni ya ntiyiso” ya Yehovha. (Nhlav. 3:14) Hi tekelela Yesu hi ku va Timbhoni ta Yehovha nkarhi hinkwawo.—1 Pet. 2:21.
2. Hi nga tilunghiselela njhani leswaku hi ta kota ku chumayela hi xitshuketa?
2 Tilunghiselele: Hi nga lunghekela ku chumayela hi xitshuketa hi ku tshama hi ri ni minkandziyiso. Vahuweleri vo tala va tshama va ri ni swiphephana leswaku va ta swi fambisela vamatsalana va le switolo, vanhu lava tirhaka etindhawini to chela petirolo swin’we ni vanhu van’wana lava hlanganaka na vona siku rero. (Ekl. 11:6) Makwerhu un’wana wa xisati loyi a tshamaka a ri eku famba-fambeni u tshama a ri ni Bibele leyitsongo swin’we ni buku leyi nge Leswi Bibele Yi Swi Dyondzisaka enkwameni wakwe, naswona u tikarhatela ku sungula bulo ni vanhu lava nga tshama ekusuhi na yena.
3. Hi nga ri sungula njhani bulo?
3 Sungula Bulo: Loko hi chumayela hi xitshuketa, a swi bohi leswaku hi sungula bulo hi ku vulavula hi mhaka ya le Bibeleni. Loko Yesu a vulavula ni wansati exihlobyeni, a nga sungulanga hi ku n’wi byela leswaku hi yena Mesiya. U kombele mati eka yena, a endla leswaku wansati yoloye a navela ku bula na yena. (Yoh. 4:7-9) Makwerhu un’wana wa xisati na yena u xiye leswaku swa n’wi olovela ku sungula bulo loko a vutisiwa leswaku wa swi tsakela ku tlangela holideyi. Ematshan’weni yo vula leswaku a nga yi tlangeli hikwalaho ka leswi a nga un’wana wa Timbhoni ta Yehovha, u hlamula a ku, “Ndzi tiendlele xiboho xa leswaku ndzi nga yi tlangeli.” Minkarhi yo tala munhu loyi a nga n’wi vutisa naswona a lavaka ku tiva, u tala ku n’wi vutisa leswaku hikwalaho ka yini, naswona leswi swi nyika makwerhu yoloye nkarhi wo chumayela.
4. Matewu 28:18-20 yi ku khutaza ku endla yini?
4 Hambileswi Yesu a nga heta vutirheli byakwe bya laha misaveni lebyi a byi hisekela, wa ha katseka entirhweni wo chumayela lowu yaka emahlweni. (Mat. 28:18-20) Kutani ku fana na Yesu loyi a nga Xikombiso xa hina, hi Timbhoni leti tshamaka ti lunghekele ku nyikela xitiviso xa le rivaleni xa ripfumelo ra hina nkarhi wun’wana ni wun’wana.—Hev. 10:23.