Lavani Mfumo Wa Xikwembu Ku Sungula—Hi Ku Nyikela Magandzelo Yo Dzunisa Nkarhi Hinkwawo
1 Lava lavaka Mfumo ku sungula nkarhi hinkwawo va tsundzuka ku vulavula hi Yehovha ni ku byela van’wana hi Mfumo wa yena. (Ps. 145:11-13) Masiku hinkwawo ku ni malunghelo yo dzunisa vito ra yena ni ku vulavula hi mahungu lamanene. (Ps. 96:2) Ku dzunisa Yehovha a ku ri ntsako eka mupisalema la nga te: “Hi ta ḍunisa Šikwembu hi masiku hikwawo.” (Ps. 44:8) Loko hi titwa hi ndlela yoleyo, hi ta chivirikela ku hlanganyela hi xitalo evutirhelini bya Mfumo.
2 Yehovha a nga simekanga swilaveko swo karhi swa leswaku hi fanele ku heta nkarhi wo tanihi kwihi evutirhelini, kambe u hi khutaza leswaku hi n’wi dzunisa “masiku hinkwawo.” (Hev. 13:15) Loko swiyimo swa hina swi pfumela, hi fanele ku swi endla pakani ya hina ku heta nkarhi wo tala hi ri karhi hi dzunisa Yehovha vhiki rin’wana ni rin’wana. Lava ana se va endlaka tano va nga ha hlela swiyimo swa vona leswaku minkarhi yin’wana va tirha tanihi maphayona ya nkarhinyana kumbe va tshama va ri wona. Van’wana lava a va ri karhi va tiphina hi ntirho wa vuphayona bya nkarhinyana va nga swi kota ku tsarisa tanihi maphayona ya nkarhi hinkwawo.
3 Ku nga khathariseki leswaku swiyimo swa hina swa munhu hi xiyexe hi swihi, xana swi nga koteka leswaku hi ndlandlamuxa ntirho wa hina wa ku dzunisa? Ku hiseka swi susumetiwa hi ku tlangela. Dyondzo ya munhu hi xiyexe ya Rito ra Xikwembu yi kurisa ku tlangela. Minhlangano ya vandlha yi hi khutaza ku kombisa ku tlangela koloko hi tindlela leti tirhaka. Ku tihlanganisa ni vadzunisi van’wana lava hisekaka swi nga ‘hi susumetela ku endla mintirho leyinene.’ (Hev. 10:24) Loko hi ma tirhisa hi xitalo malunghiselelo lama endliwaka hi vandlha, hi nga kota ku ndlandlamuxa magandzelo ya hina yo dzunisa.
4 Ana, muprofeta wa xisati u veke xikombiso lexinene entirhweni wa Yehovha. Hambi leswi a a ri ni malembe ya 84 hi vukhale, “a nga suki eTempeleni, kambe a tirhela Hosi . . . vusiku ni nhlekanhi.” (Lk. 2:37) Ku hlanganyela kakwe hi moya-xiviri hinkwawo emintirhweni ya vandlha swi n’wi tisele ku eneriseka lokukulu ka munhu hi xiyexe. Mhaka ya Bibele ya ntirho wakwe wo tshembeka yi hi nyika xikhutazo namuntlha.
5 Pawulo u bumabumele leswaku lava “nga ni matimba, [va] fanele ku rhwala ku hluleka ka lava tsaneke.” (Rhom. 15:1) Kumbexana evandlheni ra ka n’wina ku ni lava va nga vuyeriwaka hi mpfuno ni xikhutazo xa wena xa tintswalo. Ku va rhamba leswaku va famba na wena evutirhelini bya nsimu ku nga ha va swona leswi lavekaka. Muhuweleri a nga ha lava xo famba kumbe un’wana wo tirha na yena. Un’wana a nga ha va ni xiphiqo xa ku hela matimba, naswona u nga ha n’wi nyika nseketelo lowu akaka ni lowu lavekaka leswaku a ta pfuxeta ku hiseka kakwe entirhweni wa Mfumo. (1 Tes. 5:14) Ku tiyimisela ka wena ku “pambulela vahlawuriwa va Xikwembu loko va pfumala” ku kombisa ku navela ka wena loku humaka embilwini ko ndlandlamuxa ku dzunisa vito ra Yehovha.—Rhom. 12:13.
6 A hi nge swi koti ku longoloxa swilo hinkwaswo leswi Yehovha a nga hi endlela swona ni leswi a nga ta hi endlela swona enkarhini lowu taka. Ku hava ndlela leyi hi nga n’wi hakelaka ha yona hikwalaho ka mikateko leyi. Mawaku swivangelo swa matimba swonghasi leswi nga kona swa leswaku ‘leswi hefemulaka hinkwaswo swi dzunisa Yehovha’!—Ps. 150:6.