Lowu Hi Wona Nkarhi
1 Loko muapostola Pawulo a tsala papila ra yena ra vumbirhi ro ya eka Vakorinto, u va tsundzuxe leswaku va tinyiketela ku endlela vapfumeri-kulobye va le Yerusalema ntirho lowunene wo phalala. Hambi swi ri tano, lembe se a ri herile, naswona a va nga si heta ntirho lowu va wu sunguleke. Kutani u va khutaze a ku: “Fambani mi ya wu hetisa: tiyimiseleni ku hetisa xiavelo lexi hi laha mi xi amukeleke ha kona.”—2 Kor. 8:11, The New English Bible.
2 Hi nkarhi wo karhi, hinkwerhu ka hina hi tshama hi tivekela tipakani. Hi nga ha va hi kunguhate ku ndlandlamuxa ku hlanganyela ka hina evutirhelini bya nsimu, ku tivana kahle ni vamakwerhu, ku fanelekela lunghelo ra ntirho kumbe ku hlula ku tsana ko karhi. Hambi loko hi sungule hi ri ni makungu lamanene, hi nga ha va hi nga hisekeli ku fikelela pakani ya hina. Handle ko swi xiya, ku nga ha va ku hundze mavhiki, tin’hweti hambi ku ri malembe hi nga si endla nhluvuko. Xana ku nga ha laveka leswaku hi tirhisa ndzayo leyi nge hi ‘famba hi ya hetisa’ leswi hi swi sunguleke?
3 Ku Fikelela Tipakani Ta Hina: Swa olova ku tiendlela tipakani kambe ku ti fikelela a swi olovi. Xinamu xi nga sivela nhluvuko lowu nga vaka kona. Hi fanele ku endla swiboho kutani hi tiyimisela ku ya emahlweni handle ko dya nkarhi. Ku hleleka ka munhu hi yexe ka pfuna. I swa nkoka ku vekela nkarhi lowu lavekaka wo endla ntirho lowu etlhelo ni ku tiyiseka leswaku nkarhi lowu wu tirhiseriwa xikongomelo xexo. I swinene ku tivekela pakani kutani hi tiboha leswaku hi fikelela pakani yoleyo.
4 Loko swi hi tikela ku fikelela tipakani ta hina, swa olova ku vula leswaku: ‘Ndzi ta vuya ndzi swi vona.’ Kambe a hi swi tivi leswi nga ta humelela mundzuku. Swivuriso 27:1 yi ri: “U nga tiḍunisi hi siku ra munḍuku, hikuv̌a a ku tiv̌i le’ŝi nga ta humelela hi siku rero.” Mudyondzisiwa Yakobo u tsundzuxe hi ku tshemba ngopfu swilo swa nkarhi lowu taka hikuva “swa mundzuku a [hi] swi tivi! . . . Munhu loyi a tivaka leswo lulama leswi a fanelaka ku swi endla, kambe a nga swi endli, i mudyohi.”—Yak. 4:13-17.
5 Hikwalaho ka swikavanyeto swo tala ni leswi van’wana va lavaka leswaku hi swi endla, tipakani ta hina ti nga kavanyeteka. Ku laveka vuxiya-xiya leswaku hi ta tshama hi ti tsundzuka. Ku khongela hi mhaka leyi swa pfuna. Ku kombela van’wana lava hi va toloveleke leswaku va hi tsundzuxa ni ku hi khutaza swi nga pfuna. Ku veka mfungho ekhalendarini ya hina swi nga hi pfuna leswaku hi kambela nhluvuko wa hina. Munhu u fanele ku tiyimisela ku “nyik[a] hilaha a pimaniseke hakona embilwini ya yena.”—2 Kor. 9:7.
6 N’hweti ya October yi nyikela nkarhi lowunene wo veka mianakanyo ya hina eka tipakani ta hina. Hi ta va hi fambisa swikhokhelo swa Xihondzo xo Rindza ni Xalamuka! Xana hi nga veka tipakani leti olovaka leswaku hi ti fikelela? Ku vuriwa yini hi ku ringeta ku ndlandlamuxa ku fambisa ka hina timagazini? Ku kunguhata ku endla maendzo yo tala yo vuyela ni ku sungula dyondzo leyintshwa ya Bibele ku nga va tipakani letinene eka vo tala.
7 A hi vutlharhi ku bakanyela swilo swa nkoka etlhelo, hikuva “misava ya hundza.” (1 Yoh. 2:17) Malunghelo ni mikateko yo hlawuleka entirhweni wa Yehovha swa kumeka eka hina sweswi. Swi le ka hina leswaku hi ma tirhisa hi ndlela leyinene.