Vantshwa Va Vutisa

Ndzi Nga Ti Fikelela Njhani Tipakani Ta Mina?

HI TIHI tipakani leti u nga tsakelaka ku va na tona eka leti landzelaka?

● Ku titshemba

● Ku va ni vanghana vo tala

● Ku va ni ntsako lowukulu

Entiyisweni, u nga va na tona hinkwato ka tona! Njhani? Hi ku tivekela tipakani ni ku ti fikelela. Kambisisa tipakani leti landzelaka.

Ku titshemba Loko u tivekela tipakani letitsongo ni leti fikelelekaka, u ta va ni xivindzi xo tivekela tipakani letikulu. U ta tlhela u titshemba loko u langutana ni swiphiqo swa siku ni siku swo fana ni ntshikilelo wa tintangha. Eku heteleleni, van’wana va nga ha xiya ku tiyimisela ka wena kutani va ku xixima hikwalaho ka sweswo. Van’wana va nga ha tshika ku ku tshikilela. Entiyisweni, va nga ha sungula ku ku rhandza.—Ringanisa Matewu 5:14-16.

Ku va ni vanghana vo tala Vanhu va swi rhandza ku tshama ni lava tivekelaka tipakani, lava tivaka leswi va swi lavaka naswona va tiyimiseleke ku tirha hi matimba leswaku va swi kuma. Nakambe loko vanhu va lava ku tihlanganisa na wena hikwalaho ka tipakani ta wena, hi vona lava talaka ku ku pfuna leswaku u fikelela tipakani teto.—Eklesiasta 4:9, 10.

Ku va ni ntsako lowukulu I ntiyiso leswaku a swi tsakisi ku tshama u nyangatsekile kumbe u nga swi tivi leswi u nga swi endlaka hi vutomi bya wena. Kasi loko u tivekele tipakani naswona u kota ku ti fikelela, wa tsaka swinene. Hi yona mhaka leyi muapostola Pawulo, Mukreste un’wana wa lembe-xidzana ro sungula, a tshameke a ku: “A ndzi tsutsumi muhula-hula.” (1 Vakorinto 9:26, Bibele—Mahungu Lamanene) Naswona tsundzuka leswaku loko u tivekele pakani leyikulu, u tsaka ni swikunwana loko u yi fikelerile!

Xana u swi lunghekerile ku tivekela tipakani? Tsema tluka leri kutani u ri petsela exineneni ivi u landzela magoza lama boxiweke.a

Swihloko swin’wana leswi nge “Vantshwa Va Vutisa” swi kumeka eka Website leyi nge www.watchtower.org/ype

[Nhlamuselo ya le hansi]

SWIVUTISO SWO ANAKANYISISA HA SWONA

● Xana swa koteka ku tivekela tipakani to tala hi nkarhi wun’we?—Vafilipiya 1:10.

● Xana ku tivekela tipakani swi vula leswaku u hlela nkarhi wun’wana ni wun’wana lowu u nga na wona?—Vafilipiya 4:5.

[Bokisi/Swifaniso leswi nga eka tluka 25, 26]

Ndlela yo fikelela tipakani ta wena

TITSALE Swivuriso 4:25, 26 1

“U nga chavi ku tivekela tipakani letikulu. Loko van’wana va tshame va ti fikelela, na wena u nga ti fikelela.”—Roben.

1. Ehleketa hi tipakani leti u nga tivekelaka tona. Tiphine hi ku ehleketa hi tipakani ta wena! Namba u tsala to tala hilaha u nga kotaka hakona. Ringeta ku tsala tipakani ta kwalomu ka 10 kumbe 20.

2. Kambisisa tipakani ta wena. Hi tihi tipakani leti tikombaka ti tsakisa swinene? Hi tihi leti tikombaka ti tika swinene? Hi tihi leti u nga swi tsakelaka ngopfu ku ti fikelela? Tsundzuka leswaku tipakani letinene hi leti ku khumbaka swinene.

3. Rhangisa swilo leswi nga swa nkoka ngopfu. Rhanga u hlawula tipakani tin’wana leti u nga ta ti fikelela eka masiku ma nga ri mangani. Kutani hlawula tipakani leti tekaka nkarhi wo leha (leti u nga kotaka ku ti fikelela eka mavhiki kumbe tin’hweti ti nga ri tingani). Tsala tipakani ta wena hi ku landzelelana ka tona hilaha u lavaka ku ti fikelela hakona.

Xikombiso Xa Tipakani Leti U Nga Tivekelaka Tona

Xinghana Vana ni munghana loyi u nga ringaniki na yena. Pfuxeta vunghana bya khale.

Rihanyo Endla vutiolori lebyi tekaka 90 wa timinete vhiki na vhiki. Etlela tiawara ta nhungu siku na siku.

Xikolo Antswisa timaraka ta wena eka tinhlayo. Lwisana ni nkucetelo wa swichudeni wo ku yenga leswaku u kopela loko u tsala xikambelo.

Vukhongeri Hlaya Bibele timinete ta 15 siku ni siku. Byela swichudeni-kuloni hi vukhongeri bya wena vhiki leri.

Hlela Swivuriso 21:5 2

“Swa tsakisa ku tivekela tipakani, kambe u fanele u tlhela u hlela ndlela leyi u nga ta ti fikelela ha yona. Hikuva loko u nga endli tano, u ta tshama u ri ni tipakani kambe u nge ti fikeleli.”—Derrick.

Eka pakani ha yin’we leyi u yi hlawuleke, endla leswi landzelaka:

1. Longoloxa tipakani ta wena.

2. Tivekele nkarhi lowu u nga ta ti fikelela ha wona. Phela, ku tivekela pakani leyi u nga tiviki leswaku u ta yi fikelela rini, ko va norho ntsena!

3. Hlela magoza lama katsekaka.

4. Lunghekela swihinga leswi nga vaka kona. Kutani u ehleketa hi ndlela leyi u nga ta swi hlula ha yona.

5. Tibohe. Tibyele leswaku u ta endla hinkwaswo leswi u nga swi kotaka leswaku u fikelela pakani leyi. Kutani sayina xiboho xexo u tlhela u tsala siku ra kona.

Dyondza Xipaniya leswaku ndzi ta xi vulavula loko ndzi endzela eMexico July 1

Magoza

1. Kuma buku leyi dyondzisaka ku vulavula ririmi rero.

2. Dyondza khume wa marito lamantshwa vhiki ni vhiki.

3. Yingisela vanhu lava vulavulaka Xipaniya.

4. Kombela un’wana leswaku a lulamisa mavulavulelo ni mavitanelo ya wena ya marito.

Swihinga leswi nga ha vaka kona

Ku hava munhu la vulavulaka Xipaniya la tshamaka ekusuhi na mina.

Ndlela leyi ndzi nga swi hlulaka ha yona

Kopa minkandziyiso leyi rhekhodiweke ya Xipaniya eka website leyi nge www.jw.org.

․․․․․ ․․․․․

Nsayino Siku

Teka Goza! Yohane 13:17 3

“U nga kavanyeteka hi ku olova ivi u rivala tipakani ta wena, kutani tshamela ku ehleketa ha tona ni ku tikarhatela ku ti fikelela.”—Erika.

Sungula sweswi. Tivutise, ‘I yini leswi ndzi nga swi endlaka namuntlha leswaku ndzi sungula ku lwela ku fikelela pakani ya mina?’ I ntiyiso leswaku swi nga ha endleka u nga hlelanga swilo hinkwaswo leswi katsekaka, kambe u nga swi pfumeleli sweswo swi ku tshikisa ku sungula ku lwela ku yi fikelela. Hilaha Bibele yi vulaka hakona, “loyi a langutaka mheho a nge byali mbewu; naswona loyi a langutaka mapapa a nge tshoveli.” (Eklesiasta 11:4) Kuma nchumu lowu u nga wu endlaka namuntlha—hambi loko wu ri wutsongo—kutani u wu endla.

Kambisisa tipakani ta wena siku ni siku. Titsundzuxe leswaku ha yini hinkwato ka tona ti ri ta nkoka eka wena. Xiyisisa nhluvuko wa wena hi ku fungha ✔ (kumbe u tsala leswaku u yi fikelele hi nkarhi lowu vekiweke) etlhelo ka goza ha rin’we loko u ri heta.

Fambisana ni swiyimo. Ku nga khathariseki leswaku tipakani ta wena ti kahle ku fikela kwihi, ti nga ha lava ku antswisiwa loko u ri karhi u lwela ku ti fikelela. Sweswo a swi bihanga. U nga vilerisiwi hileswaku u fanele u namarhela swinene swilo leswi u swi hleleke. Yana emahlweni u endla nhluvuko leswaku u hetelela u fikelele pakani ya wena.

Vona tipakani ta wena hi mahlo ya mianakanyo. Tiehlekete se u fikelele pakani ya wena. Tiehlekete u ri karhi u tsaka hileswi u koteke ku yi fikelela. Kutani tlhela u ehleketa hi magoza hinkwawo naswona u ma kambisisa ha rin’we rin’we. Kutani tiehlekete u ri karhi u sungula ku teka goza ro yi fikelela. Tivone hi mahlo ya mianakanyo u heta goza ha rin’we naswona ehleketa hi ntsako lowu u nga ta va na wona loko u fikelela pakani ya wena. Sweswi teka goza ro yi fikelela!

[Xifaniso]

Tipakani ti fana ni makungu—swi lava leswaku u tirha hi matimba leswaku ma hetiseka!

[Bokisi/Swifaniso leswi nga eka tluka 25]

LESWI TINTANGHA TA WENA TI SWI VULAKA 4

“Swa olova ku hela matimba loko u nga ri na nchumu lowu u wu languteleke hi mahlo-ngati leswaku wu endleka. Kambe loko u tivekela tipakani u tlhela u ti fikelela, wa tsaka swinene.”—Reed.

“U nga titeki u ri xikangalafula loko u tsandzeke ku fikelela pakani ya wena hi ku helela kumbe hi nkarhi lowu a wu tivekele wona. Sweswo swi nge ku pfuni. Tshamela ku ringeta!”—Cori.

“Vulavula ni vanhu lava se va fikeleleke tipakani leti u tivekeleke tona. Va nga ku khutaza ni ku ku nyika swiringanyeto leswi pfunaka. Nakambe byela ndyangu wa ka n’wina hi tipakani leti u tivekeleke tona leswaku va ta ku seketela.”—Julia.

[Dayagramu leyi nga eka tluka 24]

(Leswaku u vona rungula leri hleriweke hi ku helela, vona nkandziyiso wa kona)

Tsema

Petsa