Ndzima 39

Ndzi Nga Ti Fikelela Njhani Tipakani Ta Mina?

Eka swilo leswi landzelaka hi swihi leswi u nga tsakelaka ku va na swona?

□ Ku titshemba swinene

□ Ku va ni vanghana vo tala

□ Ku va ni ntsako lowukulu

ENTIYISWENI, u nga swi kuma swilo leswi haswinharhu! Njhani? Hi ku tivekela tipakani ni ku ti fikelela. Xiya leswi landzelaka:

Ku titshemba swinene. Loko u tivekela tipakani letitsongo kutani u ti fikelela, u ta va ni xivindzi xo tivekela tipakani letikulu. U ta tlhela u titshemba swinene loko u langutana ni swiphiqo swa siku ni siku—ku fana ni loko u langutane ni ntshikilelo wa tintangha.

Ku va ni vanghana vo tala. Vanhu va swi rhandza ku tshama ni vanhu lava tivekelaka tipakani—vanhu lava tivaka leswi va swi lavaka naswona va tiyimiseleke ku tirha hi matimba leswaku va swi kuma.

Ku va ni ntsako lowukulu. I ntiyiso leswaku a swi tsakisi ku tshama u phirhekile kumbe u hele matimba hi leswi u nga ni ntshembo wa leswaku siku rin’wana ku ta humelela nchumu lowu tsakisaka evuton’wini bya wena. Kasi loko u tivekele tipakani naswona u ti fikelela, wa tsaka swinene. Xana se u swi lunghekerile ku tivekela tipakani? Matluka lama landzelaka ma ta ku pfuna leswaku u endla tano!a

✔ 1 TSALA EHANSI

1. Ehleketa hi tipakani leti u nga tivekelaka tona. Tiphine hi goza leri! U nga ti kambisisi; namba u tsala tipakani to tala hilaha u nga kotaka hakona. Ringeta ku tsala tipakani ta kwalomu ka 10.

2. Kambisisa tipakani ta wena. Hi tihi tipakani leti ti kombaka ti tsakisa swinene? Hi tihi leti tikombaka ti tika swinene? Hi tihi leti u nga tibumaka loko wo ti fikelela? Tsundzuka leswaku tipakani letinene hi leti nga ta nkoka swinene eka wena.

3. Rhangisa swilo leswi nga swa nkoka ngopfu. Tsala tipakani ta wena hi ku landzelelana ka tona hilaha u lavaka ku ti fikelela hakona.

✔ 2 HLELA

Eka pakani ha yin’we leyi u yi hlawuleke, endla leswi landzelaka:

Tsala pakani ya wena.

Ku dyondza Xipaniya leswaku ndzi ta xi vulavula loko ndzi endzela eMexico

Tivekele nkarhi lowu u nga ta yi fikelela ha wona. Phela, ku tivekela pakani leyi u nga tiviki leswaku u ta yi fikelela rini, ko va norho ntsena!

July 1

Hlela magoza lama katsekaka.

Magoza

1. Ku kuma buku leyi nga ni swiga leswi hundzuluxeriweke swa ririmi rero.

2. Ku dyondza khume wa marito lamantshwa vhiki ni vhiki.

3. Ku yingisela vanhu lava vulavulaka Xipaniya.

4. Ku kombela un’wana leswaku a lulamisa mavulavulelo ni mavitanelo ya mina ya marito.

Lunghekela ku langutana ni swihinga leswi nga ha vaka kona. Kutani ehleketa hi ndlela leyi u nga ta swi hlula ha yona.

Swihinga leswi nga ha vaka kona

Ku hava munhu la vulavulaka Xipaniya la tshamaka ekusuhi na mina

Tibohe. Tibyele leswaku u ta endla hinkwaswo leswi u nga swi kotaka leswaku u fikelela pakani leyi. Kutani sayina u tlhela u tsala siku ra kona.

Ndlela leyi ndzi nga swi hlulaka ha yona

Kopa minkandziyiso leyi rhekhodiweke ya Xipaniya eka Web site leyi nge www.jw.org.

․․․․․

Vito Siku

✔ 3 TEKA GOZA!

U nga ha yimayimi. Tivutise, ‘Ndzi nga endla yini namuntlha leswaku ndzi sungula ku fikelela pakani ya mina?’ I ntiyiso leswaku swi nga ha endleka u nga tsalanga vuxokoxoko hinkwabyo, kambe u nga swi pfumeleli sweswo swi ku tshikisa ku sungula ku lwela ku yi fikelela. Hilaha Bibele yi vulaka hakona, “loko wo rindza ku kondza mheho ni maxelo swi va swinene, a wu nge byali nchumu naswona a wu nge tshoveli.” (Eklesiasta 11:4, Today’s English Version) Kuma nchumu lowu u nga wu endlaka namuntlha—hambi loko wu ri wutsongo—kutani u wu endla.

Kambisisa tipakani ta wena siku ni siku. Titsundzuxe leswaku ha yini hinkwato ka tona ti ri ta nkoka eka wena. Xiyisisa nhluvuko wa wena hi ku fungha hi ✔ (kumbe u tsala siku leri u yi fikeleleke ha rona) etlhelo ka pakani ha yin’we loko u yi fikelela.

Vona tipakani ta wena hi mahlo ya mianakanyo. Tiehlekete se u fikelele pakani ya wena. Tiehlekete u ri karhi u tsaka hileswi u koteke ku yi fikelela. Kutani tlhela u ehleketa hi goza ha rin’we naswona u ri vona hi mahlo ya mianakanyo. Eku heteleleni, tiehlekete se u fikelele goza ha rin’we naswona ehleketa hi ntsako lowu u nga ta va na wona loko u fikelela pakani ya wena. Sweswi teka goza ro yi fikelela!

[Nhlamuselo ya le hansi]

MATSALWA

“Kunene makungu ya lava va gingiritekaka ma endla leswi pfunaka.”—Swivuriso 21:5.

XITSUNDZUXO

U nga vilerisiwi hileswaku u fanele u namarhela swinene eka leswi u swi hleleke. Pfumelelana ni swiyimo naswona u antswisa leswi lavaka ku antswisiwa loko u ri karhi u lwela ku fikelela pakani ya wena.

XANA A WU SWI TIVA LESWAKU . . . ?

Loko u tivekele pakani leyikulu, u ta tsaka swinene loko u yi fikelerile!

U NGA KU YINI?

● Xana swa koteka ku tivekela tipakani to tala hi nkarhi wun’we?—Vafilipiya 1:10.

● Xana ku tivekela tipakani swi vula ku hlela nkarhi wun’wana ni wun’wana lowu u nga na wona evuton’wini bya wena?—Vafilipiya 4:5.

[Marito lama tshahiweke exihlokweni lama nga eka tluka 283]

“Swa olova ku hela matimba loko u nga ri na nchumu lowu u wu languteleke hi mahlo-ngati leswaku wu endleka. Kambe loko u tivekela tipakani u tlhela u ti fikelela, wa tsaka swinene.”—Reed

[Bokisi/Xifaniso lexi nga eka tluka 283]

Xikombiso Xa Tipakani Leti U Nga Tivekelaka Tona

Vunghana Ku kuma munghana la ndzi tlulaka hi malembe. Ku pfuxeta vunghana bya khale.

Rihanyo Ku endla vutiolori lebyi tekaka kwalomu ka 90 wa timinete vhiki na vhiki. Ku etlela tiawara ta nhungu siku ni siku.

Xikolo Ku antswisa timaraka ta mina eka tinhlayo. Ku lwisana ni ntshikilelo wa swichudeni swin’wana loko swi ku kucetela ku endla swilo swo biha.

Vumoya Ku hlaya Bibele timinete ta 15 siku ni siku. Ku byela xichudeni-kulorhi hi vukhongeri bya mina vhiki leri.

[Xifaniso lexi nga eka matluka 284, 285]

Tipakani ti fana ni tipulani—swi lava u tirha hi matimba leswaku u hetisisa leswi nga eka tipulani