Ndlela Yo Fikelela Tipakani Ta Wena Ta Moya
1. Hi tihi tipakani ta moya leti vantshwa vo tala lava nga Vakreste va nga na tona?
1 Tanihi muntshwa la nga Mukreste, a swi kanakanisi leswaku loko u tivekela tipakani evuton’wini u va u susumetiwa hi ku rhandza ka wena Yehovha ni hi marito ya Yesu lama a ma kongomiseke eka Vakreste hinkwavo, ku nga ku ‘lava mfumo ku sungula.’ (Mat. 6:33) Pakani ya wena ku nga ha va ku ri ku ndlandlamuxa ntirho wa wena wa nsimu hi ku va phayona kumbe ku ya chumayela laha ku nga ni xilaveko lexikulu xa vahuweleri va Mfumo. Van’wana va nga ha ehleketa hi ku ya aka Tiholo ta Mfumo, ku tirha erhavini kumbe ku va murhumiwa. Hakunene, leti i tipakani leti enerisaka naswona ta bumabumeriwa!
2. I yini leswi nga ku pfunaka ku fikelela tipakani ta wena ta moya?
2 Lexi nga ku pfunaka ku fikelela tipakani ta wena ta moya i ku va u ti tsala ehansi. Xihondzo xo Rindza xa July 15, 2004, xi te: “Nchumu lowu rharhanganeke wa olova loko [u wu hlamusela] hi marito lamanene. Hikwalaho, swi nga va swinene leswaku tipakani ta [wena] ni ndlela leyi [u] nga ta ti fikelela ha yona, [u] swi tsala ehansi.” Ku engetela kwalaho, tipakani leti hatlaka ti fikeleleka ti nga ku pfuna ku vona nhluvuko wa wena ni ku tshama u ri karhi u anakanya hi ku fikelela pakani leyi nga ta teka nkarhi wo leha.
3. Boxa tin’wana ta tipakani ta nkarhi wo koma leti nga pfunaka munhu leswaku a fanelekela ku khuvuriwa.
3 Tipakani Ta Nkarhi Wo Koma: Loko u nga si khuvuriwa, kambisisa leswi u faneleke u swi endla leswaku u ta fikelela pakani yoleyo. Nkarhi wun’wana swi nga ha lava leswaku u twisisa tidyondzo ta Bibele ta xisekelo. Loko swi ri tano, tivekele pakani yo yi dyondza hi vuenti buku leyi nge Leswi Bibele Yi Swi Dyondzisaka, u hlaya ni matsalwa hinkwawo lama kombisiweke. (1 Tim. 4:15) Tivekele ni pakani yo hlaya Bibele hinkwayo ku suka eka Genesa ku ya ka Nhlavutelo, hilaha swirho swa le Bethele ni swichudeni swa Giliyadi swi faneleke swi endla hakona. Endzhaku ka sweswo, va na ni xiyimiso xo hlaya Bibele siku ni siku. (Ps. 1:2, 3) Anakanya ndlela leyi sweswo swi nga ta ku pfuna ha yona leswaku u kula emoyeni! Sungula u tlhela u gimeta ku hlaya Bibele ni dyondzo ya wena n’wini hi xikhongelo lexi humaka embilwini, naswona minkarhi hinkwayo ringeta ku tirhisa leswi u swi dyondzaka.—Yak. 1:25.
4. Hi tihi tipakani ta nkarhi wo koma leti Mukreste a nga tivekelaka tona naswona hi hala tlhelo a ri ni pakani leyi nga ta teka nkarhi wo leha yo ya tirha eBethele kumbe ku va murhumiwa?
4 Loko se u khuvuriwile, hi tihi tipakani tin’wana leti u nga ti fikelelaka? Xana u fanele u antswisa ndlela leyi u chumayelaka ha yona? Hi xikombiso, xana u nga tivekela pakani yo va ni vutshila byo tirhisa Rito ra Xikwembu ensin’wini? (2 Tim. 2:15) Xana u nga wu ndlandlamuxa njhani ntirho wa wena wa nsimu? Tivekele tipakani ta nkarhi wo koma hi ku ya hi malembe ya wena swin’we ni swiyimo swa wena, kutani sweswo swi ta ku pfuna ku fikelela tipakani ta wena leti nga ta teka nkarhi wo leha.
5. Ku tivekela tipakani ta nkarhi wo koma swi n’wi pfune njhani makwerhu un’wana leswaku a kota ku fikelela pakani yakwe yo ya tirha eBethele?
5 Ntokoto Lowu Tsakisaka: Loko Tony la nga ni malembe ya 19 hi vukhale a endzele rhavi ra Timbhoni ta Yehovha, u sungule ku navela ku ya tirha eBethele. Kambe a a tihanyela hi ndlela leyi nga tivikaniki naswona a a nga si tinyiketela eka Xikwembu. Tony u endle xiboho xa ku va a hanya hi ku pfumelelana ni tindlela ta Yehovha, a tivekela pakani yo fanelekela ku khuvuriwa. Endzhaku ko fikelela pakani yoleyo u ve phayona ra nkarhinyana ivi endzhakunyana a va ra nkarhi hinkwawo, naswona masiku lawa a a lava ku sungula ha wona a a ma funghe ekhalendarini yakwe. Wa nga ehleketa ntsako lowu a a ri na wona, loko endzhaku ko phayona nkarhi wo karhi va n’wi rhamba ku ta tirha eBethele!
6. I yini leswi nga ku pfunaka ku fikelela tipakani ta wena ta moya?
6 Na wena u nga swi kota ku fikelela tipakani ta wena ta moya loko u rhangisa timhaka ta Mfumo. Khongela eka Yehovha u n’wi phofulela “mintirho ya wena” u tlhela u tikarhatela ku yi fikelela.—Swiv. 16:3; 21:5.