Vantshwa—Hi Tihi Tipakani Ta N’wina Ta Moya?

¹ Yehovha wa swi tiva leswaku ntirho lowu nga ni xikongomelo i wa nkoka hi ndlela yihi ni leswaku tipakani leti nga tona leti nga fikeleriwaka ti tisa ntsako. (Vona Genesa 1:28; 2:15, 19.) Namuntlha, Yehovha u nyike vanhu vakwe ntirho wo chumayela ni wa ku dyondzisa. Na hina hi langutele pakani yo hetelela ya ku kuma vutomi lebyi nga heriki eParadeyisini. Enkarhini lowu fanaka, hi fanele hi tivekela tipakani ta moya leti endlaka nhluvuko loko hi lava ku papalata ku tirhisa matimba ni rifuwo ra hina hi ndlela leyi nga fanelangiki.—1 Kor. 9:26.

² Tipakani Ta Xiviri Ta Vantshwa: Vantshwa va fanele va va ni tipakani ta swa le tilweni leti va nga kotaka ku ti fikelela hi ku ya hi vuswikoti bya vona. (1 Tim. 4:15) Vana van’wana lavatsongo swinene va fikelele pakani ya ku nhlokohata tibuku ta Bibele hambiloko va nga si kota ku hlaya. Hi ku pfuniwa hi dyondzo ya ndyangu, vana va dyondza ku lunghiselela minhlangano leswaku va ta fikelela tipakani to nyikela tinhlamulo leti twalaka ni ku tsarisela Xikolo xa Vutirheli bya le Tilweni. Loko vana va famba ni vatswari va vona entirhweni wa nsimu, va dyondza ku va ni xiphemu eku nyikeleni ka vumbhoni loko va ri karhi va endla nhluvuko ku fikela laha va vaka vahuweleri lava nga khuvuriwangiki. Vatswari va fanele va kandziyisa pakani ya ku tinyiketela ni nkhuvulo eka vana va vona.

³ Loko u ri n’wana wa kondlo-a-ndzi-dyi, xana tipakani ta wena ta moya ti katsa yini? “Anakanya Muv̌umbi wa wena” hi ku yisa nyingiso eka tipakani ta nkoka evuton’wini. (Ekl. 12:1; Ps. 71:17) Ha yini u nga ngheneli ntirho wa vuphayona bya nkarhinyana etin’hwetini ta ku pfala ka xikolo? Xana u tshama u anakanya hi ku nghenela vutirheli bya nkarhi hinkwawo tanihi phayona ra nkarhi hinkwawo? Ha yini u nga dyondzi ririmi rimbe leswaku enkarhini lowu taka u ta pfuna ntlawa kumbe vandlha leri vulavulaka ririmi rimbe endhawini ya ka n’wina kumbe kun’wana? Vo tala lava sweswi va tirhaka eBethele kumbe tanihi valanguteri lava famba-fambaka kumbe varhumiwa va tivekele ntirho wo hlawuleka wa nkarhi hinkwawo tanihi tipakani ta vona loko va ha ri exikolweni. Ha yini u nga endli nchumu lowu fanaka na wena?

⁴ Loko wa ha ri ntsongo, lwela ku tekelela xikombiso xa Yesu. Hambiloko a ha ri n’wana wa malembe ya 12, u vulavule hi ku ntshunxeka hi timhaka ta moya. (Lk. 2:42-49, 52) Ku tivekela tipakani leti vuyerisaka hi ku va ni dyondzo ya munhu hi xiyexe, ku hlaya Bibele siku na siku, ni ku hlanganyela nkarhi na nkarhi ni Vakreste lava vupfeke eminhlanganweni ni le nsin’wini swi ta ku pfuna leswaku u kuma vutshila byo dyondzisa van’wana hi ta Mfumo wa Xikwembu hilaha Yesu a endleke hakona.