Tivekele Tipakani Ta Moya
1 Ku dzunisa Yehovha hilaha ku nga heriki ri ta va lunghelo lerikulu swonghasi! Leswaku hi kota ku n’wi dzunisa hi ndlela yoleyo, hi nga tivekela tipakani ta moya enkarhini wa vutomi bya sweswi kutani hi lwela ku ti fikelela. Sweswo swi nga hi pfuna ku tirhisa matimba ya hina hi vutlhari. (1 Kor. 9:26) Hi tihi tipakani leti wena u nga tivekelaka tona?
2 Dyondzo Ya Bibele: Xana u lunghiselela minhlangano hinkwayo ya vandlha? Loko swi ri tano, xana u tinyika nkarhi wa ku endla vulavisisi ni ku anakanyisisa hi leswi u swi dyondzeke? Hi xikombiso, loko u lunghiselela Dyondzo ya Xihondzo xo Rindza ya vhiki na vhiki kun’we ni Dyondzo ya Buku ya Vandlha, xana wo khwatihata tinhlamulo ntsena kumbe, xana u hlaya ni matsalwa lama kombisiweke u tlhela u anakanyisisa hi swivangelo swa tinhlamulo leti nyikeriweke? Xana u nga tivekela pakani yo endla vulavisisi malunghana ni tinhla ti nga ri tingani vhiki ni vhiki loko u hlaya Bibele hi ku fambisana ni xiyimiso xa Xikolo xa Vutirheli bya le Tilweni? Ku endla vulavisisi byo tano bya timhaka ta moya swi lava nkarhi ni ku tikarhata, kambe swa vuyerisa swinene.—Swiv. 2:4, 5.
3 Minhlangano Ya Vandlha: Pakani yin’wana i ku va kona nkarhi na nkarhi eminhlanganweni hinkwayo ya ntlhanu ya vandlha. Ku fika ka ha ri na nkarhi leswaku hi burisana ni vapfumeri-kulorhi ni ku hlanganyela eka risimu ro pfula ni xikhongelo swi pfuna ku aka moya lowunene evandlheni. Hi nga tlhela hi ringeta ku hlamula enhlanganweni wun’wana ni wun’wana hi tlhela hi tikarhatela ku antswisa tinhlamuselo ta hina. Kumbexana u nga kombisa ndlela leyi tsalwa leri nga endzimaneni ri fambisanaka ha yona ni leswi ku vulavuriwaka ha swona kumbe u komba ndlela leyi mhaka leyi dyondziwaka yi tirhaka ha yona evuton’wini bya hina bya siku na siku.—Hev. 10:24, 25.
4 Ntirho Wa Nsimu: Ntirho wa hina wa nsimu wu tswala mihandzu swinene loko hi tivekela tipakani. Xana ku ni tiawara leti u nga tivekela ku tirha tona ensin’wini n’hweti yin’wana ni yin’wana? Van’wana va kuma sweswo swi pfuna. Xana ku ni laha u nga antswisaka kona evutirhelini bya wena, tanihi ku tirhisa Bibele entirhweni wa yindlu ni yindlu, ku endla maendzo yo vuyela hi ku tiyimisela lokukulu, ku tikarhatela ku sungula dyondzo ya Bibele, kumbe ku va ni vutshila byo dyondzisa vanhu?
5 Vatswari, xana ma va khutaza vana va n’wina leswaku va tivekela tipakani entirhweni wa Yehovha? Va pfuneni va vona leswaku ku va phayona, murhumiwa, kumbe xirho xa ndyangu wa Bethele i ndlela leyinene ngopfu yo kombisa ndlela leyi va tlangelaka Yehovha ha yona.—Ekl. 12:1.
6 Loko hi kambisisa timhaka ta hina, hi tivekela tipakani ta swilo swa moya, kutani hi lwela ku ti fikelela, hi ta kuma ntsako lowukulu entirhweni wa hina, naswona hi ta kota ku khutaza van’wana.—Rhom. 1:12.