Ku Andza Ku Ya eMahlweni eBethele
1 Laha dzongeni wa Afrika, tanihi kun’wana emisaveni, ntirho wa ku chumayela hi Mfumo wa karhi wa kula. I Yehovha loyi a vangelaka ku andza loku, hi laha muapostola Pawulo a hlamuseleke ha kona loko a ku: “Mina ndzi byarile, Apolosi ú cheletile; kambe Xikwembu hi xona xi miriseke.” (1 Kor. 3:6) Hikwalaho ku fundzheka ni ku dzuneka hinkwako ka ku hatlisisiwa ka ntirho lowu ku ya eka Yehovha, Tata wa hina.—Esa. 60:22.
2 Ku kula ku ve lokukulu swinene lerova rhavi ra hina ri tikeriwa hi ku langutana ni ku andza loku yaka emahlweni. Hi laha u nga vonaka ha kona eswifanisweni leswi nga exikarhi ka matluka ya xiengetelo lexi, hi engetele ndhawu yo tshama eka yona naswona hi tlhele hi aka guxeta yintshwa leyikulu hikwalaho ka ku tala ka swilo leswi rhumeriwaka emarhavini man’wana. Kambe lawa ko va masungulo ya nongonoko wo aka. Ka ha laveka swo tala.
3 Hikwalaho Huvo leyi Fumaka yi pfumelele ku engeteriwa ka miako yin’wana yimbirhi yo tshama laha wun’we wu nga ta va ni makamara ya 64; ku kurisa muako wa hofisi hi swithezi swimbirhi; ku engetela kamara ra hina ro dyela, khixi na ndhawu yo hlantswela tinguvu. Kamara ro dyela ri ta kota ku rhurhela vanhu va 1 000. Leswi swi ta pfuna ndyangu wa Bethele lowu kulaka hi xihatla. Nakambe vugandliselo byi ta fanela ku engeteriwa hi tiphesente ta kwalomu ka 50.
4 Ha yini ku engeteriwa loku hinkwako ku fanerile? Rhavi ra Afrika Dzonga ri endla ntirho wa nkoka eku kuleni ka ntirho lowu. Ku kandziyisiwa ka timagazini, tibroxara, swiphephana ni tifomo swa marhavi hinkwawo edzongeni wa Afrika, ni swa man’wana ya le Afrika xikarhi, swi endliwa kwala. Loko miako ya rhavi yi nyiketeriwa hi March 1987, a ku kandziyisiwa minkandziyiso ya 29 ya timagazini hi n’hweti. Sweswi ku humesiwa minkandziyiso ya 51 hi n’hweti. Nhlayo ya timagazini leti kandziyisiwaka yi engeteleke ku suka eka 8 wa timiliyoni ku ya eka 11,5 wa timiliyoni hi lembe. Nakambe hi sungule ku humesa timagazini ta Xihondzo xo Rindza ta xintima hi nkarhi wun’we ni ta Xinghezi. Loko hi hlanganisa ni timagazini, ntsengo wa hina wa leswi kandziyisiwaka wu hundza timiliyoni tinharhu n’hweti na n’hweti! Emalembeni ya sweswinyana tibuku letintshwa ti humesiwile hi nkarhi wun’we emintsombanweni. Hi xikombiso, eMintsombanweni ya “Dyondzo Ya Xikwembu” buku leyi nge Vahuweleri yi humesiwe hi tindzimi ta nkombo handle ka Xinghezi. Lowu a wu ri ntirho lowukulu lowu a wu lava ku tirha tiawara to tala leti engetelekeke ni madyambu na hi mahelo-vhiki. Ku engetela kwalaho, New World Translation ya karhi ya hundzuluxeriwa hi tindzimi to hlaya ta tiko ra hina. Leswi hinkwaswo swi endle leswaku Ndzawulo ya hina ya Vuhundzuluxeri yi engeteleka ku sukela eka vahundzuluxeri va 40 hi 1987, ku ya eka lava tlulaka 100 sweswi. Entiyisweni, sweswi hi na Ndzawulo ya Vuhundzuluxeri leyikulu swinene emisaveni. Leswi hinkwaswo swi lava leswaku hi engetela miako ya hina.
5 Ku tlhandlekela eka leswi nga laha henhla, rhavi ra Afrika Dzonga ri pfuna marhavi lama nga ekusuhi hi mintirho ya wona yo aka. Mozambhiki na Madagascar ma le ku akeni ka marhavi ya wona lamantshwa sweswi. Ku nga ri khale Zimbabwe, Zaire na Kenya ma ta sungula ku aka na wona. Switirho swo aka swi fanele ku xaviwa ni ku tleketliwa kumbe ku rhumeriwa ematikweni lawa. Hikwalaho, ku laveka Tindzawulo letikulu to Xava ni to Rhumela swilo. Tilori ta ntlhanu letikulu ti tirhiseriwa ku yisa swilo leswi emarhavini man’wana.
6 Xana u nga endla yini leswaku u pfuneta? Ku engetela loku hinkwako ku vula leswaku hi langutane ni ntirho lowukulu. Hi kunguhate ku heta ntirho lowu ku nga si hela malembe ya mune kumbe ntlhanu lama taka, naswona hi ku katekisiwa hi Yehovha leswi swi nga endleka. Xana hinkwerhu ka hina hi nga pfuneta hi ndlela yihi?
7 Vanhu lava nga ni vutshila byo hlawuleka: Xana u ni vuswikoti byo tirhisa michini leyikulu, ku nghenisa mete, ku hlanganisa ni ku chela khonkhrete, ku nghenisa mathayele ya ceramic, ku nghenisa tinsimbi ekhumbini, ntirho wa gezi, ku nghenisa tisilingi, ntirho wa sheet metal, ku bohelela tinsimbi, ku hiselela, vuvatli, vuplambara, ku nghenisa tiphayiphi, ku penda, ku hlanganisa tiphayiphi na drywalling?
8 Loko swi ri tano, naswona u swi kota ku tiendla u kumeka ku ringana vhiki, n’hweti, lembe kumbe ku tlula, hi kombela u hi tsalela u kombela fomo ya ntirho wo aka hi xihatla.
9 Xana u makwerhu lontshwa la hanyeke kahle? Kutani endla xikombelo. Loko u nga ri na vutshila, u ta fika u dyondzisiwa. Vamakwerhu van’wana lavantshwa lava nga kona se i vaaki lava fanelekaka lava nga ni vuswikoti. Yehovha u tshembise leswaku majaha ma ta tinyiketela hi ku tirhandzela enkarhini lowu wa makumu. (Ps. 110:3) Ku laveka majaha yo tala swinene leswaku ku ta hatlisisiwa ntirho lowu.
10 Lava nga ta endla xikombelo va fanele va ri vavanuna va moya, va tinyiketerile ni ku khuvuriwa ku ringana lembe, va ri exikarhi ka malembe ya 19 na 55 hi vukhale, naswona va tiyimisele ku tirha ntirho wo tika. Ku ta rhanga ku kambisisiwa swikombelo swa lava nga entirhweni wa vuphayona ni lava nga vakulu ni malandza ya vutirheli. Loko u faneleka naswona u ta tinyikela hi ku tirhandzela, tsala u kombela fomo ya ntirho wo aka hi xihatla.
11 Nseketelo wa timali ni wa swin’wana: Vamakwerhu va la Afrika Dzonga ni le matikweni lama nga akelana na rona va fanele ku bumabumeriwa hi ndlela leyi va seketeleke ntirho lowu nga hundza ha yona. Vo tala va rhumele minyikelo ya vona hi ku tshembeka n’hweti na n’hweti, naswona va ha endla tano. Yehovha u hakela lava kombisaka moya wo tano wo pfumala vutianakanyi.
12 Ku engetela miako ku ta dya timiliyoni ta tirhandi. Huvo leyi Fumaka ya swi xiya leswaku vamakwerhu lava nga laha a va nge swi koti ku hakelela mali leyi hinkwayo, kutani yi tshembise ku pfuneta kambe yi vula leswaku yi ni ntshembo wa leswaku hi ta seketela ntirho lowu hi xitalo. Loko hinkwerhu hi landzela xitsundzuxo xa muapostola Pawulo lexi nga eka 1 Vakorinto 16:2 xo “vek[a] swin’wana hi tlhelo” vhiki rin’wana ni rin’wana kumbe n’hweti yin’wana ni yin’wana ‘eka leswi hi nga na swona,’ ha tiyiseka leswaku munyikelo lowu ringaneleke wa ntirho lowu wa nkoka wo aka wu ta endliwa kwala tikweni ra rikwerhu.
13 Mavandlha lama nga ekusuhi na le Bethele na wona ma nga hi pfuna swinene hi ku seketela ka wona lokukulu loko ma rhambiwa nkarhi na nkarhi ku ta pfuneta eka malunghiselelo ya ntirho wa Mugqivela.
14 Hi rindzele ku tirha ni vo tala va n’wina. Nkarhi wu komile naswona ntshovelo i wukulu. Kombelani Yehovha a katekisa ntirho lowu leswaku hi ta hambeta hi tirhela swilaveko swa nsimu.
Guxeta Yo Rhumela Swilo ▲ Ehenhla exikarhi: Tinsimbi to bohelela lwangu ehenhla ka guxeta leyintshwa
▼ Malunghiselelo ya Muako wa vu-7 wo tshama eka wona
▲ Muako wa vu-6 wo tshama eka wona, (ehenhla) ni buloho leri wu hlanganisaka ni muako lowun’wana, ni makamara mambirhi ya wona lamantshwa
◀ Miako leyi nga kona eBethele, Muako wa vu-6 wo tshama eka wona hi lowu nga ehenhla exineneni