Xana U Nga Andzisa Ku Dzunisa Ka Wena Yehovha Hi April?
1 Mupisalema Davhida a a tsakela ku dzunisa Yehovha hi ndlela leyi a yi amukelaka, xisweswo u huwelele a ku: “Nḍi ta ḍunisa Yehova hi nomu wa mina hi rito le’ri tlakukeke, nḍi ta ṅwi ḍunisa e šikari ka v̌unyingi.” (Ps. 109:30) April i n’hweti ya kahle ya ku ‘engetela ku n’wi dzunisa’ hi ku andzisa ku hlanganyela ka hina evutirhelini bya nsimu. (Ps. 71:14) Xana u kunguhata ku va exikarhi ka vunyingi lebyi endlaka leswi hi ku phayona swa nkarhinyana?
2 Kunguhata Ka Ha Ri Sweswi: Eka Swivuriso 21:5 ha tsundzuxiwa: “Makungu ya l’a gingiritekaka ma yisa e nḍalweni.” Leswi swi lava leswaku u yisa mhaka leyi eka Yehovha hi xikhongelo, u n’wi rhangisa emakungwini ya wena. (Swiv. 3:5, 6) Lexi landzelaka, kambisisa xiyimiso xa wena xa sweswinyana ku vona leswaku hi kwihi laha u nga endlaka mindzulamiso leswaku u ta heta avhareji ya tiawara timbirhi hi siku evutirhelini. Ku ‘xavisisa’ ka wena nkarhi lowu a wu fanele u wu tirhisela swilo swin’wana swi ku nyika nkarhi lowu engetelekeke wa ntirho wo chumayela.—Ef. 5:16.
3 Vulavula U Tlhela U Va Ni Ntirhisano: Muapostola Pawulo u vulavule hi van’wana lava a va ri “v̌atšhav̌eleri” va yena eku hetisiseni ka vutirheli byakwe. (Kol. 4:11) Vulavula ni van’wana lava lavaka ku tsarisa hi April hi makungu ya wena. Nseketelo ni vunghana bya vona swi nga nyikela mimpfuno ya moya eka n’wina hinkwenu. Mulanguteri wa ntirho a nga mi pfuna loko mi ri ni swivutiso mayelana ni malunghiselelo ya ntirho kumbe ya nsimu leyi mi nga ta yi tirha. Xana hi nga tlhela hi veka pakani yo fikelela nhlohlorhi leyintshwa ya maphayona ya nkarhinyana hi April?
4 Ku tirhisana ni nseketelo lowu humaka endyangwini swi nga pfuna swirho swa ndyangu leswaku swi va maphayona ya nkarhinyana. Mintirho ya le kaya yi nga tlhela yi aviwa hi vuntshwa swa xinkarhana. Xiyimiso xo tirha mintirho leyi na xona xi nga ha lava ku lulamisiwa. Nhlengeletano ya ndyangu yo vulavula hi swilaveko leswi yi nga va mpfuno leswaku u fikelela pakani ya wena. Ku vulavurisana lokunene ni ku tirhisana i xilotlelo xa ku humelela.
5 Vana Ni Vonelo Lerinene: U nga hatliseli ku tshika lunghelo ra ku phayona nkarhinyana hikwalaho ka swiyimo swin’wana leswi nga riki swinene. Vantshwa lava nga le xikolweni, vanhu lava nga ha tirhiki, vamanana lava tshamaka ekaya ni vana, tinhloko ta mindyangu leti tirhaka nkarhi hinkwawo, hikwavo va swi kotile ku tinyiketela—naswona hi ku tirhandzela—ku va maphayona ya nkarhinyana hi April. Va pfumelelana ni mupisalema leswaku “e ku v̌onga ku fanele v̌anhu v̌a ku lulama,” naswona a va swi kumanga swi tika ngopfu ku endla matshalatshala lama engetelekeke leswaku va tirhisa 60 wa tiawara va ri evutirhelini. (Ps. 33:1) Loko u tsandzeka ku tsarisa, ha yini u nga hlanganyeli entsakweni hi ku engetela ntirho wa wena tanihi muhuweleri wa vandlha?
6 Eka vo tala, vuphayona bya nkarhinyana hi April byi ve gondzo leri yisaka entirhweni wa vuphayona bya nkarhi hinkwawo. Hi ku va va andzise ntirho wa vona, va kume swi olova ku cincela eka vuphayona bya nkarhi hinkwawo. Swichudeni swa Bibele leswi fikelelaka swilaveko leswi longoloxiweke eka matluka 98 na 99 ya buku leyi nge Vutirheli Bya Hina, naswona leswi navelaka ku hlanganyela evutirhelini bya le rivaleni swi fanele swi pfuniwa ku va vahuweleri lava nga khuvuriwangiki. Loko hinkwerhu hi hlanganyela evutirhelini nkarhi na nkarhi hi April, ni ku pfuna lavantshwa leswaku va hi joyina, naswona hi vika ntirho wa hina wa nsimu hi xihatla eku heleni ka April, ku hava xivangelo lexi nga hi sivelaka ku fikelela nhlohlori leyintshwa ya vahuweleri hi April.
7 Ina, i nguva leyinene yo engetela ntirho wa swa le tilweni hi April. Vahuweleri vo tala lava nga vantshwa va le masikwini yo wisa ya xikolo. Nakambe ku ni masiku yo wisa yo hlayanyana. April 9 i Siku ra hina ro hlawuleka ra Timagazini leri nga ta endla leswaku vo tala va hina va heta siku hinkwaro va ri ku fambiseni ka timagazini, hi yindlu ni yindlu ni ku nyikela vumbhoni exitarateni. Hi lava ku endla hinkwaswo leswi hi nga swi kotaka ku dzunisa Yehovha Xikwembu xa hina. Ku phayona nkarhinyana hi April i ndlela yo komba ku nkhensa mintirho yakwe yo tala ni tintswalo takwe leti nga hi fanelangiki.