Vutivi Lebyi Humaka Eka Xikwembu Byi Hlamula Swivutiso Swo Tala
1 Loko u nga si kuma vutivi lebyi kongomeke bya ntiyiso, kumbexana a wu ri ni swivutiso swo tala malunghana ni vutomi, leswi a wu nga ti kumi tinhlamulo ta swona. Mawaku ndlela leyi u tsakeke ha yona loko u kume tinhlamulo leti sekeriweke eBibeleni ta swivutiso swoleswo! Sweswi u kota ku pfuna van’wana leswaku va kuma tinhlamulo toleto. (Ringanisa 2 Timotiya 2:2.) U nga avelana na vona vutivi bya Xikwembu lebyi yisaka evuton’wini lebyi nga heriki. (Yoh. 17:3) Kambe, xana u nga n’wi pfuna njhani munhu leswaku a twisisa nkoka wa vutivi lebyi? Phela, ehleketa hi swivutiso leswi ntiyiso wu ku hlamuleleke swona. I yini leswi valavi va ntiyiso va navelaka ku swi tiva? Loko u ri karhi u ehleketa hi timhaka leti swi ta ku pfuna leswaku u fambisa buku leyi nge Vutivi Lebyi Yisaka eVuton’wini Lebyi Nga Heriki. Swiringanyeto leswi landzelaka swi nga ha ku pfuna loko u ri karhi u tilulamisela ku nyikela vumbhoni hi June.
2 Tanihi leswi vanhu vo tala va tivutisaka leswaku hikwalaho ka yini ku ri ni ku andza lokukulu swonghasi ka ku xaniseka emisaveni, xingheniso lexi xi nga va ni n’wangulo lowunene:
◼ “Loko mhangu yi hlasela kumbe loko swiendlo swa vugevenga ni madzolonga swi andza, hakanyingi vanhu va tala ku vutisa leswaku ha yini swilo swo tano swo chavisa swi humelela. Xana a wu ta hlamurisa ku yini ke?” Yimela nhlamulo ya munhu loyi ivi u n’wi nkhensa. Kutani pfula ndzima 8 ya buku leyi nge Vutivi, ivi u yisa nyingiso eka leswi hlamuseriwaka eka ndzimana 2. Hlamusela leswaku buku leyi yi nyikela nhlamuselo ya Bibele ya leswaku ha yini swilo leswo biha swi humelela, kutani u ku: “Ndzi tsakela ku ku siyela kopi leyi hi munyikelo wa R4,00.”
3 Loko u tlhelela laha u fambiseke buku leyi nge “Vutivi,” u nga ha ku:
◼ “Ndzi tsakele mahetelelo lawa u ma fikeleleke malunghana ni xivangelo xo va ku ri ni ku xaniseka lokukulu swonghasi laha misaveni. Xana u pfumelelana ni nhlamulo ya Bibele hilaha yi kombisiweke hakona ebukwini leyi?” Yimela nhlamulo. Hlaya ndzimana 17 eka tluka 77 ebukwini leyi nge Vutivi, ivi u hlaya Varhoma 9:14 eBibeleni ya n’wini wa muti. Kutani u ku: “Mahungu lamanene hileswaku Xikwembu a hi xona lexi hi vangelaka maxangu ni ku xaniseka. Xi hi tshembise ku hi nyika vutomi lebyi nga heriki laha ku nga ni ku rhula ni ntsako. Ndzima yo sungula ebukwini leyi yi ri ‘U Nga Va Ni Vumundzuku Lebyi Tsakisaka!’ Ndzi tsakela ku hlamusela ndlela leyi sweswo swi nga ntiyiso ha yona eka wena ni le ka varhandziwa va wena.” Pfula eka ndzima 1, ivi u kombisa endlelo ra hina ro dyondza. Hlanganisa tinhla to tala eka ndzima yoleyo loko swiyimo swi ku pfumelela.
4 U nga ha hlawula ku tirhisa xingheniso lexi nga eka tluka 13 ra buku leyi nge “Ku Hlamulana,” ehansi ka xihloko lexi nge “Vudyuhari/Rifu”:
◼ “Xana u tshama u tivutisa xivutiso lexi nge: ‘Xana rifu i makumu ya swilo hinkwaswo? Kumbe lexi nge, xana ku ni swin’wana endzhaku ka rifu?’ [Yimela nhlamulo.] Bibele yi hlamula xivutiso xin’wana ni xin’wana lexi hi nga ha vaka na xona malunghana ni rifu. [Hlaya Eklesiasta 9:5, 10.] Yi tlhela yi kombisa leswaku ku ni ntshembo wa xiviri eka lava nga ni ripfumelo. [Pfula eka ndzimana 13 eka tluka 84 ebukwini leyi nge Vutivi; hlaya u tlhela u hlamusela marito ya Yesu lama kumekaka eka Yohane 11:25.] Ndzima leyi hinkwayo yi endleriwe ku hlamula xivutiso lexi nge, Xana ku humelela yini hi varhandziwa va hina lava feke? Loko u tsakela ku yi hlaya, ndzi nga ku siyela kopi leyi hi munyikelo wa R4,00.”
5 Loko u endla riendzo ro vuyela, u nga ha pfuxeta xinghana xa n’wina kutani u ku:
◼ “Enkarhini lowu nga hundza hi vulavule hi leswi humelelaka loko munhu a fa. Vanhu vo tala va pfumela leswaku vutomi byihi na byihi lebyi vaka kona endzhaku ka rifu byi le tilweni kumbe etiheleni. Kambe, xana u tshama u ehleketa hi ntshembo wa vafi wa ku tlhela va hanya nakambe laha misaveni? [Yimela nhlamulo.] Hi ku ya hi Bibele, lava nga ta pfuxiwa eku feni va ta va exikarhi ka vanhu lava titsongahataka lava nga ta dya ndzhaka ya misava. [Hlaya Pisalema 37:11, 29, kutani u hlamusela ndzimana 20 eka tluka 88 ebukwini leyi nge Vutivi.] Ntshembo wolowo wu tise nchavelelo evuton’wini bya vanhu va timiliyoni lava a va hanya hi ku chava rifu. Buku leyi yi ta ku pfuna leswaku u twisisa mhaka leyi hi ndlela yo antswa. Xana ndzi nga ku kombisa leswaku u nga yi twisisa njhani?”
6 Loko u tsakela xingheniso lexi olovaka, u nga ha ringeta lexi:
◼ “Ndzi tsakela ku ku kombisa xifaniso lexi nga ebukwini leyi, leyi nge Vutivi Lebyi Yisaka eVuton’wini Lebyi Nga Heriki. Xana lexi a hi xifaniso xo saseka ke?” Pfula buku leswaku n’wini wa muti a ta vona matluka 4-5. Yimela nhlamulo ya yena. Kutani hlaya marito lama nga eka tluka 5. Gimeta hi ku vula u ku: “U nga teka buku leyi u tihlayela yona hi munyikelo wutsongo wa R4,00.” Vutisa nkarhi lowu nga vaka wu fanerile leswaku u tlhelela leswaku u ta landzela ku tsakela kwihi na kwihi loku kombisiweke.
7 Hi ni vutivi lebyi humaka eka Xikwembu lebyi hlamulaka swivutiso swa nkoka evuton’wini. Lunghiselela swinene, naswona Yehovha u ta katekisa matshalatshala ya wena yo avela lava lavaka ntiyiso rungula leri leri nyikaka vutomi.