Vutivi Bya Xikwembu Xa Ntiyiso Byi Yisa Evuton’wini
1 “Kambe vutomi lebyi nga heriki, hi leswaku va ku tiva, wena ntsena u nga Xikwembu xa ntiyiso,” ku vule Yesu exikhongelweni lexi yaka eka Tata wa yena. (Yoh. 17:3) Mawaku vuyelo byonghasi! Hi ku tirhisa buku leyi nge Vutivi Lebyi Yisaka eVuton’wini Lebyi Nga Heriki, hi nga pfuna van’wana leswaku va dyondza leswi va faneleke ku swi endla leswaku va hanya hi laha ku nga heriki. I yini leswi hi nga swi vulaka leswaku hi pfuxa ku tsakela ni ku va susumetela ku lava ku hlaya buku leyi nge Vutivi?
2 U nga ha tirhisa xingheniso lexi kombisaka Bibele yi ri xihlovo lexi twisisekaka xa nkongomiso, hi ku vula leswi:
◼“Hi bula ni vaakelani va hina mayelana ni laha hi nga kumaka xihlovo lexi twisisekaka xa nkongomiso wo langutana ni swiphiqo swa vutomi. Enkarhini lowu hundzeke vanhu vo tala a va rhanga va ya eBibeleni. Kambe sweswi malangutelo ya vanhu ma cincile; vo tala va kanakana Bibele, va yi teka yi ri buku leyi tsariweke hi vanhu. Xana vonelo ra wena hi rihi? [Yimela nhlamulo.] Ku ni xivangelo lexinene ngopfu lexi ha xona ku nga vuriwaka leswaku Bibele ya tirha ni le sikwini ra hina. [Hlaya 2 Timotiya 3:16, 17.] Misinya ya milawu ya Bibele yi tirha ngopfu sweswi tanihi laha a yi ri ha kona loko Xikwembu xi huhutela ku tsariwa ka Bibele.” Pfula eka tluka 16 ra buku leyi nge Vutivi, kutani hi ku komisa u hlamusela nkongomiso lowu tirhaka lowu kumekaka eka Dyondzo ya Yesu ya le Ntshaveni. Hlaya leswi tshahiweke eka ndzimana 11 kumbe eka ndzimana 13. Fambisa buku, hi munyikelo wa R3,50, kutani u hlela ku tlhela u vuya u ta hlamula xivutiso lexi nge, Hi nga pfuneka njhani hi hexe hi vutivi lebyi nga eBibeleni?
3 Tanihi leswi xikhongelo xi nga mhaka leyi tsakisaka vanhu vo tala, u nga tsakela ku bula hi xona hi ku vutisa u ku:
◼“Hikwalaho ka mintlhontlho hinkwayo leyi hi faneleke hi langutana na yona evuton’wini bya manguva lawa, xana u anakanya leswaku xikhongelo xi nga hi pfuna hakunene? [Yimela nhlamulo.] Vo tala va anakanya leswaku va tshinele ekusuhi ni Xikwembu hi ku xi khongela ni leswaku ku endla tano swi va nyike matimba ya le ndzeni, ku nga leswi Bibele yi tshembisaka swona. [Pfula buku leyi nge Vutivi eka tluka 156, kutani u hlaya Vafilipiya 4:6, 7.] Hambiswiritano, munhu a nga ha anakanya leswaku swikhongelo swakwe minkarhi yin’wana a swi hlamuriwi. Ndzima leyi yi ta bula hi ‘Ndlela Leyi U Nga Tshinelaka Ha Yona Eka Xikwembu.’ [Fambisa buku, hi munyikelo wa R3,50.] Ndzima leyi yi tlhela yi hlamusela ndlela leyi hi nga yingiselaka Xikwembu ha yona, tanihi leswi ku vulavula na xona ku nga riki ku vulavula ka munhu wun’we ntsena. Hi nga ha bula hi sweswo loko ndzi vuya nkarhi lowu taka.”
4 Xana u nga tsakela ku ringeta xingheniso lexi kongomeke xo sungula dyondzo? Hi lexi xin’wana lexi nga tirhaka:
◼“Hi nyikela dyondzo ya mahala ya le kaya ya Bibele. Xana u tshama u va na dyondzo ya Bibele? [Yimela nhlamulo.] I nge ndzi ku komba buku-mpfuno yo dyondza leyi hi yi tirhisaka.” N’wi kombise buku leyi nge Vutivi, pfula eka tluka 3 leswaku n’wini wa muti a ta vona leswi nga endzeni, kutani u n’wi vutisa, “Xana u tshama u tivutisa leswaku i yini leswi Bibele yi swi vulaka mayelana ni timhaka leti?” Pfula eka ndzima leyi a yi tsakelaka swinene, kutani u hlaya swihlokwana. Hlamusela leswaku u ta tsakela ku n’wi kombisa hi ku komisa ndlela leyi hi hlanganisaka rungula leri ha yona edyondzweni ya hina. Hambiloko dyondzo yi sunguriwile kumbe yi nga si sunguriwa, fambisa buku eka munhu wa kona.
5 Namuntlha vunyingi bya vanhu va angula eka vutivi lebyi kongomeke bya ntiyiso wa Xikwembu. (Esa. 2:2-4) Hi na lunghelo ro pfuna vo tala hi laha swi nga kotekaka ha kona leswaku va dyondza hi Yehovha naswona va kongomisiwa evuton’wini.—1 Tim. 2:4.