Vuyeriwa Exikolweni Xa Vutirheli Bya Le Tilweni Xa 1996—Xiyenge 3
1 Muapostola Pawulo u kombele vamakwavo ku n’wi khongelela leswaku a ta va ni vuswikoti byo vula mahungu lamanene hi xivindzi. (Ef. 6:18-20) Hi navela ku hlakulela vuswikoti byolebyo lebyi fanaka. Leswaku hi va ni vuswikoti byolebyo, hi tlangela mpfuno lowu nyikeriwaka hi Xikolo xa Vutirheli bya le Tilweni, lexi eka xona lava vaka kona eminhlanganweni, lava fanelekaka va khutaziwaka ku tsarisa.
2 Leswi hi nga swichudeni, hi kuma ndzayo ya munhu ha un’we leswaku yi hi pfuna ku antswisa vuswikoti bya hina byo vulavula ni byo dyondzisa. (Swiv. 9:9) Nakambe hi nga pfuneka hi ku yingisela ndzayo leyi swichudeni swin’wana swi yi kumaka, hi ku va hi tirhisa ndzayo leyi hi yi twaka eka hina vini. Loko hi lunghiselela xiavelo, hi fanele hi hlayisisa xihlovo xa mhaka leswaku hi tiyiseka leswaku nhlamuselo ya hina ya pakanisa. Tinhla-nkulu ni matsalwa lawa hi ma tirhisaka ma fanele ma fambisana ni xihloko xa nkulumo hinkwayo. Loko nkulumo yi katsa munhu un’wana, yi fanele yi lunghiseleriwa kahle ka ha ri emahlweni yi nga si ya nyikeriwa exikolweni. Loko hi ri karhi hi endla nhluvuko, ku fanele ku endliwa matshalatshala leswaku hi vula leswi lunghiseleriweke, hi tirhisa leswi hi swi tsaleke ematshan’weni yo swi hlaya kunene.
3 Hinkwavo lava nga ni tinkulumo exikolweni va fanele va fika ka ha ri na nkarhi, va nyika mulanguteri wa xikolo xiphephana xa Ndzayo Ya Nkulumo, naswona va tshamela emahlweni. Vamakwerhu va xisati va fanele va tivisa mulanguteri wa xikolo ka ha ri emahlweni leswaku va yi hlele njhani nkulumo ya vona ni leswaku va ta va va yimile kumbe va ta va va tshamile loko va yi nyikela. Ku tirhisana emhakeni leyi swi ta pfuna ku endla nongonoko wu famba kahle ni ku pfuna lava khathalelaka pulatifomo leswaku va lunghiselela hinkwaswo ka ha ri ni nkarhi.
4 Ku Lunghiselela Nkulumo No. 2: Xikongomelo xin’wana xa ku hlaya ka Bibele i ku pfuna xichudeni leswaku xi antswisa vuswikoti bya xona byo hlaya. Xana leswi swi nga endlisiwa ku yini? Ku hlayela mhaka ehenhla hi ku phindha-phindha i ndlela yo antswa yo va na vuswikoti. Leswaku xi tiva nhlamuselo ya marito wahi na wahi lama nga tolovelekangiki, xichudeni xi fanele xi ma languta eka xihlamusela-marito. Loko u nga tiyiseki hi mavitanelo ya marito man’wana, vutisa vamakwerhu lava ri tivaka kahle ririmi.
5 New World Translation ya Xinghezi yi pfuna ku vitana mavito hi ndlela ya kona ni marito lama nga tolovelekangiki lama kumekaka eBibeleni. Yi endla leswi hi ku ya tsemelela hi mapeletwana ni ku vekela mimfungho ya mavitanelo. (Vona “Matsalwa Hinkwawo Ma Huhuteriwe Hi Xikwembu Naswona Ma Pfuna,” matluka 325-6, tindzimana 27-8.) Hi nawu, peletwana leri rhangelaka mfungho wa mavitanelo ri hlayiwa hi ku kandziyisiwa lokukulu. Loko peletwana leri nga ni mfungho ri hetelela hi xitwari, xitwari xi vitaniwa hi ku kokanyana. Loko peletwana ri hela hi xitatisi, xitwari lexi nga eka peletwana ra kona xi komile. (Ringanisa Saʹlu na Salʹlu.) Loko va lunghiselela nkulumo ya ku hlaya ka Bibele, vamakwerhu van’wana va yingisela tikhasete ta Sosayiti.
6 Vatswari va nga pfuna vana va vona lavatsongo ku lunghiselela nkulumo yo hlaya. Leswi swi nga ha katsa ku yingisela loko n’wana a ri karhi a hlaya, kutani mi n’wi nyika swiringanyeto leswi nga n’wi pfunaka ku antswisa. Nkarhi lowu vekiweke wu pfumelela xingheniso xo koma ni mahetelelo lama faneleke lama kombisaka ku tirha ka tinhla-nkulu. Xisweswo xichudeni xi hluvukisa vuswikoti bya xona byo vula leswi lunghiseleriweke.
7 Mupisalema hi xikhongelo u komberile: “Hosi, pfula milomu ya mina, kutani nomu wa mina wu ta v̌ula šiḍumo ša wena.” (Ps. 51:15) Onge ku hlanganyela ka hina eXikolweni xa Vutirheli bya le Tilweni ku nga hi pfuna ku enerisa ku navela loku fanaka.