Xikolo Xa Vutirheli Bya Le Tilweni Xa 2015 Xi Ta Hi Pfuna Ku Antswisa Ndlela Leyi Hi Dyondzisaka Ha Yona

¹ Mupisalema Davhida u tsale a ku: “Marito ya nomu wa mina ni ku anakanyisisa ka mbilu ya mina a ku tsakise emahlweni ka wena, Wena Yehovha Ribye ra mina ni Mukutsuri wa mina.” (Ps. 19:14) Na hina hi lava leswaku marito ya hina ma tsakisa Yehovha hikuva hi ri teka ri ri ra nkoka lunghelo ra hina ra ku vulavula ntiyiso evandlheni ni le nsin’wini. Xikolo xa Vutirheli bya le Tilweni i yin’wana ya tindlela leti Yehovha a hi letelaka ha tona leswaku hi kota ku chumayela ensin’wini. Ndzetelo lowu wu va kona vhiki rin’wana ni rin’wana emavandlheni yo tlula 111 000 emisaveni hinkwayo. Wu pfune vamakwerhu va xinuna ni va xisati va swiyimo swo hambana-hambana emisaveni hinkwayo leswaku va swi fanelekela kahle ku va vachumayeri va mahungu lamanene, lava kotaka ku dyondzisa hi ku khorwisa, hi vuxiya-xiya ni hi xivindzi.—Mint. 19:8; Kol. 4:6.

² Xiyimiso xa xikolo xa 2015 xi ta katsa rungula leri kumekaka eka xibukwana lexi nge Xingheniso Xa Rito Ra Xikwembu ni leri humaka eka nhloko-mhaka leyi nge “Glossary of Bible Terms,” leyi kumekaka eka Vuhundzuluxeri Bya Misava Leyintshwa bya Xinghezi, swin’we ni rungula leri humaka eka Insight on the Scriptures, Vholumo 1. Ku engetela kwalaho, nkarhi wa tinhla-nkulu ta Bibele ni wa Nkulumo No. 1 wu hungutiwile. Ku cinca loku ni swiletelo swa ndlela leyi tinkulumo ta xikolo ti faneleke ti nyikeriwa ha yona ku ta buriwa ha swona eka tindzimana leti landzelaka.

³ Tinhla-nkulu Ta Bibele: Vamakwerhu va xinuna lava averiweke nkulumo leyi, va fanele va tirhisa timinete timbirhi leswaku va tlhuvutsa yinhla yin’we leyi tsakisaka ni leyi tirhaka ya le Matsalweni, leyi kumekaka eka ku hlaya ka Bibele ka vhiki ni vhiki. Loko vamakwerhu va lunghiselela kahle va ta swi kota ku hlamusela vandlha yinhla yin’we ya nkoka hi nkarhi lowu va nyikiweke wona. Endzhaku ka sweswo, vamakwerhu evandlheni va ta nyikiwa timinete ta tsevu leswaku va hlamusela tinhla leti tsakisaka leti va ti kumeke eka ku hlaya ka Bibele ka vhiki ni vhiki hi tisekoni leti nga tluliki 30. Hi fanele hi lunghiselela ivi hi tiyiseka leswaku hi nyikela nhlamulo hi 30 wa tisekoni ntsena, kambe ku endla tano swi lava matshalatshala lamakulu. Swi ta tlhela swi endla leswaku ni vamakwerhu van’wana va kota ku hlamusela leswi va swi dyondzeke loko va ri karhi va endla ndzavisiso.

⁴ Nkulumo No. 1: Nkarhi wa ku hlaya ka Bibele wu hungutiwile wu va timinete leti nga tluliki tinharhu naswona ku ta va ku nga lehanga. Lava va nyikiwaka xiavelo lexi xo hlaya va fanele va hlayela ehenhla hi ku phindha-phindha loko va ri voxe, kutani va tiyiseka leswaku va ma vitana kahle marito naswona va hlaya hi ndlela leyi khulukaka leswaku va ta hundzisa rungula hi ndlela leyi twisisekaka. Vanhu hinkwavo va Yehovha va fanele va tikarhatela ku hlaya kahle, tanihi leswi ku hlaya ku nga ka nkoka evugandzerini bya hina. Ha tsaka swinene leswi vana va hina vo tala va hlayaka kahle! Vatswari va bumabumeriwa hikwalaho ka matshalatshala ya rirhandzu lawa va ma endlaka yo pfuna vana va vona leswaku va hlaya hi ndlela leyinene.

⁵ Nkulumo No. 2: Leyi ku ta va nkulumo ya ntlhanu wa timinete leyi nga ta averiwa makwerhu wa xisati. U fanele a tirhisa nhloko-mhaka leyi a averiweke yona. Loko nkulumo leyi yi sekeriwe eka xibukwana lexi nge, Xingheniso Xa Rito Ra Xikwembu kumbe eka Vuhundzuluxeri Bya Misava Leyintshwa, yi fanele yi nyikeriwa hi ndlela leyi fambisanaka ni swiyimo swa nsimu ya vandlha. Loko nkulumo leyi yi vulavula hi munhu wo karhi wa le Bibeleni loyi ku vulavuriwaka ha yena ebukwini leyi nge, Insight on the Scriptures, Vholumo 1, xichudeni xi fanele xi hlaya rungula leri kumekaka ehansi ka vito ra munhu yoloye wa le Bibeleni, xi hlawula matsalwa lama faneleke lawa xi nga ta ma tirhisa kutani xi kombisa leswi nga dyondziwaka eka xikombiso xa munhu yoloye loyi ku vulavuriwaka ha yena eBibeleni. Xi nga ha katsa ni matsalwa lama engetelekeke lama fambisanaka ni nhloko-mhaka yoleyo. Mulanguteri wa xikolo u ta xi avela mupfuni un’we.

⁶ Nkulumo No. 3: Leyi ku ta va nkulumo ya timinete ta ntlhanu leyi nga ta averiwa makwerhu wa xinuna kumbe wa xisati. Loko yi averiwe makwerhu wa xisati, yi fanele yi nyikeriwa ku fana ni Nkulumo No. 2. Loko yi averiwe makwerhu wa xinuna, rungula leri sekeriweke ebukwini leyi nge Insight ri fanele ri nyikeriwa tanihi nkulumo leyi kongomisiweke eka vayingiseri. Xichudeni xi fanele xi ndlandlamuxa nhloko-mhaka leyi xi averiweke yona, xi hlawula matsalwa lama faneleke lawa xi nga ma tirhisaka kutani xi kombisa leswi nga dyondziwaka eka xikombiso xa munhu yoloye loyi ku vulavuriwaka ha yena eBibeleni.

⁷ Ndlela Leyintshwa Yo Nyikela Nkulumo No. 3 Hi Vamakwerhu Va Xinuna: Loko nkulumo leyi yi sekeriwe eka xibukwana lexi nge Xingheniso Xa Rito Ra Xikwembu kumbe eka Vuhundzuluxeri Bya Misava Leyintshwa, yi fanele yi nyikeriwa tanihi nkombiso wo endla vugandzeri bya ndyangu kumbe wa le nsin’wini. Mulanguteri wa xikolo u ta n’wi avela mupfuni a tlhela a n’wi hlawulela mahlelelo ya nkulumo. Munhu loyi a averiweke ku va mupfuni wa yena u fanele a va a ri xirho xa ndyangu wa yena kumbe ku va ku ri makwerhu wa xinuna wa kwalaho vandlheni. A nga ha katsa ni tindzimana leti engetelekeke leti kandziyisaka milawu ya Bibele leti fambisanaka ni nhloko-mhaka yoleyo. Minkarhi yin’wana nkulumo leyi yi ta averiwa nkulu. Vakulu va nga ha tihlawulela mupfuni ni mahlelelo ya nkulumo. A swi kanakanisi leswaku vandlha ri ta khutazeka loko ri vona vakulu va kombisa vuswikoti bya vona byo dyondzisa va ri ni swirho swa mindyangu ya vona kumbe makwerhu un’wana wa xinuna.

⁸ Ndzayo: Mulanguteri wa xikolo u ta tirhisa timinete timbirhi endzhaku ka nkulumo yin’wana ni yin’wana ya swichudeni leswaku a swi bumabumela a tlhela a swi nyika ndzayo leyi akaka, leyi sekeriweke ebukwini leyi nge Vuyeriwa Eka Vuleteri Bya Xikolo Xa Vutirheli Bya Le Tilweni. Loko mulanguteri wa xikolo a tivisa nkulumo ya xichudeni, a nge yi tivisi yinhla leyi xichudeni xi tirhelaka eka yona. Loko xichudeni xin’wana ni xin’wana xi heta ku nyikela nkulumo, mulanguteri u fanele a xi bumabumela, a tivisa yinhla leyi xichudeni xi tirhelaka eka yona, a tlhela a vula leswaku ha yini xichudeni xi tirhe kahle eka yinhla yoleyo kumbe a hlamusela hi ndlela leyinene leswaku ha yini swi ta pfuna leswaku xichudeni xi tlhela xi tirhela eka yinhla yoleyo.

⁹ Phepha ra ndzayo ra xichudeni ri kumeka eka matluka 79 ku ya eka 81 ya buku ya xona leyi nge Xikolo Xa Vutirheli. Mulanguteri wa xikolo u ta fungha ebukwini ya xichudeni endzhaku ka loko xi nyikele nkulumo ya xona naswona u ta xi vutisa xi ri xoxe loko xi xi endlile xitoloveto lexi nga eka yinhla leyi a xi averiwe ku tirhela eka yona. Xichudeni xi nga ha bumabumeriwa xi tlhela xi nyikiwa swiringanyeto swin’wana leswi pfunaka endzhaku ka minhlangano kumbe hi nkarhi wun’wana. Mpfuno lowu xichudeni xin’wana ni xin’wana xi wu kumaka exikolweni xi fanele xi wu teka tanihi nkarhi wo xi pfuna ku endla nhluvuko hi tlhelo ra moya.—1 Tim. 4:15.

¹⁰ Loko xichudeni xi dya nkarhi, mulanguteri wa xikolo kumbe mupfuni wa yena u fanele a tirhisa nchumu wo karhi a kombisa hi vutlhari leswaku nkarhi lowu xichudeni xi nyikiweke wona se wu herile. Xichudeni xi fanele xi tekela xilemukiso xolexo enhlokweni kutani xi hetisa xivulwa xa xona ivi xi suka exitejini.—Vona buku leyi nge Xikolo Xa Vutirheli, tl. 282, ndzim. 4.

¹¹ Vanhu hinkwavo lava fanelekaka va khutaziwa ku tsarisa eXikolweni xa Vutirheli bya le Tilweni. (Vona buku leyi nge Xikolo Xa Vutirheli, tl. 282, ndzim. 6.) Dyondzo leyi kumekaka exikolweni lexi yi endle leswaku vanhu va Yehovha va va ni vuswikoti byo chumayela ni byo dyondzisa mahungu lamanene ya Mfumo hi ku khorwiseka, hi xichavo ni hi rirhandzu. A swi kanakanisi leswaku Yehovha wa tsaka loko a dzunisiwa hi vanhu hinkwavo lava vuyeriwaka swinene eka dyondzo ya le tilweni!—Ps. 148:12, 13; Esa. 50:4.