Switsundzuxo Eka Valanguteri Va Xikolo

EVANDLHENI rin’wana ni rin’wana ku ni nkulu la hlawuriweke ku va mulanguteri wa Xikolo xa Vutirheli bya le Tilweni. Loko u byarhisiwe ntirho lowu, ku hisekela ka wena xikolo ni ku tsakela ku vona xichudeni xin’wana ni xin’wana xi endla nhluvuko swi ta endla leswaku xikolo xa vandlha ra ka n’wina xi va lexi vuyerisaka.

Xa nkoka swinene hi xiavelo xa wena i ku langutela Xikolo xa Vutirheli bya le Tilweni xa vandlha ra ka n’wina vhiki na vhiki. Tsundzuka leswaku a hi swichudeni leswi nga ni swiavelo ntsena leswi nga kona enhlanganweni kambe ni vayingiseri van’wana va kona. Fambisa xikolo hi ndlela leyi vandlha hinkwaro ri nga ta vuyeriwa hi switsundzuxo leswi khutazaka ni leswi akaka, leswi fambisanaka ni yin’wana ya tinhla ta xikongomelo xa xikolo leti hlamuseriweke eka matluka 5 ku ya ka 8 ya buku leyi.

Kombisa leswaku wa khathala hi swichudeni hinkwaswo, hambi swi averiwe ku hlaya, nkombiso, kumbe ku nyikela tinkulumo. Va pfune va vona leswaku va nga teki swiavelo swa vona swi ri ndzhwalo, kambe va swi teka tanihi nkarhi wo endla nhluvuko eku tirheleni ka vona Yehovha. Kunene, matshalatshala lawa va ma endlaka, hi wona ma nga ta va pfuna swinene leswaku va endla nhluvuko. Kambe i swa nkoka leswaku u kombisa nkhathalo wa wena eka vona, u va pfuna va twisisa nkoka wa tinhla to tirhela eka tona, u tlhela u va hlamusela ndlela leyi va faneleke va tirhisa ndzayo yoleyo ha yona. Leswi u nga swi endla hi ku yingiserisisa nkulumo yin’wana ni yin’wana leswaku u ta va byela mhaka yo twala hi leswi u swi xiyeke.

Tiyiseka leswaku u sungula xikolo hi nkarhi u tlhela u xi heta hi nkarhi. Veka xikombiso lexinene hi ku komisa tinhlamuselo ta wena leswaku u nga tluli nkarhi lowu ti vekeriweke wona. Loko nkulumo ya xichudeni yi tlula nkarhi lowu yi nyikiweke wona, xi fanele xi lemukisiwa hi wena kumbe mupfuni wa wena. Xichudeni xi fanele xi hetisa xiga xa xona ivi xi suka. Loko ni swiavelo leswin’wana swa nongonoko swi dye nkarhi, komisa tinhlamuselo ta wena, kutani u vulavula na makwerhu hi mhaka ya nkarhi endzhaku ka nhlangano.

Loko u ri kona u fanele u fambisa xikolo. Loko minkarhi yin’wana u ta va u nga ri kona, nkulu un’wana loyi a hlawuriweke hi huvo ya vakulu u fanele a xi fambisa. Loko u lava ku pfuniwa ku endla swiyimiso, ku tsala swiavelo ni ku swi nyika vini va swona, kumbe ku kuma lava nga ta siva van’wana enongonokweni, nandza wa vutirheli loyi a hlawuriweke hi huvo ya vakulu a nga ha ku pfuna.

Ku Tsarisa Swichudeni. Khutaza vahuweleri hinkwavo leswaku va tsarisa exikolweni. Van’wana lava hlanganyelaka ni vandlha minkarhi hinkwayo na vona va nga ha tsarisa loko va pfumelelana ni tidyondzo ta Bibele ni vutomi bya vona byi pfumelelana ni misinya ya milawu ya Vukreste. Loko munhu a navela ku tsarisa, n’wi hoyozele. Loko munhu wa kona a nga si va muhuweleri, wena tanihi mulanguteri wa xikolo u fanele u bula na yena hi timfanelo leti lavekaka eka lava tsarisaka exikolweni, loko swi koteka u n’wi hlamusela ku ri ni loyi a n’wi fambiselaka dyondzo ya Bibele (kumbe ku ri ni mutswari wa yena la nga mupfumeri). Timfanelo leti ta fana ni leti lavekaka eka munhu loyi a vaka muhuweleri la nga si khuvuriwaka. Ti kumeka eka matluka 97 ku ya ka 99 ya buku leyi nge Ku Hleleriwa Ku Hetisisa Vutirheli Bya Hina. Tiyiseka leswaku u tshama u ri ni nxaxamelo lowuntshwa wa vanhu lava tsariseke exikolweni.

Ku Tirhisa Phepha Ra Ndzayo. Phepha ra ndzayo ra xichudeni xin’wana ni xin’wana ri le bukwini ya xona, eka matluka 79 ku ya ka 81. Hilaha swi kombisiweke hakona hi mihlovo yo hambana, yinhla ha yin’we yo tirhela eka yona ku sukela eka 1 ku ya ka 17 yi nga tirhisiwa loko xichudeni xi nyikiwe nkulumo yo hlaya. Eka ya nkombiso, ku nga tirheriwa eka yinhla yin’wana ni yin’wana handle ka ya 7, 52 na 53. Lava nyikelaka tinkulumo tinene va nga tirhela eka tinhla hinkwato handle ka ya 7, 18 na 30.

Loko u languteriwe ku tirhela eka yinhla yo karhi, mulanguteri wa xikolo u fanele a tsala siku hi pensele ehansi ka “Siku Ro Averiwa,” etlhelo ka yinhla leyi u faneleke u tirhela eka yona, ephepheni ra ndzayo leri nga ebukwini ya xichudeni. Loko xichudeni xi hetile nkulumo ya xona, xi vitanele etlhelo u xi vutisa loko xi xi endlile xitoloveto lexi nga emakumu ka yinhla yo tirhela eka yona. Loko xi xi endlile u fanele u fungha exibokisanini xa phepha ra ndzayo. Loko u vona leswaku xa ha fanele xi tirhela eka yinhla yoleyo, a wu fanelanga u tsala nchumu ephepheni ra ndzayo; ni le ka “Siku Ro Pasa” u nga tsali nchumu. Eka siku ro pasa ku fanele ku tsariwa ntsena loko se xi yi kotile yinhla ya kona. Ku engetela kwalaho, eka tluka 82 ra buku ya xichudeni, ku fanele ku tsariwa siku eximatsini xa mahlelelo lawa xi ma tirhiseke, loko xi nyikele nkulumo ya xona. Ku na tindhawu timbirhi eka phepha ra ndzayo ni le ka nxaxamelo wa mahlelelo ku endlela leswaku ndzayo ni mahlelelo ma tirhisiwa kambirhi. Swichudeni swi fanele swi va swi khome tibuku ta swona hi nkarhi wa nhlangano.

Avela xichudeni yinhla yin’we yo tirhela eka yona enkulumeni ha yin’we. Hi ntolovelo, swa antswa ku va avela tinhla to tirhela eka tona hi ku landzelelana ka tona. Hambiswiritano, loko swichudeni swin’wana swi ri na vuswikoti swinene, u nga ha swi khutaza leswaku swi dyondza tinhla letin’wana ni ku ti tirhisela tona. Kutani u nga ha swi pfuna eka tinhla leti u ehleketaka leswaku ti ta swi pfuna ku endla nhluvuko leswaku swi va swivulavuri ni vadyondzisi lava nga ni vuswikoti lebyi engetelekeke.

Hambiloko xichudeni xi ri ni malembe xi ri karhi xi nyikela tinkulumo exikolweni, xi nga vuyeriwa swinene loko xi dyondza ni ku tirhisa yinhla yin’wana ni yin’wana. Leswaku u pfuna swichudeni leswi lavaka mpfuno wo karhi, u nga ha swi hlawulela tinhla tin’wana leswaku swi tirhela eka tona ku ri na ku ya hi nxaxamelo wa tona lowu nga ephepheni ra ndzayo.

Ku Nyika Ndzayo. Loko u nyikela ndzayo, tirhisa swikombiso ni misinya ya milawu leyi nga eBibeleni. Swichudeni swi fanele swi swi vona leswaku ndzayo leyi swi nyikiwaka yona ni ndlela leyi yi nyikeriwaka ha yona yi sekeriwe eka misinya ya milawu leyi tlakukeke ya Rito ra Xikwembu.

U nga rivali leswaku na wena u ‘mutirhi-kulobye’ swin’we ni vamakwenu va xinuna ni va xisati. (2 Kor. 1:24) Na wena u fanele u tshama u ri karhi u lwela ku endla nhluvuko tanihi xivulavuri ni mudyondzisi. U fanele u tidyondzela buku leyi nge Vuyeriwa Eka Vuleteri Bya Xikolo Xa Vutirheli Bya Le Tilweni, u tirhisa ndzayo ya yona, u va xikombiso lexinene eka van’wana leswaku na vona va endla leswi fanaka.

Loko u ri karhi u tirhisa leswi u swi dyondzeke, pakani ya wena a yi ve ku pfuna swichudeni leswaku swi va vahlayi lavanene, swivulavuri leswi nga ni vuswikoti, ni vadyondzisi lava humelelaka. Leswaku u endla sweswo, tikarhatele ku pfuna swichudeni hi tindlela hinkwato leti lavekaka leswaku swi twisisa leswi timfanelo to hambana-hambana ti vulaka swona, swi tlhela swi twisisa leswaku ha yini ti ri ta nkoka, ni leswaku swi nga ti hlakulela njhani. Buku leyi yi hleleriwe ku ku pfuna leswaku u endla sweswo. Hambiswiritano, ku languteriwe swo tala eka wena ku tlula ku hlaya marito lama nga ebukwini. U fanele u hlamusela leswi ma vulaka swona ni ndlela leyi swi faneleke swi tirhisiwa ha yona.

Loko xichudeni xi endle kahle eka yinhla yo karhi, xi bumabumele. Hlamusela hi ku komisa leswaku ha yini xi endle kahle, kumbe ha yini leswi xi swi endleke swi ri swa nkoka. Niloko yinhla yoleyo ya ha lava ku antswisiwa, swi veke erivaleni leswaku ha yini ya ha lava ku antswisiwa. Hlamusela ndlela leyi xi nga antswisaka ha yona. Kongoma, kambe u va ni musa.

Tsundzuka leswaku eka vo tala, ku yima va ya veka nkulumo emahlweni ka vanhu swa va tikela. Loko munhu a vona leswaku a nga endlanga kahle, a nga ha hela matimba. Tekelela Yesu, loyi a nga tshovangiki “rihlanga leri khinyekeke” kumbe ku tima “rivoni ra ngoti leri ketimelaka.” (Mat. 12:20) Anakanyela vumunhu bya xichudeni. Loko u nyikela ndzayo, u fanele u languta loko xichudeni xi ri xintshwa kumbe ku ri khale xi ri muhuweleri. Ku bumabumela hi musa swi nga tiyisa swichudeni leswaku swi hambeta swi endla nhluvuko.

Komba xichudeni xin’wana ni xin’wana xichavo. Varhoma 12:10 yi hi byela leswi: “Vanani lavo rhanga eku xiximaneni.” Yoleyo i ndzayo leyinene eka mufambisi wa Xikolo xa Vutirheli bya le Tilweni! Loko xichudeni xi ri munhu lonkulu eka wena tirhisa nkongomiso lowu nga eka 1 Timotiya 5:1, 2. Kambe, ku nga khathariseki vukhale bya munhu, loko a nyikiwa ndzayo ya leswaku a lulamisa swo karhi eka ndlela leyi a endlaka swilo ha yona, hakanyingi u ta yi amukela kahle loko yi nyikeriwa hi musa.—Swiv. 25:11.

Loko u nyika xichudeni ndzayo, endla leswaku xi vona xikongomelo xa vuleteri bya xikolo lexi. A hi lweli ku pasa ntsena kutani hi byeriwa ku hundzela eka yinhla leyi landzelaka. Pakani ya kona a hi ku va xivulavuri ni ku va mudyondzisi la lavaka ku tikokela mahlo. (Swiv. 25:27) Leswi hi swi navelaka i ku dzunisa Yehovha hi nyiko ya hina ya ku vulavula ni ku pfuna van’wana leswaku va n’wi tiva ni ku n’wi rhandza. Ndzetelo lowu hi wu kumaka wu hi nyika vutshila byo endla ntirho lowu hlamuseriweke eka Matewu 24:14 na 28:19, 20. Hi ku famba ka nkarhi, vamakwerhu va xinuna lava khuvuriweke, loko va faneleka va nga ha averiwa ku khathalela “ntlhambi wa Xikwembu,” hi ku nyikela tinkulumo ni ku dyondzisa.—1 Pet. 5:2, 3. 

Byela swichudeni leswaku loko swi kuma xiavelo, swi fanele swi hlaya yinhla yo tirhela ka yona, ebukwini ya xikolo. Swi khutaze leswaku swi tirhisa leswi swi swi dyondzaka loko swi lunghiselela tinkulumo ta swona ta xikolo, loko swi vulavula siku na siku, loko swi hlamula eminhlanganweni ni le nsin’wini.

Ku Hlela Swiavelo. Hi ntolovelo swi fanele swi humesiwa ka ha sale mavhiki manharhu. Loko swi koteka, swiavelo sweswo hinkwaswo swi fanele swi tsariwa kunene.

Tinkulumo leti katsaka ku letela vandlha ti fanele ti averiwa vakulu, ngopfu-ngopfu lava nga ta ti nyikela hi ndlela leyi humelelaka ni malandza ya vutirheli lama kotaka ku dyondzisa.

Leswaku u tiva leswaku i nkulumo yihi leyi faneleke yi averiwa vamakwerhu va xinuna ni leyi yi faneleke va xisati, landzelela swiletelo leswi nga eka xiyimiso xa xikolo. Loko vamakwerhu va xisati va tele ku tlula va xinuna, tiyiseka leswaku na vamakwerhu va xinuna va averiwa ku nyikela tinkulumo letin’wana hambi ti nga ri to hlaya.

Anakanya hi swiyimo swa vanhu loko u endla swiavelo. Xana swa boha leswaku u avela nkulu kumbe nandza wa vutirheli loyi hi siku rero a nga ni nkulumo eka Nhlangano wa Vutirheli kumbe hi vhiki leri a nga na nkulumo ya le rivaleni evandlheni? Xana swa boha ku avela makwerhu wa xisati nkulumo, hi siku leri ni n’wana wa yena a nga na nkulumo, loyi swi nga ha lavaka leswaku a n’wi pfuna? Ngopfu-ngopfu loko ku ri n’wana kumbe xichudeni lexi nga si khuvuriwaka, xana xihloko xa kona xa n’wi fanela? Tiyiseka leswaku nkulumo ya kona yi pfumelelana ni yinhla leyi xichudeni xi nga ta tirhela eka yona.

Eka tinkulumo leti nyikeriwaka hi vamakwerhu va xisati, hakanyingi xichudeni xi ta hlawula mahlelelo lama fambisanaka ni swiletelo leswi nga eka matluka 78 na 82. A nga ha averiwa mupfuni un’we, kambe loko swi laveka ku nga engeteriwa ni un’wana. Loko xichudeni xi lava mupfuni loyi a nga ta fanelekela mahlelelo yo karhi, u fanele u twisisa xikombelo xa xona.

Swikolo Swin’wana. Loko ku tsarise swichudeni swo tlula 50, u nga ha endla swikolo swin’wana. Swi ta ya hi vandlha ra n’wina, lunghiselelo leri ri nga ha tirhiseriwa tinkulumo hinkwato ta swichudeni, kumbe mi hambana loko ku endliwa tinkulumo timbirhi to hetelela.

Xikolo ha xin’we xi fanele xi va ni mufambisi la fanelekaka, ngopfu-ngopfu nkulu. Loko swi nga koteki, ku nga tirhisiwa nandza wa vutirheli la fanelekaka. Huvo ya vakulu hi yona yi faneleke yi hlawula vamakwerhu lava nga ta fambisa swikolo. Tirhisana ni vafambisi va swikolo leswin’wana leswaku nhluvuko wa swichudeni wu ta landzeleriwa kahle ku nga khathariseki leswaku swi le ka xikolo xihi.

Xikolo Xo Dyondza Ku Hlaya Kahle. Loko huvo ya vakulu yi xiya leswaku ku ni vanhu vo hlayanyana evandlheni, lava faneleke va leteriwa ku hlaya ririmi leri tirhisiwaka evandlheni, u nga ha hlela ku endla xikolo xa le tlhelo hi nkarhi wa Xikolo xa Vutirheli bya le Tilweni. Xikolo lexi xi nga ha katsa ku dyondzisa ku hlaya ni ku tsala, kumbe xikongomelo xa xona ku nga ha va ku pfuna vanhu leswaku va antswisa ndlela leyi va hlayaka ha yona.

Swikolo swo tano a swi bohi leswaku swi khomiwa hi nkarhi wun’we ni Xikolo xa Vutirheli bya le Tilweni. Leswaku vanhu va pfuniwa kahle, ku nga ha laveka nkarhi lowu engetelekeke wo tlula lowu vekeriweke xikolo. Vakulu va vandlha hi vona va nga ta vona leswi lavekaka ni leswaku xikolo lexi xi nga fambisiwa rini. Hi ku ya hi xilaveko, ku nga endliwa malunghiselelo ya leswaku ntlawa wu dyondzisiwa xikan’we, kumbe ku dyondzisiwa munhu ha un’we.

Ku laveka mudyondzisi la nga ni vutshila. Swi nga antswa loko ku averiwa makwerhu wa xinuna la kotaka ku hlaya hi ku khuluka naswona a ri tiva kahle ririmi ra kona. Loko makwerhu wa xinuna a nga ri kona, vakulu va nga ha hlawula makwerhu wa xisati la nga ni vuswikoti naswona a nga xikombiso lexinene leswaku a pfuna. Makwerhu loyi wa xisati u fanele a ambala xanchumu enhlokweni loko a dyondzisa exikolweni lexi.—1 Kor. 11:3-10; 1 Tim. 2:11, 12.

Buku leyi nge Titolovete Ku Hlaya Ni Ku Tsala yi kona hi tindzimi to tala. Yi hleleriwe ku dyondzisa ku hlaya ni ku tsala. Ku nga ha tirhisiwa ni tibuku tin’wana to dyondzisa ha tona, swi ta ya hi vuswikoti bya swichudeni byo hlaya. Loko swichudeni swi endle nhluvuko lowu faneleke, swi fanele swi khutaziwa ku tsarisa eka Xikolo xa Vutirheli bya le Tilweni.

Wena tanihi mulanguteri wa Xikolo xa Vutirheli bya le Tilweni, u nga ri pfuna swinene vandlha. Lunghiselela kahle, naswona hi ku pfumelelana ni ndzayo ya Varhoma 12:6-8, teka xiavelo xa wena xi ri nchumu wa risima lowu u wu byarhisiweke hi Xikwembu.