Bokisi Ra Swivutiso

● Xana swichudeni swi fanele ku kuma swiavelo kangani eXikolweni xa Vutirheli bya le Tilweni?

Xin’wana xa swikongomelo leswikulu xa Xikolo xa Vutirheli bya le Tilweni i ku andzisa swivulavuri swa le rivaleni. Hikwalaho ka xivangelo xexo, Xiyimiso xa Xikolo xa Vutirheli bya le Tilweni xi endla lunghiselelo ra leswaku tinkulumo to tala ti averiwa vamakwerhu va xinuna.

Hambi swi ri tano, xikongomelo xin’wana xa nkoka xa xikolo i ku letela vanhu hinkwavo va Yehova ku va vachumayeri ni vadyondzisi lava humelelaka evutirhelini bya Vukriste. Hi xivangelo lexi, swi fanerile leswaku vamakwerhu va xisati va tsarisa na vona.

Leswaku va pfuneka hi xitalo exikolweni, lava va tsariseke va fanele va hamba va amukela swiavelo swa xichudeni nkarhi na nkarhi. Ku ringanyetiwa leswaku xichudeni xin’wana ni xin’wana xi va ni xiavelo xin’we endzhaku ka tin’hweti tinharhu. Loko swiyimo swa kwalaho swi pfumela, vamakwerhu va xinuna va nga nyikiwa swiavelo leswi engetelekeke. A swi bohi leswaku vakulu lava nyikelaka tinkulumo ta ndzayo ni tinhla-nkulu ta Bibele nkarhi na nkarhi, va averiwa tinkulumo ta swichudeni na vona.

Ku lava ku va hafu ya lembe xidzana, Xikolo xa Vutirheli bya le Tilweni xi pfune timiliyoni ku endla nhluvuko wa moya ni ku dyondza ndlela yo tiphofula ku antswa eku nyikeleni ka rungula ra Mfumo. Hinkwavo va khutaziwa ku tirhisa lunghiselelo leri ri hlamarisaka hi xitalo leri humaka eka Yehova Xikwembu. Xikongomelo xa hina xi fanele xi va ku tikombisa hi amukeleka eka Xikwembu, malandza ‘lama nga riki na nchumu lexi ma khomisaka tingana, ma tamela rito ra ntiyiso hi ndlela leyinene.’—2 Tim. 2:15.