Xikolo Lexi Humelelaka Xa Misava Hinkwayo

LEXI a hi xikolo lexi durhaka kumbe yunivhesiti ya le henhla leyi ku nghenaka vanhu va nga ri vangani ntsena. E-e, xikolo lexi xi tirha handle ko hakerisa swichudeni swa xona. Nongonoko wa tidyondzo ta xona swi nga ha endleka wu endleriwa endhawini leyi nga ekusuhi ni le ka n’wina. Xi vitaniwa Xikolo xa Vutirheli bya le Tilweni, naswona xi khomeriwa endhawini ya minhlangano ya Timbhoni ta Yehovha. Vanhu va kwalomu ka ntlhanu wa timiliyoni emisaveni hinkwayo va nghena xikolo lexi.

U nga ha tivutisa, ‘I yini leswi lavekaka loko u lava ku tsarisa? Ku dyondzisiwa yini exikolweni lexi? Xi fambisiwa njhani? Naswona vanhu va vuyeriwa njhani eka xona?’

Leswi Lavekaka

Hambi loko vanhu hinkwavo va amukeriwa leswaku va nghenela Xikolo xa Vutirheli bya le Tilweni, lava va tsarisaka va fanele va pfumelelana ni tidyondzo ta buku-mpfuno leyikulu ya xikolo, ku nga Bibele. Va fanele va hanya vutomi lebyi pfumelelanaka ni swilaveko swa Bibele swa mahanyelo. Hikwalaho swichudeni a swi fanelanga swi va ni mahanyelo yo biha. A swi fanelanga swi ri makhamba, swidakwa, vaoswi, vadzahi va fole, sweswo-sweswo.—1 Vakorinto 6:9-11.

Swikolo swo tala namuntlha swi cukumete milawu ya maambalelo, kambe swichudeni leswi tsarisiwaka eka Xikolo xa Vutirheli bya le Tilweni swi languteriwa ku ambala swiambalo leswi fanelekaka, leswi baseke. (1 Timotiya 2:9, 10) A ku na xilaveko xa malembe eka xikolo lexi. Vana va mune kumbe ntlhanu wa malembe lava kotaka ku hlaya va tsarisa ivi va nyikiwa swiavelo nkarhi na nkarhi, kun’we ni vavanuna ni vavasati lava nga emalembeni ya va-90.

Xivumbeko Ni Tidyondzo

Leswaku ku va kona swi olova, minongonoko leyi leheke 45 wa timinete ya Xikolo xa Vutirheli bya le Tilweni hi ntolovelo yi khomiwa nkarhi na nkarhi exikarhi ka vhiki ni madyambu. Endzhaku ka marito yo koma yo amukela ya muleteri wa xikolo, xivulavuri xo sungula xa madyambu wolawo xi nyikela nkulumo ya 10 ku ya eka 15 wa timinete leyi sekeriweke eka yin’wana ya tibuku-mpfuno ta xikolo. Kutani, hi timinete tinharhu ku ya eka ntlhanu u endla mpfuxeto wa mhaka hinkwayo leyi a yi hlanganiseke.

La landzelaka, i mudyondzisi la fanelekaka loyi a katsakanyaka tinhla-nkulu ta xiavelo xa ku hlaya ka Bibele ka vhiki ni vhiki, lexi hi ntolovelo xi vumbiwaka hi tindzima timbirhi ku ya ka mune ta le Bibeleni. Mpfuxeto lowu wu heta tsevu wa timinete. Swichudeni leswi namarhelaka xiavelo lexi xa ntirho wa le kaya wa vhiki na vhiki endzhaku ka nkarhi swi va swi hlaye Bibele hinkwayo.

Endzhaku ka tinhla-nkulu ta Bibele, swichudeni swinharhu swi nyikela tinkulumo, ha yin’we yi teka ntlhanu wa timinete. Yin’wana i ku hlaya ka Bibele loku nga xiphemu xa xiavelo xa ntirho wa le kaya. Tinkulumo letin’wana timbirhi ti sekeriwe eka rungula ra buku yin’wana ya xikolo leyi swichudeni hinkwaswo swi khutaziwaka ku yi hlaya loko swi lunghiselela dyondzo. Endzhaku ka nkulumo yin’wana ni yin’wana ya xichudeni, muleteri wa xikolo u nyikela swibumabumelo naswona, hakanyingi, u nyikela ni swiringanyeto swo antswisa.

Ndzayo ya muleteri wa xikolo yi sekeriwe eka Buku Yo Letela Ya Xikolo Xa Vutirheli Bya Le Tilweni, leyi xichudeni xin’wana ni xin’wana xi languteriwaka ku yi dyondza hi vukheta. Leswaku xi antswisa mfanelo yo karhi yo vulavula eka xiavelo xa xona xa nkarhi lowu taka, xichudeni xi nga ha komberiwa ku pfuxeta ndzima yo karhi ya buku yo letela, ndzima yo tanihi “Ku Languta Vayingiseri Ni Ku Tirhisa Tinotsi,” “Swifaniso Leswi Fanelekaka,” “Ku Tirhisa Ku Phindha-phindha Ni Ku Tshukatshuka Ka Miri” ni “Ku Kandziyisa Mongo Ni Ku Cinca-cinca Rito.”

Ematikweni man’wana Xikolo xa Vutirheli bya le Tilweni xi tlhela xi katsa ni tlilasi leyi eka yona ku dyondziwaka ku tsala ni ku hlaya ni ku antswisa mahlayelo. Vanhu va makume ya magidi va dyondze ku hlaya kumbe ku antswisa mahlayelo ya vona eka titlilasi to tano leti dyondzisaka ku hlaya ni ku tsala. Hi xikombiso, le Mexico exikarhi ka 1946 na 1994, vanhu lava tlulaka 127 000 va pfuniwile leswaku va kota ku hlaya ni ku tsala.

Xi Pfuna Timiliyoni

Emisaveni hinkwayo Xikolo xa Vutirheli bya le Tilweni xi seketela matshalatshala ya vatswari yo dyondzisa vana va vona dyondzo leyinene. Moriah wa 16 wa malembe hi vukhale u te: “Ndzi dyondze ndlela yo endla ndzavisiso wa rungula ni ku lunghiselela tinkulumo ta mina. Sweswi xiavelo xin’wana ni xin’wana lexi ndzi nyikiwaka xona exikolweni xa le henhla xa ndzi olovela.”

Matthew wa 15 wa malembe hi vukhale, la tsariseke eXikolweni xa Vutirheli a ri ni malembe ya nkombo u te: “Ndzi vuyeriwa swinene ku tlula tintangha ta mina loko ku tiwa emhakeni yo pasa exikolweni. Ndzi kume vutshila byo kota ku hlaya ni byo yingisela ni vuswikoti byo nyikela tinkulumo hi ndlela leyi humelelaka.” Makwavo wa yena la nga na 17 wa malembe hi vukhale, Phil, wa engetela: “Xikolo xa Vutirheli bya le Tilweni xi ndzi endle ndzi titshemba ku antswa. Ndza swi tiva leswaku loko ndzi nyikiwe xiavelo, ndzi nga xi endla.”

Xikolo xa Vutirheli bya le Tilweni xi dyondzisa ni lavakulu. Michael loyi a fikeleleke tipakani ta yena to tanihi ku nyikela tinkulumo etinhlengeletanweni ta vafambisi va mabindzu, wa hlamusela: “A a ndzi ri na rhumbu ngopfu loko ndzi joyina Xikolo xa Vutirheli. Sweswi a ndza ha chavi. Xikolo xi nyikele swilo leswinene, ku nga vutivi, vutshila, ni xikhutazo lexi kongomeke, leswi a ndzi swi lava leswaku ndzi hlula ku chava ka mina.” Mutswari un’wana u te: “Ndzi tivona ndzi kote ku siva minkarhi yo dyondza leyi ndzi lahlekeleke loko ndza ha ri muntshwa.”

Eximutanini xa Latin Amerika, swirho swa Ndzawulo ya Dyondzo swi ve kona eka Xikolo xa Vutirheli bya le Tilweni. Endzhaku ko yingisela xivulavuri xa ndhawu yoleyo, un’wana wa vaendzi, loyi a nga nhloko ya xikolo, u te: “Swa hlamarisa, ku vona wanuna loyi a hi n’wi tiva a nga dyondzanga a vulavula emahlweni ka ntshungu hi Xipaniya [ematshan’wini ya ririmi-mpambukwa ra yena], kambe hi loyi u karhi wa swi endla.”

Entiyisweni, Xikolo xa Vutirheli bya le Tilweni hi xin’wana xa swikolo swa kahle swinene emisaveni! Xi nga pfuna vantshwa ni lavakulu leswaku va kuma dyondzo leyinene. Hi laha muntshwa un’wana a vuleke ha kona, “Ndzi khutaza leswaku un’wana ni un’wana la anakanyaka ku joyina xikolo lexi, a joyina hi ku hatlisa.”

[Xifaniso lexi nga eka tluka 1]

Xikolo xa Vutirheli bya le Tilweni xi pfuna timiliyoni leswaku ti kuma dyondzo leyinene