Xikolo Lexi Nga Ta Hi Vuyerisa Swinene

¹ Vanhu va ya exikolweni va ya kuma vuleteri lebyi nga ta va pfuna ku fikelela tipakani ta vona evuton’wini. Kambe xana yi kona pakani leyi nga ya nkoka ku tlula ku dzunisa Munyiki wa vutomi ni ku pfuna van’wana leswaku va dyondza hi swikongomelo ni tindlela ta yena? A yi kona. Xikongomelo xa Xikolo xa Vutirheli bya le Tilweni i ku hi pfuna ku hlamusela vupfumeri bya hina eka van’wana. Kutani loko hi hlanganyela exikolweni vhiki ni vhiki, hi kuma vutivi lebyi hi lotelaka mintirho ya nkoka swinene evuton’wini.

² Enkandziyisweni wa Vutirheli Bya Hina Bya Mfumo bya n’hweti leyi hundzeke, ku nghenisiwe “Xiyimiso Xa Xikolo Xa Vutirheli Bya Le Tilweni Xa 2003.” Xiyimiso lexi xi ni vuxokoxoko bya ndlela leyi xikolo xi nga ta fambisiwa ha yona. Swi nga ku pfuna ku veka xiyimiso lexi ebukwini ya wena leyi nge Vuyeriwa Eka Vuleteri Bya Xikolo Xa Vutirheli Bya Le Tilweni, leyi u faneleke u ta na yona vhiki na vhiki eXikolweni xa Vutirheli bya le Tilweni. Xiya swin’wana leswi nga ta endliwa eka Xikolo xa Vutirheli bya le Tilweni xa 2003.

³ Yinhla Yo Tirhela Eka Yona: Ku sukela hi January, nhlangano wun’wana ni wun’wana wu ta sungula hi nkulumo ya ntlhanu wa timinete leyi vulavulaka hi yinhla yo tirhela eka yona kumbe hi ku hlaya, ku dyondza kumbe ku dyondzisa. Mulanguteri wa xikolo hi yena a nga ta nyikela nkulumo ya kona, kumbe a nga avela nkulu un’wana la fanelekaka leswaku a yi nyikela. Xivulavuri xi nga nyikela nhlamuselo ya yinhla yo tirhela eka yona ni ndlela leyi yi nga ya nkoka ha yona. Kutani xi ta ndlandlamuxa rungula ra kona hi ku nyikela swikombiso swa Matsalwa ni ku kombisa matirhiselo ya yinhla yo tirhela eka yona, xi kandziyisa ngopfu ndlela leyi ku endla sweswo swi nga antswisaka vutirheli bya hina ha yona.

⁴ Nkulumo No. 1: Vamakwerhu lava averiweke ku nyikela nkulumo yo laya va ha tsundzuxiwa ku “kombisa ndlela leyi rungula ra nkulumo leyi nyikeriwaka ri tirhaka ha yona.” Sweswo swi vula ku kombisa vandlha ndlela leyi kongomeke yo tirhisa rungula ra kona. Loko u kuma xiavelo lexi, hlaya matluka 48-9 ebukwini leyi nge Xikolo Xa Vutirheli leswaku u kuma swiringanyeto swa ku lunghiselela, kutani u kambisisa matluka lama kombisiweke eka xikombo xa buku ehansi ka marito lama nge “Endla nkulumo yi dyondzisa.”

⁵ Xiyimiso Xa Ku Hlaya Ka Bibele: Loko enkarhini lowu hundzeke u nga swi kotanga ku fambisana ni ku hlaya ka Bibele ka vhiki na vhiki, ha yini u nga tiyimiseli ku namarhela xiyimiso xa nan’waka? Loko lembe ri hela, lava va endlaka sweswo va ta va va hete Matsalwa ya Vukreste ya Xigriki. Vuyelo bya ku sungula ku hlaya Bibele eMatsalweni ya Vukreste ya Xigriki byi hlamuseriwa ebukwini ya Xikolo Xa Vutirheli, tluka 10, ndzimana 4.

⁶ Tinhla-nkulu Ta Ku Hlaya Ka Bibele: Nkulumo leyi yi engeteleriwe nkarhi wa yona wu va khume ra timinete leswaku vayingiseri va nyikela tinhlamuselo eka xiyenge lexi hlayiwaka eka vhiki rero. Lava averiweke nkulumo leyi va fanele va namarhela nkarhi lowu va nyikiweke wona. Tinhla-nkulu ti ta nyikeriwa vhiki rin’wana ni rin’wana, ku katsa ni vhiki ra bulo ra mpfuxeto. Loko u ri karhi u hlaya tindzima ta vhiki ro karhi, languta tinhla leti nga ta ku pfuna edyondzweni ya ndyangu wa wena, evutirhelini bya wena kumbe emahanyelweni ya wena. Hi tihi timfanelo ta Yehovha leti vonakeke eka ndlela leyi a khomeke vanhu vakwe ni matiko man’wana ha yona? U dyondze yini lexi tiyiseke ripfumelo ra wena ni ku endla leswaku u n’wi tlangela swinene Yehovha? U nga kanakani ku nyikela nhlamulo eka yinhla yihi ni yihi ya tindzima leti dyondziwaka vhiki rero, hambi ku ri eka tindzimana leti nga ta hlayiwa eka Nkulumo No. 2, tanihi leswi xichudeni xa kona xi nga ta ka xi nga hlamuseli nchumu eka tindzimana leti xi ti hlayeke.

⁷ Nkulumo No. 2: Nkulumo yo sungula ya xichudeni vhiki rin’wana ni rin’wana ku ta va ku dyondza ku hlaya erivaleni. Tinkulumo ta n’hweti hinkwayo handle ka ya vhiki ro hetelela, ti ta tekiwa eka tindzimana ta Bibele leti hlayiwaka vhiki rero. Eka vhiki ro hetelela ra n’hweti rungula leri nga ta hlayiwa ri ta tekiwa eka Xihondzo xo Rindza. Xichudeni xi fanele xi hlaya rungula leri xi averiweke rona xi nga tirhisi xingheniso kumbe mahetelelo. Hikwalaho, pakani ya xona leyikulu ku ta va ku hlaya hi ndlela leyinene.—1 Tim. 4:13.

⁸ Nkulumo No. 3 Na 4: Tin’wana ta tinkulumo leti ti ni rungula ro tala ku tlula tin’wana ebukwini leyi nge Ku Hlamulana; kasi tin’wana to va ni nhloko-mhaka ntsena. Lava averiweke tinkulumo leti nga riki na rungula ro tala ebukwini kumbe leti nga ni nhloko-mhaka ntsena va ta kota ku ndlandlamuxa tinkulumo ta vona hi ku endla ndzavisiso eka minkandziyiso ya hina ya Vukreste. Sweswo swi ta pfuna vamakwerhu va xisati ku endla leswaku tinhlamuselo ta vona ti pfumelelana ni xiyimo xa vapfuni va vona.

⁹ Mahlelelo Ya Nkulumo: Hilaha swi kombisiweke hakona eka tluka 45 ra buku leyi nge Xikolo Xa Vutirheli, mulanguteri wa xikolo a nga ha ku hlawulela mahlelelo ya nkulumo. Loko a nga endlanga tano, vamakwerhu va xisati va nga hlawula mahlelelo ya nkulumo eka nxaxamelo lowu nga eka tluka 82. Loko makwerhu wa xisati a nyikela nkulumo kan’we eka tin’hweti timbirhi, a nga kota ku tirhisa mahlelelo ya nkulumo ya 30 hi ku hambana ka wona ku ringana ntlhanu wa malembe. Vamakwerhu va xisati lava hlawulaka mahlelelo ya No. 30, lama nge “Mahlelelo man’wana ya nkulumo lama fanelaka endhawini ya ka n’wina,” va fanele va tsala mahlelelo ehansi kumbe endzhaku ka xiphephana xa xiavelo xa nkulumo (S-89). Mulanguteri wa xikolo u ta tsala siku leri xichudeni xi nyikeleke nkulumo ha rona eka tluka 82 ra buku ya xichudeni, etlhelo ka mahlelelo lawa xi tirhiseke wona. Leswi a nga swi endla loko a fungha phepha ra ndzayo ra xichudeni xa kona.

¹⁰ Phepha Ra Ndzayo: Phepha ra wena ra ndzayo ri le bukwini ya wena. Ri kumeka eka matluka 79-81. Xisweswo u fanele u nyika mulanguteri wa xikolo buku ya wena loko u heta ku nyikela nkulumo yin’wana ni yin’wana. Mulanguteri wa xikolo u ta hlayisa rhekhodo ya tinhla ta ndzayo leti swichudeni swi tirhelaka eka tona.

¹¹ Bulo Ra Mpfuxeto: Mpfuxeto wa Xikolo xa Vutirheli bya le Tilweni ku ta va bulo ra swivutiso ni tinhlamulo. Wu ta endliwa kan’we endzhaku ka tin’hweti timbirhi naswona wu ta heta timinete ta 30. Swivutiso leswi nga ta vutisiwa hi nkarhi wa mpfuxeto swa ha ta hambeta swi kumeka eka Vutirheli Bya Hina Bya Mfumo. Loko vhiki ra bulo ra mpfuxeto ri kotlana ni vhiki ra nhlengeletano ya xifundzha kumbe ra ku endzeriwa hi mulanguteri wa xifundzha, kutani tinkulumo ta vhiki leri landzelaka nhlengeletano kumbe riendzo ra mulanguteri wa xifundzha ti fanele ti nyikeriwa hi vhiki ra le mahlweni ka rero ivi bulo ra mpfuxeto ri endliwa evhikini ra le ndzhaku ka nhlengeletano kumbe riendzo ra mulanguteri wa xifundzha.

¹² Mintlawa Yin’wana: Emavandlheni lawa ku nga ni swichudeni swo hundza 50, vakulu va nga ha boha leswaku ku va ni mintlawa yin’wana. “Lunghiselelo leri ri nga ha tirhiseriwa tinkulumo hinkwato ta swichudeni, kumbe mi hambana loko ku endliwa tinkulumo timbirhi to hetelela.” (Xikolo Xa Vutirheli, tl. 285) Xiringanyeto xa vumbirhi eka ntshaho lowu nga laha henhla xi nga tirha eka mavandlha lama nga ni vamakwerhu vo tala va xisati kambe ku ri ni vamakwerhu vatsongo va xinuna lava nyikelaka tinkulumo leti hlayiwaka kunene. Vakulu va fanele va hlawula vamakwerhu lava fanelekaka leswaku va fambisa mintlawa leyi.

¹³ Mupfuni Wa Mulanguteri Wa Xikolo: Hilaha swi kombisiweke hakona eka xiyimiso xa Xikolo xa Vutirheli bya le Tilweni, mupfuni wa mulanguteri wa xikolo u ta hlawuriwa hi huvo ya vakulu leswaku a nyikela ndzayo ya le xihundleni eka vakulu ni malandza ya vutirheli lava nyikelaka tinhla-nkulu ta Bibele ni tinkulumo to laya. Makwerhu la nga ta hlawuriwa leswaku a endla ntirho lowu u fanele a ri munhu la nga ni ntokoto, loyi ndzayo ya yena yi nga ta xiximiwa hi vakulu van’wana. U fanele ku nyika ndzayo leyi akaka, a bumabumela lava vulavuleke kahle, ni lava nga ni vuswikoti byo dyondzisa kutani a va tsundzuxa ku antswisa eka yinhla yin’we kumbe timbirhi. A swi bohi ku nyikela ndzayo nkarhi hinkwawo endzhaku ka nkulumo yin’wana ni yin’wana leyi nyikeriweke hi makwerhu loyi a talaka ku nyikela tinkulumo. Hambiswiritano, makwerhu loyi a averiweke ku nyikela ndzayo u fanele a twisisa leswaku hambi ku ri vamakwerhu lava nyikelaka tinkulumo ta le rivaleni va nga pfuniwa ku ya emahlweni va antswisa.—1 Tim. 4:15.

¹⁴ Leswi Faneleke Ku Kambisisiwa: I yini leswi nga pfunaka mutsundzuxi ku kambisisa nkulumo loko yi nyikeriwa? Bokisi ra vunharhu eka vunyingi bya tindzima ta 53 ta buku leyi nge Xikolo Xa Vutirheli ri tamele nkatsakanyo wo koma wa leswi faneleke ku kambisisiwa. Mulanguteri wa xikolo u ta tlhela a nyikela nyingiso eka switsundzuxo swin’wana kumbe swiringanyeto leswi nga ebukwini leswi nga ta n’wi pfuna ku hatla a vona ndlela leyi nkulumo yi hleriweke ni ku pfuna ha yona. Hi xikombiso, xiya ntlhandlamano wa swivutiso leswi kumekaka ehenhla eka tluka 55 ni switsundzuxo swin’wana leswi kumekaka endzimaneni yo hetelela eka tluka 163.

¹⁵ Tata Swivandla Leswi Nga Riki Na Nchumu: Handle ka swivandla leswikulu ematlhelo ka matluka ya buku leyi nge Xikolo Xa Vutirheli, nakambe ku ni swivandla swo tala leswi endleriweke leswaku u tsala tinotsi loko u ri karhi u endla dyondzo ya munhu hi xiyexe ni loko u ri eXikolweni xa Vutirheli Bya le Tilweni. (Vona matluka 77, 92, 165, 243, 246 na 250.) Tiyiseka leswaku u ta ni buku ya wena vhiki na vhiki. Fambisana ni xivulavuri loko xi nyikela nkulumo yo sungula. Tshama u pfule buku ya wena ku kondza xikolo xi hela. Tsala swiringanyeto leswi nyikeriwaka hi mulanguteri wa xikolo. Nyikela nyingiso eka madyondziselo ya swivulavuri, swivutiso swa swona, swikombiso ni swivulavulelo. Loko u tsala tinotsi hi mfanelo, u ta kota ku tsundzuka ni ku tirhisa tinhla to tala leti u ti dyondzeke exikolweni.

¹⁶ Yesu Kreste a a swi tiva leswaku ku chumayela mahungu lamanene ya Mfumo wa Xikwembu i lunghelo lerikulu leri nga kumiwaka hi munhu un’wana ni un’wana. Wolowo a ku ri ntirho wa yena lowukulu. (Mar. 1:38) U te: “Ndzi fanele ku vula mahungu lamanene ya mfumo wa Xikwembu, hikuva hi swona leswi ndzi rhumeriweke swona.” (Luka 4:43) Ku fana ni lava amukeleke xirhambo xa leswaku va n’wi landzela, na hina hi tirha hi matimba eku chumayeleni ka mahungu lamanene, naswona minkarhi hinkwayo hi lwela ku antswisa ntikelo wa “xitlhavelo xa ku dzunisa” ka hina. (Hev. 13:15) Leswaku hi fikelela pakani leyi, onge hi nga tiyimisela ku hlanganyela nkarhi na nkarhi eXikolweni xa Vutirheli bya le Tilweni, lexi nga ta hi pfuna ku langutana ni timhaka ta nkoka ngopfu evuton’wini.