Ndlela Leyi Xikolo Xa Vutirheli Bya Le Tilweni Xi Hi Pfunaka Ha Yona
1 Vanhu va Yehovha va ni lunghelo ro hlawuleka ro dyondzisiwa hi yena. (Esa. 54:13; Yoh. 6:45) Hambiswiritano, hi vuyeriwa ngopfu loko ntsena hi tiyimisela ku amukela dyondzo yoleyo. Xana wa yi vona ndlela leyi Xikolo xa Vutirheli bya le Tilweni xi akaka vumoya bya wena ha yona?
2 Marito Yo Tlangela: Valanguteri vo tala va xikolo va xiye leswaku loko tinhla to tirhela eka tona ti lunghiseleriwe kahle, swirho swa vandlha swa vuyeriwa loko swi ri ensin’wini. Ku tlula kwalaho, mulanguteri un’wana wa xikolo u kume leswaku leswi vayingiseri va nyikiwaka nkarhi wo nyikela tinhlamuselo hi nkarhi wa tinhla-nkulu ta Bibele, vo tala va kota ku fambisana ni xiyimiso xa ku hlaya ka Bibele. Malunghana ni Nkulumo No. 2, vamakwerhu vo tala va vule leswaku leswi va nga ha tikarhatiki hi xingheniso ni mahetelelo, va kuma nkarhi lowu engetelekeke wo lunghiselela rungula leri hlayiwaka. Lava va averiwaka nkulumo leyi, va lwela ku antswisa ndlela leyi va hlayaka ha yona.—1 Tim. 4:13.
3 Hinkwerhu Hi Nga Vuyeriwa: Ku hlamula eminhlanganweni swa tsakisa. (Swiv. 15:23) Leswi hi nyikiwaka swivutiso swa mpfuxeto wo vulavula kunene ka ha ri nkarhi, hi kota ku lunghiselela kahle naswona swa olova ku hlamula loko ku endliwa mpfuxeto. Ku engetela kwalaho, ku sukela eka nkandziyiso wa Xihondzo xo Rindza xa January 1, 2004, ku kandziyisiwe swihloko swa tinhla-nkulu ta tibuku ta Bibele, leti fambisanaka ni swiyenge leswi hi averiweke ku swi hlaya eka Xikolo xa Vutirheli bya le Tilweni. Swihloko leswi swi pfune vo tala leswaku va hlamula hi ndlela leyi akaka eka nkulumo ya tinhla-nkulu ta Bibele.
4 Un’wana ni un’wana la tsariseke exikolweni u ni lunghelo ro hlawuleka ro lunghiselela ni ku nyikela tinkulumo. Swikhutazo leswi nyikeriwaka hi mulanguteri wa xikolo swi nga hi vuyerisa loko xikolo xi ri karhi xi ya emahlweni. Xichudeni xin’wana ni xin’wana xa vuyeriwa swinene hi ndzayo leyi mulanguteri wa xikolo a xi nyikaka yona etlhelo loko nhlangano wu hela. Xin’wana lexi nga hi pfunaka i switoloveto leswi kumekaka emakumu ka ndzima yin’wana ni yin’wana ya buku leyi nge Vuyeriwa Eka Vuleteri Bya Xikolo Xa Vutirheli Bya Le Tilweni, leswi kandziyisaka tinhla to tirhela eka tona.
5 Loko u twa Matsalwa lawa u vonaka leswaku u nga ma tirhisa loko xikolo xi ri karhi xi ya emahlweni niloko se xi herile, ma tsale ehansi ebukwini ya wena ya Xikolo Xa Vutirheli. Anakanyisisa hi leswi u swi dyondzeke u tlhela u vona ndlela leyi dyondzo ya Xikwembu yi tiyisaka vumoya bya wena ha yona.