Valanguteri Lava Rhangelaka—Mulanguteri Wa Xikolo Xa Vutirheli Bya Le Tilweni
1 Mulanguteri wa Xikolo xa Vutirheli bya le Tilweni i wanuna la kuleke hi tlhelo ra moya la tirhaka hi matimba eku vulavuleni ni le ku dyondziseni naswona a faneriwaka hi ku xiximiwa ni ntirhisano. (1 Tim. 5:17) Hi byihi vutihlamuleri byakwe?
2 Layiburari ya Xikolo xa Vutirheli bya le Tilweni leyi nga eHolweni ya Mfumo yi languteriwa hi yena. U tsakela ngopfu ku khutaza hinkwavo lava fanelekaka leswaku va tsarisa exikolweni. U fanele a tiyiseka leswaku u tshama a ri ni nxaxamelo lowu hlelekeke leswaku tinkulumo ti averiwa hi ndlela ya kona ka ha sele mavhiki manharhu ya nongonoko wun’wana ni wun’wana wa xikolo. U fanele a ri tiva kahle vandlha, a tsundzuka xichudeni xin’wana ni xin’wana ni ku tiva vuswikoti bya xona. Hambiloko a ri ni makwerhu un’wana la n’wi pfunetaka eku lunghiseleleni ka xiyimiso xa xikolo, ku avela swichudeni tinkulumo hi mfanelo i vutihlamuleri bya mulanguteri hi byakwe.
3 Leswaku a fambisa xikolo hi ndlela leyinene, mulanguteri u fanele a lunghiselela hi vukheta vhiki rin’wana ni rin’wana, a ri hlaya hi rixaladza rungula leri nkulumo yi tekiweke eka rona. Leswi swi endla leswaku a pfuna vandlha ku hisekela dyondzo leyi, ku tiva loko nkulumo leyi averiweke yi nyikeriwe hi ku pakanisa, ni ku kandziyisa tinhla ta nkoka leti nga ta katseka eka mimpfuxeto yo tsala.
4 Endzhaku ka nkulumo ya xichudeni xin’wana ni xin’wana, mulanguteri u ta bumabumela xichudeni ni ku boxa xivangelo lexi endleke leswaku a nyikela nkulumo yakwe hi ndlela leyinene kumbe xivangelo lexi endlaka leswaku a fanela ku antswisa. Loko ku ri ni munhu la lavaka ku pfuniwa eku lunghiseleleni ka swiavelo swakwe swa xikolo, mulanguteri kumbe un’wana la hlawuriweke hi yena a nga n’wi pfuna.
5 Leswaku hi vuyeriwa hi xitalo eka ntirho lowukulu lowu mulanguteri wa Xikolo xa Vutirheli bya le Tilweni ni vatsundzuxi van’wana lava engetelekeke lava landzelaka nkongomiso wakwe va wu endlaka, hi fanele hi va kona exikolweni nkarhi ni nkarhi. Hi fanele hi hetisisa swiavelo swa hina hinkwaswo ni ku tirhisa ndzayo leyi hi nyikiwaka yona kun’we ni leyi nyikiwaka swichudeni leswin’wana. Hi ndlela leyi, hakatsongo-tsongo hi ta antswisa vuswikoti bya hina byo chumayela rungula ra Mfumo erivaleni ni hi yindlu na yindlu.—Mint. 20:20; 1 Tim. 4:13, 15.