Ku Tsarisela Xikolo Xa Vutirheli Bya Le Tilweni

¹ Xikolo xa Vutirheli bya le Tilweni xi tirhe ngopfu eku leteleni ka timiliyoni ta Timbhoni ta Yehovha leswaku ti va vatirheli va mahungu lamanene. Vo tala va hina hi tsundzuka ndlela leyi a hi chava ni ku titwa hi nga faneleki ha yona loko hi tsarisa ro sungula exikolweni lexi, naswona sweswi hi ku tlangela hi xiya xiphemu xa xona eka nhluvuko wa hina wa moya tanihi swivulavuri ni vadyondzisi va Rito ra Xikwembu. (Ringanisa Mintirho 4:13.) Xana u tsarisile exikolweni lexi xo hlawuleka?

² I vamani lava nga ha tsarisaka? Tluka 73 ra buku leyi nge Ku Hleleriwa Ku Hetisisa Vutirheli Bya Hina ra hlamula: “Hinkwavo lava hlanganyelaka ni vandlha hi ku chivirika va nga ha tsarisa, ku katsa ni vanhu lava ha ku hlanganyelaka eminhlanganweni, ntsendze loko va nga hanyi vutomi lebyi lwisanaka ni misinya ya milawu ya Vukreste.” Hi rhamba hinkwavo lava fanelekaka—vavanuna, vavasati ni vana—leswaku va vonana ni mulanguteri wa xikolo ivi va kombela ku tsarisa.

³ Nongonoko Wa Xikolo Wa 1997: Nongonoko wa Xikolo xa Vutirheli bya le Tilweni wa 1997 wu hlanganisa tidyondzo ta Bibele to hambana-hambana ni swimunuhatwa, kun’we ni matimu ya nhlengeletano. Ku engetela eku hluvukiseni ka vuswikoti bya hina byo vulavula ni byo dyondzisa, ha dyondza eka tindzalama to tala ta moya leti kumekaka etidyondzweni ta vhiki na vhiki. (Swiv. 9:9) Loko hi lunghiselela xikolo, leswi katsaka ku hlaya ka Bibele ka vhiki na vhiki, naswona hi va kona nkarhi na nkarhi, nongonoko lowu wu nga hi pfuna swinene hi tlhelo ra moya.

⁴ Hi 1997 ku hlaya ka Bibele ka Nkulumo No. 2 ko tala ku komile ku tlula ka malembe lama hundzeke. Loko xichudeni xi lunghiselela nkulumo ya xona, xi fanele xi xiyisisa ku hlaya ka xona hi vukheta kutani xi vona leswaku xi nga tirhisa nkarhi wo tanihi kwihi xi endla xingheniso ni mahetelelo eka ntlhanu wa timinete leti averiweke nkulumo ya xona. Leswi swi ta pfuna xichudeni leswaku xi tirhisa nkarhi wa xona hi xitalo ni ku hluvukisa vuswikoti bya xona byo hlaya ni vutshila byo vulavula hi ku rhelela.—1 Tim. 4:13.

⁵ Ku nyikela vumbhoni hi xitshuketa hi man’wana ya mavekelo ya Nkulumo No. 3, leyi sekeriweke ebukwini leyi nge Vutivi. Kambe, makwerhu wa xisati a nga ha hlawula ku endla riendzo ro vuyela, dyondzo ya le kaya ya Bibele kumbe ku nyikela vumbhoni hi xitshuketa ku va mahlelelo ya nkulumo leyi. Kavula, mhaka ya nkoka leyi faneleke yi xiyisisiwa i vuswikoti byo dyondzisa ku nga ri mahlelelo.

⁶ Loko u ri ni lunghelo ro nyikela nkulumo yo laya, tinhla-nkulu ta Bibele kumbe nkulumo ya xichudeni, u nga kombisa ku tlangela ka wena Xikolo xa Vutirheli bya le Tilweni hi ku lunghiselela ni ku pfuxeta nkulumo ya wena kahle, hi ku yi nyikela hi ku tiyiseka ni hi ku hiseka, hi ku nga tluli nkarhi lowu vekiweke, hi ku yingisela ndzayo ya mufambisi wa xikolo ni ku yi tirhisa, ni ku tshama u ri karhi u tikarhatela ku endla xiavelo xa wena hi ku tshembeka. Xisweswo ku tsarisa ka wena exikolweni ku ta tikomba ku ri nkateko eka wena ni le ka lava ku yingiselaka.