Xana U Vika Nkarhi Na Nkarhi?

¹ Vona ndlela leyi swi phyuphyisaka ha yona ku amukela swiviko swa ntirho lowu endliweke ensin’wini! Leswi swi kombisa leswaku Yehovha u hambeta a mirisa. (1 Kor. 3:6) Un’wana ni un’wana wa hina u ni vutihlamuleri byo vona leswaku xiviko lexi heleleke ni lexi kongomeke xa rhumeriwa ehofisini ya rhavi.

² A swi kanakanisi leswaku hinkwerhu a hi tsakile loko hi twa leswaku hi August 1996 ku fikeleriwe nhlohlorhi leyintshwa ya vahuweleri ematikweni yo tala lama nga ehansi ka vulanguteri bya rhavi ra Afrika Dzonga. Hambiswiritano, ku kumeke leswaku mavandlha ya 111 laha Afrika Dzonga a ma swi rhumelanga hi nkarhi swiviko swa wona swa August. Leswi swi ve tano emavandlheni ya 15 ya le Botswana, 22 eLesotho, 5 eNamibia, na 35 eSwaziland. Ku tlula kwalaho, hi ku ya hi tinhlayo ta Congregation Analysis Report (S-10) leti rhumeriwaka hi matsalana wa vandlha rin’wana ni rin’wana, ku ni magidi ma nga ri mangani ya vahuweleri emavandlheni lava nga yisangiki swiviko swa vona. Swiphiqo swi nga ha va swimbirhi: Vamatsalana van’wana va nga ha va va nga swi rhumelanga hi nkarhi swiviko swa vona naswona swi nga ha endleka vahuweleri van’wana va tsandzeke ku vika.

³ Muhuweleri un’wana ni un’wana u fanele a tivutisa xivutiso lexi: ‘Xana ndzi vika ntirho wa mina wa nsimu nkarhi na nkarhi naswona hi ku hatlisa eku heleni ka n’hweti yin’wana ni yin’wana?’ Hinkwerhu hi ni vutihlamuleri byo endla leswaku xiviko xa n’hweti yin’wana ni yin’wana xi helela ni ku kongoma. Ku endla tano swi ta kombisa leswaku hi xixima malunghiselelo ya nhlengeletano ya Yehovha ni ku kombisa ku tlangela xiphemu xa hina lexitsongo lexi hi nga na xona eku endleni ka leswaku xiviko xi tsariwa kahle.

⁴ Leswi matsalana a faneleke a rhumela xiviko xa ntirho wa nsimu xa vandlha eka Sosayiti hi siku ra vutsevu ra n’hweti leyi tlhandlamaka, hi nga swi vona kahle leswaku i swa nkoka leswaku muhuweleri un’wana ni un’wana a tisa xiviko xakwe xa ntirho wa nsimu hi ku hatlisa eku heleni ka n’hweti. Xana u fambisana ni lunghiselelo leri hi ku vika hi ku hatlisa naswona hi ku kongoma eku heleni ka n’hweti yin’wana ni yin’wana?

⁵ Muhuweleri un’wana ni un’wana la fambisanaka ni malunghiselelo lama nga laha henhla hi ku swi rhandza a nga eneriseka hi ku tiva leswaku u hoxe xandla eku endleni ka leswaku xiviko xa n’hweti na n’hweti xa ntirho wa Timbhoni ta Yehovha xi huma hi nkarhi. (Ringanisa Ezekiyele 9:11.) Onge hinkwerhu ka hina nkarhi na nkarhi hi nga tisa swiviko swa ntirho wa nsimu leswi tsariweke kahle ka ha ri na nkarhi n’hweti yin’wana ni yin’wana!