Ku Avela Van’wana Xihundla Xa Ntsako eNdyangwini
1 Ndyangu i vun’we lebyikulu evanhwini, naswona ndyangu wu vumba swimitana, madoroba, matiko ni misava hinkwayo. Namuntlha ndyangu wu le hansi ka ntshikilelo ku tlula rini na rini. Minkucetelo ya matimba yi xungeta vutomi bya ndyangu lebyi nga kona. Mawaku ndlela leyi hi nkhensaka ha yona leswi Yehovha, Muendli wa lunghiselelo ra ndyangu, a hi nyikeke swiletelo leswaku hi ta kuma ntsako endyangwini! Lava landzelaka swiletelo leswi va kuma leswaku swiphiqo swa antswa naswona va va ni ndyangu lowu humelelaka swinene. Hi September hi ni lunghelo ro avela van’wana buku leyi nge Xihundla Xa Ntsako eNdyangwini. Vulavula ni vanhu hi nhloko-mhaka ya vutomi bya ndyangu. Vana ni xinghana, vulavula hi timhaka letinene, naswona u va ni vuxiya-xiya. Xana u nga vula yini?
2 U nga ha sungula hi ku vutisa xivutiso xo tanihi lexi nge:
◼ “Xana u swi xiyile leswaku mindyangu yo tala swa yi nonon’hwela ku tiyisela mintshikilelo ya vutomi? [Yimela nhlamulo.] Swiviko swi kombisa leswaku vanhu vo tala va nonon’hweriwa ekaya. Xana u ehleketa leswaku i yini lexi nga pfunaka mindyangu leswaku yi kuma ntshamiseko ni ntsako? [Yimela nhlamulo.] Tanihi leswi Xikwembu xi nga xona lexi simekeke lunghiselelo ra ndyangu, xana a swi nge vi swinene ku kambisisa swiletelo leswi xi swi nyikeleke? [Hlaya 2 Timotiya 3:16, 17.] Swiletelo swo tano leswi pfunaka swi andlariwe ebukwini leyi, leyi nge Xihundla Xa Ntsako eNdyangwini.” Kutani vutisa munhu loyi leswi a vonaka swi ri xiphiqo lexi tolovelekeke endyangwini, n’wi kombise ndzima leyi hlamuselaka xiphiqo xa kona, kutani u fambisa buku hi munyikelo wa R4,00.
3 Eriendzweni ro vuyela, u nga ha lava ku sungula dyondzo ya Bibele hi ku vula u ku:
◼ “Ndzi anakanye hileswi u swi vuleke malunghana ni vutomi bya ndyangu, naswona ndzi ku tisele nchumu lowu ndzi anakanyaka leswaku u ta wu tsakela. [N’wi kombise broxara leyi nge Leswi Xi Swi Languteleke, pfula eka tluka 16, ivi u hlaya swivutiso swo ringana tsevu leswi nga ehenhla.] Handle ko kanakana, un’wana ni un’wana ekaya u fanele a endla xiphemu xa yena leswaku ku hoxiwa xandla endyangwini lowu tsakeke. Loko u ri ni nkarhinyana, ndzi ta ku kombisa ndlela leyi u nga vuyeriwaka swinene ha yona hi rungula leri.” Kutani sungulani ku dyondza dyondzo 8.
4 Ndlela yin’wana ya ku sungula bulo i ku boxa xiphiqo, kumbexana hi ku vula u ku:
◼ “Hambileswi un’wana ni un’wana a navelaka ku tsaka ni ku eneriseka, swi languteka onge mindyangu yo tala a yi kalanga yi humelela emhakeni leyi. Xana u ehleketa leswaku i yini lexi nga va pfunaka leswaku va kuma ntsako wa ntiyiso? [Yimela nhlamulo.] Khale ka khaleni, Bibele yi vhumbhe mixaka ya swiphiqo leswi hi nga ta swi vona emindyangwini namuntlha. [Hlaya 2 Timotiya 3:1-3.] Hambiswiritano, Bibele yi tlhela yi byela mindyangu leswi yi faneleke ku swi endla leswaku yi tlhantlha swiphiqo leswi ni ku kuma ntsako lowu nga heriki. Misinya ya yona ya milawu yi kumeka ebukwini leyi, leyi nge Xihundla Xa Ntsako eNdyangwini.” Kutani n’wi kombise bokisi ra mpfuxeto emakumu ka ndzima leyi faneleke, ri hlaye, ivi u fambisa buku hi munyikelo wa R4,00.
5 Loko u tlhelela, tirhisa broxara leyi nge “Leswi Xi Swi Languteleke” leswaku u sungula dyondzo. U nga ha ku:
◼ “Ndzi tsakisiwe hi ku tiyimisela ka wena ku kambisisa misinya ya milawu ya Bibele leyi khumbaka vutomi bya ndyangu. Ntokoto wun’wana wu kombise leswaku vuyelo lebyinene byi kumiwa hi ku landzela ndzayo leyi tirhaka leyi kumekaka eBibeleni. Hi leyi nhlamuselo leyinene leyi leswi swi nga endliwaka ha yona.” Hlaya ndzimana yo sungula eka dyondzo 1 eka broxara leyi nge Leswi Xi Swi Languteleke, ku katsa na Pisalema 1:1-3 kumbe Esaya 48:17, 18. Loko nkarhi wu pfumela, kambisisa dyondzo leyi saleke. N’wi byele leswaku u ta vuya mi ta dyondza dyondzo leyi landzelaka swin’we.
6 Ku Tirhisa Tibuku Ta Hina Hinkwato Hi Ndlela Leyinene: Tibuku ta hina hinkwato ti ni rungula ra nkoka eku pfuneni vanhu leswaku va dyondza ntiyiso. Hikwalaho ka mhaka leyi, Sosayiti yi hungute nxavo eka tibuku to tala ta khale leswaku hi ta ti fambisela vanhu vo tala hilaha swi nga kotekaka hakona. Nxaxamelo wa tibuku ni tindzimi leti ti kumekaka ha tona wu rhumeriwe emavandlheni hinkwawo. Tin’hweti ta September na October i nkarhi lowunene wo fambisa tibuku leti ensin’wini leyi nga aviwangiki ni le nsin’wini leyi nga tirhiwiki nkarhi na nkarhi. Nakambe hi tlhele hi nyikiwa mpfumelelo wo hlawuleka hi Huvo leyi Fumaka leswaku hi fambisa New World Translation of the Christian Greek Scriptures hi tindzimi ta ntlhanu ta laha tikweni hi nxavo lowu hungutiweke wa R4,00. Xana u nga yi fambisa njhani Christian Greek Scriptures kun’we ni nyiko ya ntolovelo ku nga buku leyi nge Ntsako eNdyangwini?
7 Loko u vulavula ni vanhu lava hlayaka Xibunu, Xisuthu, Xitswana, Xixhosa kumbe Xizulu, fambisa Christian Greek Scriptures kun’we ni buku hi munyikelo wa R8,00. Vo tala a va xi tolovelanga xiga lexi nge “Matsalwa Ya Xigriki,” hikwalaho u nga ha tirhisa xiga lexi nge “Testamente Leyintshwa.” Kandziyisa nkoka wa New World Translation. U nga ha vulavula hi yin’wana ya tinhloko-mhaka leti nga eka xiyenge lexi nge “Bible Topics for Discussion” ivi u xi hlanganisa ni buku leyi nge Ntsako eNdyangwini. Kumbe u nga ha kombisa nkoka wa xita-ndzhaku xa marito ya Bibele hi ku kombisa ndlela leyi swi pfunaka muhlayi ha yona leswaku a kota ku pfula matsalwa lama tolovelekeke. Christian Greek Scriptures yi nga tlhela yi fambisiwa ni buku yin’we kumbe to tala eka leti ta mpimo lowutsongo hi R1,00.
8 A hi tikarhateni hilaha hi nga kotaka hakona leswaku hi avela van’wana xihundla lexi yisaka entsakweni wa ndyangu—hi ku landzela swiletelo leswi nga eRitweni ra Xikwembu.—Ps. 19:7-10.