Tidyondzo Ta Bibele Leti Endlaka Vadyondzisiwa
1 “Ku nga sivela yini leswaku ndzi khuvuriwa xana?” ku vutisa mutsheniwa wa Muetiyopiya endzhaku ka loko Filipi “a n’wi tivis[e] Evhangeli ya Yesu.” (Mint. 8:27-39) Loko a ri mutsheniwa, ana se a rhandza matsalwa ya Xikwembu lama huhuteriweke, naswona endzhaku ka loko a kume mpfuno wa moya lowu humaka eka Filipi, a a lunghekele ku va mudyondzisiwa. Kambe a hi vanhu hinkwavo lava khorwisekaka leswaku va fanele va kambisisa Matsalwa hi voxe.
2 Lexi tsakisaka, nhlengeletano ya Yehovha leyi humeseke buku leyi nge Vutivi, leswaku ku khutaziwa vanhu leswaku va kambisisa rungula ra Bibele ra siku ra hina. Rungula leri nga ebukwini leyi ri ta tsakisa vanhu va timbilu letinene lava nga ha vaka va dyondzekile kambe lava tivaka switsongo hi Bibele. Buku leyi leyinene yi endleriwe ku khutaza vanhu leswaku va kambisisa Bibele.
3 Loko u sungula dyondzo ya Bibele, swi ta ku pfuna ku kambisisa swiringanyeto leswinene leswi kandziyisiweke eka xiengetelo xa Vutirheli Bya Hina Bya Mfumo bya June 1996 malunghana ni ndlela leyi dyondzo leyi tswalaka mihandzu yi nga fambisiwaka ha yona hi ku tirhisa buku leyi nge Vutivi. Loko dyondzo yi ri karhi yi ya emahlweni, xiyisisa nhluvuko lowu endliwaka hi xichudeni leswaku u ta vona tindhawu leti lavaka nyingiso lowu engetelekeke. Khutaza xichudeni leswaku xi lunghiselela tidyondzo ta xona ka ha ri emahlweni, xi pfula ni matsalwa. Tinhlamulo leti xi ti vulaka hi marito ya xona ti nga ha kombisa ku tlangela ka xona ntiyiso loku humaka embilwini. Nhluvuko wa xihatla hakanyingi wu endliwa hi lava tlhelaka va hlaya tibuku tin’wana ta Sosayiti ni ku va kona eminhlanganweni ya vandlha nkarhi na nkarhi. Xi khutaze leswaku xi vulavula ni van’wana hi xitshuketa malunghana ni leswi xi swi dyondzaka. Hi tintswalo xi kombise leswi xi faneleke xi swi endla leswaku xi ta endla nhluvuko. A hi fanelanga hi fambisa tidyondzo nkarhi wo leha ni vanhu lava nga endliki nhluvuko. Swichudeni swi fanele swi tsakela ku dyondza, swi yima swi tiyile entiyisweni ni ku endla nhluvuko lowu yisaka eku tinyiketeleni ni nkhuvulo.
4 Emindyangwini yin’wana, ku fambisiwa tidyondzo to tlula yin’we, laha ku nga ni swirho swo hambana-hambana endyangwini leswi nga ni tidyondzo ta swona. Hambiswiritano, ku va ni dyondzo ya ndyangu leyi hlanganeke i swinene, tanihi leswi swi nga ta pfuna leswaku ndyangu wu va ni vun’we emoyeni.
5 Yesu u lerise leswaku hi famba hi ya endla vadyondzisiwa. (Mt. 28:19) Leswaku hi endla tano, hi fanele hi fambisa tidyondzo ta Bibele leti pfunaka swichudeni leswaku swi endla nhluvuko ku fikela laha swi nga ta vutisa swi ku, “Ku nga sivela yini leswaku ndzi khuvuriwa xana?”